Mana. Noqaykoqa ni pimanpis niykuchu mana vacunachikunanta. Astawanpis sapa ujmanta kashan, vacunachikunanchus manachus chayqa. Noqaykumanta ashkhas vacunasta churachikuyku.

 Onqoykuspaqa doctorpaman riyku. Doctorestaqa jatunpaj qhawayku, jinallataj enfermerastapis, tukuy pikunachus hospitalespi trabajanku chaykunatapis. Imaraykuchus paykunaqa, ashkhata trabajanku onqosqasta sanoyachinankupaj, astawanraj sinchʼi onqoykuna rikhurejtin. Chantapis doctoresman, cientificosmanwan mayta agradecekuyku, sinchʼi onqoykunata pisiyachinankupaj tukuy imata ruwashasqankumanta.

 Mana chayllachu, imatachus autoridades onqoykunamanta jarkʼakunapaj nisqankutapis kasukuyku. Chayrayku coronavirus onqoy rikhurisqanmantapacha, noqaykupis paykuna jinallataj, ashkha yuyaychaykunata kay onqoymanta jarkʼakunapaj orqhoyku. Chaykunataqa jw.org paginaykupi ashkha parlaykunapi churayku. Chay yuyaychaykunapi nerqayku: waj runasmanta karitupi kana kasqanta, wasillapi kakuna kasqanta, makista mayllakuna kasqanta, barbijota chayri mascarata churakuna kasqanta, nitaj ashkha runaswan tantakunachu kasqantapis. Chantapis nillarqaykutaj, autoridadespa kamachisqankuta kasukunata (Romanos 13:1, 2).

 Jehovaj testigosnenqa, may chhika watastaña kay jina yuyaychaykunata orqhoyku:

•   Sapa ujmanta kashan, ima tratamientotachus ruwanan chayri ima medicamentotachus tomanan (Gálatas 6:5).

   “[Kay revistapeqa], mana nishaykuchu ima jampichus chayri ima tratamientochus aswan sumaj kasqanta. Nitaj doctoreschu kayku, ‘kay jampita tomay chayri kay tratamientota ruway’ ninaykupajqa. Astawanpis imatachus doctores nisqallankuta willashayku. Sapa ujmanta kashan imaynatachus jampichikunanqa” (¡Despertad! 8 de febrero de 1987).

   “Tatas, mamas, qankunamanta kashan familiaykichejta vacunachinkichejchus manachus chayqa” (¡Despertad! 8 de diciembre de 1965).

•   Kausayta jatunpaj qhawasqaykurayku, onqoykuspaqa doctorespaman riyku (Hechos 17:28).

   “Jehovaj testigosnenqa kausayta jatunpaj qhawayku. Chayrayku onqoykuspaqa, sanoyapunaykupaj doctoreswan jampichikullayku. Jinapis uj tratamiento Bibliaj nisqanwan churanakojtenqa, mana chay tratamientota ruwaykuchu” (La Atalaya 1 de mayo de 1976).

   “Jehovaj testigosnenqa mana wañuyta munaykuchu, sanitollapunitaj kayta munayku. Chayrayku medicospa qosqan jampista tomallayku, tratamientostapis ruwallayku. Wakin testigostaj Jesuspa discipulon Lucas jinallataj doctores kanku. Jehovaj testigosnenqa doctorespa, enfermeraspa trabajonkuta sumajpaj qhawayku. Ima onqoymantapis sanoyachiwajtiykutaj, paykunaman mayta agradecekuyku” (La Atalaya 1 de febrero de 2011).