24 de octubre de 2021 pʼunchaypi, Bolivia sucursalta kamachejkunamanta hermano Douglas Little, willarqa Mosoj Jallpʼapi Kausajkunapaj Diospa Palabran Biblia quechua boliviano parlaypi orqhokusqanta. Chay Biblia orqhokusqantaqa willakorqa uj grabasqa videonejllata, chaytataj Boliviapi qhawarqanku 4.000 runasmanta astawan. Chay Bibliataqa Internetllamantaraj uraqachiyta atikun, jinapis tukuy imata wakichikushan abril de 2022 killapaj imprimisqa kananpaj.

Quechua boliviano parlaypeqa wakin palabras waj lugarespi waj jinamanta entiendekun. Chayrayku Diospa Palabran Bibliapeqa ashkha sutʼinchaykuna tiyan, chaykunapitaj willakushan wakin palabras waj lugarespi imaynatachus nikusqanta.

Quechua boliviano parlaypeqa 1880 watamantapacha quechua Biblias tiyan. Jinapis chay Bibliaspeqa Diospa sutin Jehová sutʼinchaykunasnillanpi rikhurin, wakinpitaj maypichus Jehová suti rikhurin chaypi “Tata Dios” nillan. Chayrayku uj traductor nerqa: “May kusisqa kashani kay Bibliapi Diospa sutin rikhurisqanmanta”, nispa.

Diospa Palabran Biblia traducikushajtenqa ashkha traductores llakiykunapi rikukorqanku, wakinkunaqa onqosqa familiaresninkuta cuidananku karqa. Chantapis kay COVID-19 jatun onqoy kasqanrayku, waj jinasmanta llankʼayman yachaykukunanku karqa. Chayrayku kay llankʼayqa mana tukukunanpaj jina karqa. Uj traductor nerqa: “Jehovaj yanapaynillanwan kay Bibliaqa orqhokorqa. Paypa yanapaynillanwan kay llankʼay ruwakorqa, aswan ñaupajsitutaraj tukukorqapis”, nispa.

Mosoj Jallpʼapi Kausajkunapaj Diospa Palabran Bibliaqa quechua boliviano parlayniyojkunata yanapanqa ‘salvakunankupaj, cheqa kajtataj allinta rejsinankupaj’ (1 Timoteo 2:4).