1 Crónicas 15:1-29
15 Davidqa wasista ruwakushallarqapuni Davidpa Llajtanpi, chantá cheqa Diospa* arcanpaj uj lugarta wakicherqa, toldo wasitapis* ruwaporqa.+
2 Chaypacha Davidqa nerqa: “Ni pi cheqa Diospa arcantaqa apananchu tiyan, manachayqa levitaslla. Jehová Dios levitasta ajllakun Jehovaj arcanta apanankupaj, paytataj sirvinallankupajpuni”,+ nispa.
3 Chantá Davidqa tukuynin israelitasta Jerusalenpi tantacherqa, chay wakichisqan lugarman Jehová Diospa arcanta apamunankupaj.+
4 Davidqa Aaronpa mirayninmanta kajkunata+ levitastawan+ tantacherqa:
5 cohatitasmantaqa tantacherqa kamachejninku Urielta, 120 hermanosnintawan,
6 meraritasmantataj kamachejninku Asayata,+ 220 hermanosnintawan,
7 guersonitasmantataj kamachejninku Joelta,+ 130 hermanosnintawan,
8 Elizafanpa+ mirayninmantataj kamachejninku Semayata, 200 hermanosnintawan,
9 Hebronpa mirayninmantataj kamachejninku Elielta, 80 hermanosnintawan,
10 Uzielpa+ mirayninmantataj kamachejninku Aminadabta, 112 hermanosnintawan.
11 Chantapis Davidqa wajyachillarqataj sacerdote Sadocta,+ Abiatartawan,+ chantá kay levitastawan: Urielta, Asayata, Joelta, Semayata, Elielta, Aminadabtawan.
12 Paykunatataj nerqa: “Qankunaqa levita familiaspi umas kajkuna kankichej. Hermanosniykichejwan khuska llimphuchakuytawan Israelpa Diosnin Jehovaj arcanta apankichej, chay wakichisqay lugarman.
13 Chay ñaupaj kutipi mana qankunachu Diospa arcanta aparqankichej,+ chayrayku Jehová Diosninchejqa noqanchejpaj sinchʼita phiñakorqa.+ Noqanchejqa mana allintachu qhawarikusqanchej imaynatachus arcata apana kasqanta”,+ nispa.
14 Chayrayku sacerdoteswan levitaswanqa, llimphuchakorqanku Israelpa Diosnin Jehovaj arcanta apanankupaj.
15 Chantá levitasqa cheqa Diospa arcanta kʼaspisninmanta+ oqharispa hombrosninkupi aparqanku. Chaytaqa Moisespa kamachisqanman jina ruwarqanku, Jehová Dios nisqanman jinataj.
16 Davidqa levitaspa kamachejkunasninkuta kamacherqa takej hermanosninkuman encarganankuta kusisqa takinankuta, tocanasta tocarispa: cuerdasniyoj tocanasta, arpasta,+ platillostawan.+
17 Levitastaj chayta encargarqanku Joelpa wawan Hemanman,+ hermanosnin ukhumantataj Berekiaspa wawan Asafman,+ merarita hermanosninkumantataj Cusayaj wawan Etanman.+
18 Paykunawan khuskataj kasharqanku iskay kaj grupomanta hermanosninku:+ Zacarías, Ben, Jaaziel, Semiramot, Jehiel, Uní, Eliab, Benaya, Maaseya, Matitías, Elifelehu, Micneyá, punkuta qhawajkuna Obed-Edomwan Jeielwan ima.
19 Takejkuna Hemán,+ Asaf,+ Etanpis sonachinanku karqa cobre platillosta.+
20 Chantá Zacarías, Aziel, Semiramot, Jehiel, Uní, Eliab, Maaseya, Benayapis cuerdasniyoj tocanasta tocaj kanku alamot* tonoman jina.+
21 Chantá Matitías,+ Elifelehu, Micneyá, Obed-Edom, Jeiel, Azaziaspis arpasta tocaj kanku seminit* templeman jina,+ ajinata paykunaqa tocajkunata tocachej kanku.
22 Levitaspa kamachejninku Kenaniasqa+ arcata apanamanta cargoyoj karqa. Payqa imaynatachus apanata sumajta yachaj.
23 Berekiaswan Elcanawanqa Diospa arcanta cuidaj kanku.
24 Sacerdotes Sebanías, Josafat, Netanel, Amasái, Zacarías, Benaya, Eliezerpis cornetasta jatunmanta waqachej kanku cheqa Diospa arcanpa ñaupaqenpi.+ Obed-Edomwan Jehiaswanpis arcata cuidallajtaj kanku.
25 Davidwan, Israelmanta kurajkunawan, sapa waranqa runaspa kamachejkunasninkuwan ima, allin kusisqa rerqanku+ Jehová Diospa trato ruwasqan arcata apamunankupaj Obed-Edompa wasinmanta.+
26 Cheqa Diosqa levitasta yanaparqa Jehová Diospa trato ruwasqan arcata apanankupaj. Chayrayku paykunaqa qanchis torillosta, qanchis carnerostawan* qʼolacherqanku.*+
27 Davidqa mana mangasniyoj sumaj telamanta ropayoj kasharqa, arcata apajkuna levitas jina, takejkuna jina, Kenanías jinataj. Kenaniasqa arcata apajkunajta, takejkunajtawan kamachejninku karqa. Chantapis Davidqa linomanta ruwasqa efodniyoj* kasharqa.+
28 Tukuy israelitasqa Jehová Diospa trato ruwasqan arcata apamorqanku kusiymanta qhaparirispa,+ pututusta, cornetastapis waqarichispa,+ platillosta sonarichispa, cuerdasniyoj tocanasta, arpastapis sinchʼita tocarispa.+
29 Jehová Diospa trato ruwasqan arcata Davidpa Llajtanman+ chayachimojtinkutaj, Saulpa warmi wawan Micalqa+ ventanamanta qhawamusharqa, rikorqataj rey Davidta phinkiykacharispa kusikushasqanta arcata apamusqankumanta. Chayta rikuspa Micalqa sonqonpi Davidta chejnikaporqa.+
Sutʼinchaykunasnin
^ Chayri “carpa wasitapis”.
^ Glosariopi cheqa Dios nisqata leeriy.
^ Carnero: waj lugarespi ninku mocho, oveja toro.
^ Chayri “ruphacherqanku”.
