1 Crónicas 16:1-43
16 Davidqa cheqa Diospa* arcanpaj uj toldo wasita* ruwaporqa. Chantá arcata chay toldo wasiman apaykorqanku,+ cheqa Diospa ñaupaqenpitaj qʼolachina* ofrendasta jaywarqanku, khuska mikhurikuy ofrendastapis.+
2 Chaymanta Davidqa qʼolachina ofrendasta,+ khuska mikhurikuy ofrendastapis+ jaywayta tukuchaytawan, Jehová Diospa sutinpi tukuy runasta bendicerqa.
3 Chantapis tukuy israelitasman, qharismanpis warmismanpis jaywarqa uj muyu tʼantata, palmera poqoykunamanta ruwasqa tʼantata, kʼisasmanta tʼantatawan.
4 Chantá Davidqa wakin levitasta churarqa Jehová Diospa arcanpa ñaupaqenpi sirvinankupaj,+ ajinamanta Israelpa Diosnin Jehovata jatunchanankupaj,* graciasta qonankupaj, yupaychanankupaj ima.
5 Asafqa+ kamachejninku karqa, Zacariastaj iskay kaj kamachejninku karqa. Jeiel, Semiramot, Jehiel, Matitías, Eliab, Benaya, Obed-Edom, Jeiel ima,+ cuerdasniyoj tocanasta, arpastawan tocaj kanku.+ Asafqa platillosta tocaj.+
6 Sacerdote Benayawan Jahazielwanqa cornetasta waqachejpuni kanku cheqa Diospa trato ruwasqan arcaj ñaupaqenpi.
7 Chay pʼunchay Davidqa uj takiyta wakicherqa Jehová Diosta agradecekunanpaj, kamacherqataj Asafta, hermanosnintawan chay takiyta takinankuta,+ chay takeyqa ñaupaj kaj takiynin karqa. Kaytaj kashan:
8 “Jehová Diosman graciasta qoychej,+ sutinta oqhariychej.
Ruwasqasninta llajtaspi rejsichiychej.+
9 Takipuychej, alabanzasta takipuychej.*+
Tukuynin sumaj ruwasqasninpi tʼukuriychej.*+
10 Diospa santo sutinmanta tukuy sonqo parlaychej.+
Jehová Diosta maskʼajkunaj sonqonku kusisqa kachun.+
11 Jehová Diosta maskʼaychej,+ kallpanta mañakuychej.
Khuyakusunaykichejpaj tuta pʼunchay mañakuychej.+
12 Yuyarikuychej allin tʼukunasta ruwasqanmanta.+
Yuyarikuychej milagrosta ruwasqanta, castigosta apachimusqantapis.
13 Chayta yuyarikuychej, kamachin Israelpa miraynin kajkuna,+Jacobpa wawasnin kajkuna, ajllasqasnin kajkuna.+
14 Paymin Jehová Diosninchejqa.+
Kamachiykunasnenqa jallpʼantinpi churasqa kashan.+
15 Wiñaypaj yuyarikuychej Diospa trato ruwasqanta.
Nacionninpaj ruwasaj nisqantaqa ama ni jaykʼaj qonqaychejchu.+
16 Abrahanwan tratota ruwasqanta yuyarikuychej,+Isaacman imatachus jurasqantapis yuyarikuychej,+
17 mayqentachus Jacobman garantiata jina qorqa chayta,+Israelmanpis unay wataspaj traton kananpaj qorqa chayta.
18 Kay jinata nispa: ‘Canaán jallpʼata qosqayki,+herenciaykichej kananpaj’.+
19 Chayta nerqa pisillaraj kashajtiykichej.
Allin pisillarajpuni karqankichej, forasteros jinataj purikusharqankichej.+
20 Paykunaqa nacionmanta nación purerqanku.
Uj suyumanta waj suyuman riporqanku.+
21 Diosqa mana saqerqachu ni pi paykunata ñakʼarichinanta.+
Astawanqa paykunarayku reyestapis kʼamerqa,+
22 kay jinata nispa: ‘Ama ajllasqasniytaqa llankhankichejchu,ama profetasniytaqa* imanankichejchu’,+ nispa.
23 Tukuy jallpʼantin, Jehová Diospaj takiripuychej.
Sapa pʼunchay wajkunaman willariychej imaynatachus runasta salvasqanta.+
24 Naciones ukhupi jatun kayninmanta willaychej,tʼukunasta ruwasqanmanta llajtas ukhupi willaychej.
25 Jehová Diosqa jatunmin, paylla jatunchanapaj jina.
Waj dioskunamanta nisqaqa, paylla aswan tʼukunapaj jina.+
26 Waj nacionespa tukuy diosesninkoqa qhasi manakajlla kanku, dioses nisqalla kanku.+
Jehová Diostajrí cielota ruwarqa.+
27 Diospa ñaupaqenpi kashanku jatun atiynin, jatun kayninpis.+
Tiyakun chaymantaqa kallpanpis, kusiyninpis kʼancharimun.+
28 Ayllus,* Jehová Diosta jatunchaychej.
Jehová Diosta jatunchaychej atiyniyoj kasqanrayku, kallpayoj kasqanrayku.+
29 Jehová Diosta jatunchaychej sutin jatunchanapaj jina kasqanrayku.+
Regalota apamuspa ñaupaqenman yaykuychej.+
Llimphu ropasta* churakuspa* Jehová Diospa ñaupaqenpi qonqorikuychej.*+
30 Ñaupaqenpi tukuy jallpʼantin kharkatichun.
Jallpʼaqa sumaj sayachisqa kashan, ni ima kuyurichinmanchu.+
31 Cielosqa kusikuchunku, jallpʼapis kusikullachuntaj.+
Naciones ukhupi kayta willaychej: ‘Jehová Diosqa Reyña’,+ nispa.
32 Mar qochaqa kusiywan sonarichun, mar qochapi tukuy ima kajpis kusikuchun.
Tukuy jallpʼas kusikuchunku, chaypi tukuy ima kajpis kusikuchunku.
33 Monte sachʼaspis kusisqa qhaparichunku Jehová Diospa ñaupaqenpi,payqa jallpʼata juzgaj jamushan.*
34 Jehová Diosman graciasta qoychej, kʼacha kasqanrayku.+
Munakuynenqa* wiñaypaj kallanqapuni.+
35 Niychejtaj: ‘Salvawaj Diosniyku, salvawayku ari.+
Naciones ukhumanta tantaykuspa librawayku ari,santo sutiykita yupaychanaykupaj,+may kusisqa qanta jatunchasunaykupaj.+
36 Israelpa Diosnin Jehovaqa jatunchasqa kachun,wiñaypaj wiñaynintinpaj’, nispa”.
Tukuy runastaj “amén”* nerqanku. Jehová Diostataj jatuncharqanku.
37 Chantá Davidqa Asaftawan+ hermanosnintawan Jehová Diospa trato ruwasqan arcaj ñaupaqenpi saqerqa, chay arcaj ñaupaqenpi sirvispa kanankupaj,+ sapa día imatachus ruwana kasqanta ruwanankupaj.+
38 Saqellarqataj Obed-Edomta, hermanosnintawan khuska, tukuyninku 68 karqanku. Chantá punkuta qhawanankupaj churarqa Jedutunpa wawan Obed-Edomta, Hosatawan.
39 Sacerdote Sadoctaj,+ waj sacerdote hermanosninwan Jehová Diospa toldo wasinpa ñaupaqenpi, Gabaonpa pata lugarninpi+ kasharqanku,
40 ofrenda qʼolachina altarpi Jehová Diosman qʼolachina ofrendasta jaywanankupaj, tutamanta jinallataj tardenpis mana faltayta, chantapis Leypi tukuy ima qhelqasqa kasqanta juntʼanankupaj, mayqentachus Jehová Dios israelitasman qorqa chayta.+
41 Paykunawantaj kasharqanku Hemán, Jedutún,+ waj ajllasqa runas ima Jehová Diosman graciasta qonankupaj,+ “munakuynin wiñaypaj kasqanrayku”.+
42 Paykunawanqa kasharqanku Hemanwan+ Jedutunwan, cornetasta waqachinankupaj, platillosta tocanankupaj, mayqen tocanaswanchus cheqa Diosta yupaychaj kanku chaykunatawan tocanankupaj. Jedutunpa+ wawasnintaj punkuta qhawanamanta cargoyoj karqanku.
43 Chantá tukuy runasqa wasisninkuman riporqanku, Davidtaj wasinmanta kajkunata bendecimoj rerqa.
Sutʼinchaykunasnin
^ Chayri “ruphachina”.
^ Chayri “carpa wasita”.
^ Glosariopi cheqa Dios nisqata leeriy.
^ Hebreo parlaypeqa nin, “yuyarinankupaj”.
^ Chayri “tocapuychej”.
^ Ichá nillanmantaj “Tukuynin sumaj ruwasqasninmanta parlaychej”.
^ Uj aylloqa uj familiamanta miraj ashkha familias kanku.
^ Chayri “Santo ropasta”.
^ Ichá nillanmantaj “Santo kaynin lliphipirisqanrayku”.
^ Chayri “Jehová Diosta yupaychaychej”.
^ Chayri “jamun”.
^ Hebreo parlaypeqa niyta munan mana tukukoj munakuy, mana tukukoj kʼacha kay. Glosariopi mana tukukoj munakuy nisqata leeriy.
^ Chayri “ajina kachun”.
