1 Crónicas 19:1-19
19 Aswan qhepatataj ammonitaspa reyninku Nahás wañuporqa, wawantaj paypa cuentanmanta rey jina kamachiyta qallarerqa.+
2 Chayrayku Davidqa nerqa: “Nahasqa noqata khuyakuwarqa,+ chayrayku noqapis wawan Hanunta khuyakullasajtaj”, nispa. Ajinamanta Davidqa Hanunpaman kamachisninta kacharqa tatan wañupusqanmanta sonqocharimunankupaj. Davidpa kamachisnin ammonitaspa+ nacionninkuman chayajtinkutaj,
3 ammonitaspa kuraj kamachejkunasnenqa Hanunta nerqanku: “¿Yuyankichu Davidqa tataykita jatunpaj qhawaspa kamachisninta kachamusqanta qanta sonqochasunankupaj? ¿Nichu kay runasqa wateqajlla jamuwanchej? ¿Nichu nacionninchejta japʼikapuyta munaspalla qhawaykachaj jamunku?”, nispa.
4 Hanuntaj Davidpa kachamusqan runasta japʼispa barbasninkuta* rasurarparqa,+ ropasninkutapis khuskanmanta kʼutorqa siki patasninkukama, chantá kachaporqa.
5 Rey Davidmantaj willarqanku imastachus kamachisninta ruwasqankuta. Chay jina pʼenqayta ruwasqankurayku, Davidqa chay ratopacha runasta kacharqa taripamuspa ninankupaj: “Jericó llajtapi+ quedakuychej barbaykichej wiñanankama, chantá jampullankichej”, nispa.
6 Tiemponmantaj ammonitasqa reparakorqanku Davidwan chejnichikusqankuta.* Chayrayku Hanunwan ammonitaswanqa Mesopotamiamanta,* Aram-Maacamanta, Zobamantawan+ contratarqanku carretasta, caballospi purej soldadostawan, chaypajtaj apacherqanku 34.200 kilos* qolqe metalta.
7 Contratarqankutaj 32.000 carretasta, Maacamanta reyta, soldadosnintapis. Chantá Medebaman+ chayarqanku, chaypitaj toldosninkuta* sayacherqanku. Ammonitaspis llajtasninkumanta llojsimuspa guerrapaj tantakorqanku.
8 Davidtaj chayta yachaspa Joabta+ kacharqa tukuynin soldadostawan, aswan wapu soldadosnintinta.+
9 Ammonitastaj llojsimuspa maqanakunankupaj listos sayaykorqanku llajtankuman yaykuna punkupi, jamorqanku chay reyestaj waj ladopi sapallanku sayasharqanku pampanejpi.
10 Joabqa rikorqa may chhika soldadosta, ñaupaqenmantataj qhepanmantataj paywan maqanakoj jamushasqankuta. Chayrayku Israelmanta wakin sumaj soldadosta ajllarqa, sayaykucherqataj sirioswan maqanakunankupaj.+
11 Chay wakin soldadostataj hermanon Abisaijpa+ mandonman* churarqa, maqanakupaj listos kanankupaj, ammonitaswantaj tinkunankupaj.
12 Chantá Abisaita nerqa: “Sichus siriosta+ mana atipayta atisajchu chayqa, jamuspa yanapawanki. Sitajchus ammonitasta mana atipayta atiwajchu chayqa, noqa yanapasqayki.
13 Noqanchejqa nacionninchejrayku, Diosninchejpa llajtasninrayku wapus kananchej tiyan, manataj manchachikunanchejchu tiyan.+ Jehová Diostaj imachus allin rijchʼasqanta ruwanqa”, nispa.
14 Chantá Joabwan soldadosninwanqa kachaykukorqanku sirioswan maqanakoj, siriostaj paymanta ayqekorqanku.+
15 Ammonitasqa sirio soldados ayqekushasqankuta rikuspa paykunapis Joabpa hermanon Abisaimanta ayqekullarqankutaj, llajtankumantaj yaykuporqanku. Chaymanta Joabqa Jerusalenman kutiporqa.
16 Siriosqa israelitaswan atipachikusqankuta reparaspa, runasta kacharqanku wajyamunankupaj Mayu*+ chaynejpi kasharqanku chay sirio soldadosta. Chay soldadospa kamachejninkoqa Sofac karqa, payqa Hadadezerpa soldadosninpa comandanten karqa.+
17 Davidman chayta willajtinkutaj, Davidqa chay ratopacha Israelmanta tukuynin ejercitonta tantaykuspa Jordán mayuta chimparqa. Chantá chay sirio soldados kasharqanku chaynejman chayaspataj paykunawan maqanakunankupaj sayaykorqanku. Davidqa sirioswan maqanakunanpaj sayaykorqa, siriostaj paywan maqanakorqanku.+
18 Siriosqa israelitaswan atipachikushasqankuta reparaspa ayqekorqanku. Davidtaj wañucherqa carretaspi purejkunamanta 7.000 soldadosta, chakipi purejkunamantataj 40.000 soldadosta. Wañuchillarqataj chay soldadospa comandanten Sofactapis.
19 Hadadezerpa kamachisnenqa israelitaswan atipachikusqankuta rikuspa,+ chay ratopacha Davidwan uj tratota ruwarqanku manaña maqanakunankupaj, chantá Davidpa kamachisninman tukorqanku.+ Chaymantapacha siriosqa manaña ammonitasta yanapayta munarqankuchu.
Sutʼinchaykunasnin
^ Barba: waj lugarespi ninku chhunka, sunkha.
^ Chayri “Davidpaj millachikuna kasqankuta”.
^ Hebreo parlaypeqa nin, “Aram-Naharaimmanta”.
^ Hebreo parlaypeqa nin, “1.000 talentos”. Uj talentoqa pesarqa 34,2 kilos (1.101 onzas troy). Yanapa B14 nisqata leeriy.
^ Chayri “carpasninkuta”.
^ Hebreo parlaypeqa nin, “makinman”.
^ Mayu nispaqa Éufrates mayumanta parlashan.
