1 Reyes 9:1-28
9 Salomonqa ruwayta tukucharqa Jehová Diospa wasinta, reypa wasinta,*+ imatachá ruwayta munarqa chay tukuy imastawan.+ Chayta ruwayta tukusqantawan
2 Jehová Diosqa Salomonman ujtawan rikhurillarqataj, imaynatachus Gabaonpi rikhurerqa ajinata.+ Chaywanqa iskay kutitaña Salomonman rikhurisharqa.
3 Jehová Diosqa Salomonta nerqa: “Uyarini ñaupaqeypi mañakuwasqaykita, khuyakusunayta mañakuwasqaykitapis. Chay ruwasqayki wasitaqa noqapaj tʼaqakuni, chay wasimanqa sutiyta churani chaypi kanallanpajpuni.+ Chay wasitaqa sumajta qhawamusaj, allintataj cuidasaj.+
4 Qanrí Salomón, sichus tatayki David jina ñaupaqeypi llimphu sonqowan purinki,+ maychus kajta purinki,+ tukuy kamachisusqayman jina,+ kasukunkitaj leyesniyta, juiciopi nisqasniytapis chayqa,+
5 kamachina tiyanaykita sumajta sayachisaj Israelta wiñaypaj kamachinaykipaj, imaynatachus tatayki Davidman nerqani ajinata. Noqa payman nerqani: ‘Israelpa kamachina tiyananpeqa, qanpa mirayniykimanta kajkunapuni tiyaykonqanku kamachinankupaj’,+ nispa.
6 Sitajchus qankuna, wawasniykichejpis niña kasuwankichejmanchu, nitaj kasuwajchejchu kamachiykunasniyta, ni qankunaman qosqay leyesniytapis, waj diosesta yupaychaspataj qonqorikuwajchej chayqa,+
7 Israelta chinkarparichisaj mayqen jallpʼatachus qorqani chaymanta.+ Sutiypaj tʼaqakorqani chay wasitapis niña ujtawan rikunaypaj ñaupaqeymanta chinkarparichisaj.+ Tukuy nacionestaj Israelta asipayanqanku, burlakonqankutaj.+
8 Chay wasipis rumi montonllaña kanqa.+ Chayninta tukuy pasajkunataj tʼukuspa qhawanqanku, asikuspataj nenqanku: ‘Wá, ¿imajtintaj Jehová Dios kay jinata ruwaykun kay naciontari, kay wasitapisri?’,+ nispa.
9 Chantá kutichenqanku: ‘Kayqa ajina kashan paykuna Jehová Diosninkuta saqerparisqankurayku. Diosninkoqa ñaupa tatasninkuta Egiptomanta orqhomorqa. Paykunataj waj diosesman kʼaskakorqanku, chay diosesmantaj qonqorikorqanku, yupaycharqankutaj. Chayrayku Jehová Diosqa kay jina llakiyta paykunaman apachimun’,+ nispa”.
10 Salomonqa 20 wataspi chay iskaynin wasista ruwayta tukucharqa: Jehová Diospa wasinta, reypa wasintawan.+ Chay wataspitaj
11 Tiromanta rey Hiramqa+ Salomonman qorqa cedro maderasta, enebro maderasta, ashkha qorita, may chhikatachá munarqa chay chhikata.+ Salomontaj Hiramman qorqa 20 llajtasta Galilea jallpʼaspi.
12 Rey Hiramtaj Tiromanta jamorqa Salomón qorqa chay llajtasta qhawarej, nitaj chay llajtasqa allinchu rijchʼarqa.
13 Nerqataj: “Hermanóy, ¿imapajtaj kay jina llajtasta qowankiri?”, nispa. Chayrayku chay llajtastaqa kunankama Cabul Jallpʼas* nispa sutichanku.
14 Chantá rey Hiramqa Salomonman apacherqa qorita 4.104 kilosta.*+
15 Kaypi willashan rey Salomonqa runasta paypaj trabajanankupaj tantasqanta,+ ruwachinanpaj Jehová Diospa wasinta,+ paypa wasintapis, ruwachillarqataj Lomata,*+ Jerusalén llajtaj perqasninta, Hazorta,+ Meguidota,+ Guezertawan.+
16 (Rey faraonqa* Egiptomanta jamuspa Guézer llajtata japʼikapusqa, ninawantaj ruphaykuchisqa, chay llajtapi tiyakoj cananeostapis+ wañuchisqa. Chay llajtataqa warmi wawanman qopusqa+ kacharpayashaspa,* chay wawantaj Salomonpa warmin karqa).
17 Ajinamanta Salomonqa Guézer llajtata watejmanta sayaricherqa, chantá sayarichillarqataj: Ura Bet-Horón llajtata,+
18 Baalat llajtata,+ chʼin jallpʼapi Tamar llajtata, chayqa karqa Israelpa japʼiyninpi.
19 Chantá Salomonqa sayarichillarqataj mikhuykunasta jallchʼananpaj tukuynin llajtasta, carretasninta sayachinanpaj llajtasta,+ caballospi purejkunapaj llajtasta, imatachá Jerusalenpi Salomón ruwayta munarqa chay tukuy imastapis, Líbano orqospipis, jinallataj tukuynin kamachisqan jallpʼaspipis.
20 Chay jallpʼaspi puchojkunaqa karqanku: amorreos, hititas, perizitas, heveos, jebuseos,+ paykunaqa mana Israel nacionmantachu karqanku.+
21 Paykunaj wawasninkoqa chay jallpʼaspi puchorqanku, chaykunatataj Salomonqa apamorqa esclavosta jina sinchʼita trabajachinanpaj, kunankamapis esclavosllapuni kanku.+ Chay runastaqa israelitas mana chinkachiyta atisqankuchu.
22 Salomonqa ni mayqen israelitatapis esclavoman tukucherqachu.+ Israelitasqa soldadosnin karqanku, yanapajkunasnin, kuraj kamachejkunasnin, capitanesnin, carretasta apajkunajta, jinallataj caballospi purejkunajta kamachejkunasnin.
23 Kallarqataj 550 encargadosninpa kamachejkunasnin, chay kamachejkunaqa Salomonpa tukuy ima ruwachisqanta qhawaj kanku, paykunaqa trabajadorespa capatazkunasnin karqanku.+
24 Faraonpa warmi wawanqa+ Davidpa Llajtanmanta+ wasinman jamporqa, mayqentachus Salomón ruwachiporqa chayman. Chantá Salomonqa ruwallarqataj Lomata.*+
25 Salomonqa watapi kinsa kutita+ Diospaj uywasta qʼolachej,* khuska mikhurikuy ofrendastapis altar patapi jaywaj, Jehová Diospaj ruwarqa chay altarpi.+ Chantapis altar patapi qʼoshñichispa ofrendasta jaywallajtaj, chay altarqa Jehová Diospa ñaupaqenpi kasharqa. Ajinata Salomonqa wasita tukucharqa.+
26 Chantá rey Salomonqa ruwallarqataj ashkha barcosta Ezión-Gueberpi,+ chayqa kashan Elot qayllapi, Puka mar qocha kantupi, chaytaj Edom jallpʼaspi kashan.+
27 Rey Hiramqa chay barcospi kamachisninta kachaj,+ mar qochapi puriyman yachasqa kajkunata, Salomonpa kamachisninwan khuska trabajanankupaj.
28 Paykunataj Ofirman+ rispa qorita apamorqanku 14.364 kilosta,* chay qoritataj rey Salomonman jaywarqanku.
Sutʼinchaykunasnin
^ Chayri “kamachina wasinta”.
^ Ichá nillanmantaj “ni imapaj valej jallpʼas”.
^ Hebreo parlaypeqa nin, “120 talentosta”. Uj talentoqa pesarqa 34,2 kilos (1.101 onzas troy). Yanapa B14 nisqata leeriy.
^ Faraonqa mana sutichu, manaqa Egiptomanta reyesta faraón nej kanku.
^ Chayri “qopusqa casamiento regalota jina”.
^ Chayri “ruphachej”.
^ Hebreo parlaypeqa nin, “420 talentosta”.
