2 Crónicas 1:1-17
1 Davidpa wawan Salomonpa gobiernonqa aswan sinchʼita sayarqa. Salomonpa Diosnin Jehovaqa paywanpuni kasharqa, chayrayku manchay atiyniyojman tukorqa.+
2 Salomonqa tukuynin Israelta tantacherqa, waranqa runasta kamachejkunata, pachaj runasta kamachejkunata, juecesta, Israelmanta tukuynin kamachejkunatawan, nisunman sapa familiamanta umas kajkunata.
3 Chantá Salomonqa tukuynin tantasqa runaswan khuska rerqa Gabaonpi karqa chay pata lugarman.+ Chay lugarpi kasharqa cheqa Dioswan* tinkukuna toldo, mayqentachus Jehová Diospa kamachin Moisés chʼin pampapi ruwarqa chay.
4 Davidqa aswan ñaupajtaña cheqa Diospa arcanta Quiryat-Jearimmanta+ apamorqa wakichisqan lugarman. Davidqa Diospa arcanpaj uj toldo wasita Jerusalenpi ruwaporqa.+
5 Bezalelpa ruwasqan cobre altartaqa*+ Jehová Diospa toldonpa ñaupaqenman churarqanku. Bezalelqa+ Urijpa wawan karqa, Hurpa allchhintaj. Salomonwan tukuynin tantasqa israelitaswanqa chay altarpa ñaupaqenpi Diosmanta mañakoj kanku.*
6 Chantá Salomonqa chaypi jaywanasta jaywarqa Jehová Diospa ñaupaqenpi. Salomonqa tinkukuna toldo wasej cobre altarninpi waranqa uywasta qʼolacherqa.*+
7 Chay chʼisintaj Diosqa Salomonman rikhurispa nerqa: “Imatachus qosunayta munanki chayta mañakuway”,+ nispa.
8 Salomontaj Diosta nerqa: “Diosníy, qanmin tatay Davidta maytapuni munakorqanki,*+ kunantaj paypa cuentanmanta noqata churawanki rey kanaypaj.+
9 Kunanqa Jehová Diosníy, imatachus tatay Davidman nisqayki juntʼakuchun ari.+ Qanmin rey kanaypaj churawanki kay chhika tʼiyu jina mana yupay atina runasta kamachinaypaj.+
10 Diosníy, allin yuyayta qoway, yachaytapis+ kay nacionta allinta kamachinaypaj. ¿Imaynatataj kay jina jatun nacionniykita noqallamanta juzgayta atiymanri?”,+ nispa.
11 Diostaj Salomonta nerqa: “Chaytaqa sonqomantapacha mañakuwanki. Manataj mañakuwankichu ni qhapaj kayta, ni kapuyniyoj kayta, ni respetasqa kayta, ni enemigosniykej wañuyninta, nitaj unayta kausakuytapis. Astawanqa mañakuwanki allin yuyayta, yachaytawan nacionniyta juzganaykipaj, noqamin chay nacionniypa reynin kanaykipaj churarqayki.+
12 Chayrayku allin yuyayta qosqayki, yachaytapis. Mana chayllachu, qhapajyachisqayki, kapuyniyojman tukuchisqayki, respetasqataj kanki. Qan jina reyqa mana aswan ñaupajta karqachu, nitaj aswan qhepamanpis kanqachu”,+ nispa.
13 Salomonqa Gabaonpa pata lugarninmanta,+ Dioswan tinkukuna toldoj ñaupaqenmanta Jerusalenman kutiporqa, Israel naciontataj kamacherqa.
14 Salomonqa carretasta, caballostapis* ashkhata tantallarqapuni. Paypataqa tiyaporqa 1.400 carretasnin, 12.000 caballosnin.*+ Chaykunatataj sayachej carretasta sayachinapaj llajtaspi,+ jinallataj Jerusalenpi, rey tiyakoj chay qayllapi.+
15 Rey Salomonqa Jerusalenpi qoritapis, qolqe metaltapis ashkhata tantarqa, rumita jinapuni.+ Cedro maderastapis ashkhata tantarqa, Sefelapi higo sachʼasta jinapuni.+
16 Salomonqa Egiptomantapacha caballosninta apachimoj.+ Reypa rantidoresnenqa caballosta tropasta rantej kanku,* maychus precionpi.+
17 Egiptomanta rantichisqan carretasqa, sapa uj valej 600 qolqes,* caballostaj sapa uj valej 150 qolqes.* Chaykunatataj vendej kanku hititaspa tukuynin reyesninkuman, jinallataj Siriamanta reyesmanpis.
Sutʼinchaykunasnin
^ Glosariopi cheqa Dios nisqata leeriy.
^ Chayri “chaypi Diosta tapukoj kanku”.
^ Chayri “ruphacherqa”.
^ Hebreo parlaypeqa niyta munan mana tukukoj munakuy, mana tukukoj kʼacha kay. Glosariopi mana tukukoj munakuy nisqata leeriy.
^ Chayri “caballospi purej runastapis”.
^ Chayri “caballospi purej runasnin”.
^ Ichá nillanmantaj “Egiptomantapacha, Coamantapacha apachimoj. Reypa rantidoresnenqa rantej kanku Coapi”. Coa nispaqa ichapis Ciliciamanta parlashan.
^ Chay qolqesqa qolqe metalmanta ruwasqa karqa.
^ Chay qolqesqa qolqe metalmanta ruwasqa karqa.
