2 Crónicas 22:1-12
22 Chantá Jerusalenmanta runasqa Jehorampa sullkʼa wawan Ocoziasta reyninku kananpaj churarqanku, tatanpa cuentanmanta. Suwa tropasqa arabeswan khuska campamentoman* jamuspa Jehorampa tukuynin kuraj wawasninta wañuracherqanku.+ Ajinamanta Jehorampa sullkʼa wawan Ocozías rey jina kamachiyta qallarerqa Judá nacionpi.+
2 Ocoziasqa 22 watasniyoj kasharqa rey jina kamachiyta qallarishaspa, Jerusalenpitaj uj watata kamacherqa. Mamanpa sutenqa Atalía+ karqa, Ataliaqa Omrij+ allchhin* karqa.
3 Ocoziasqa Achabpa*+ familian jinallataj sajra imasta ruwarqa, mamanpuni sajra imasta ruwananpaj yuyaychasqanrayku.
4 Ocoziasqa Jehová Diospa qhawayninpi millay imasta ruwarqa Achabpa familian jina. Tatan wañupusqanmantapacha paykuna Ocoziasta yuyaychaj kanku, chaytaj Ocoziasta wañuyman aparqa.
5 Paykunaj yuyaychasqankuta kasuspa Ocoziasqa maqanakuman rerqa Israelpa reynin Achabpa wawan Jehoramwan khuska. Paykunaqa Siriaj reynin Hazaelwan+ maqanakoj rerqanku Ramot-Galaadman.+ Chaypitaj Jehoramta flechawan japʼirpacherqanku.
6 Jehoramtaj Jezreelman+ kutiporqa chay nanasqasninmanta sanoyapunanpaj. Paytaqa Ramapi flechawan japʼirpachisqanku Siriamanta rey Hazaelpa contranta maqanakushajtin.+
Judamanta rey Jehorampa+ wawan Ocoziastaj* Jezreelman uraykorqa Achabpa wawan Jehoramta+ watukoj onqosqa kasqanrayku.+
7 Diosqa Ocoziasta wañuyman chayacherqa Jehoramta watukoj risqanpi. Ocoziasqa Jezreelman chayaytawan Jehoramwan khuska llojsimorqa, Nimsij allchhin* Jehuwan+ tinkunankupaj. Jehová Diosqa Jehuta ajllarqaña Achabpa familianta tukuchinanpaj.+
8 Jehuqa Achabpa familianta tukuchiyta qallarishajtin tarerqa Judamanta kuraj kamachejkunata, Ocoziaspa hermanosninpa wawasninkutawan, paykunaqa Ocoziaspa kamachisnin karqanku. Jehutaj paykunata wañucherqa.+
9 Chantá Ocoziasta maskʼacherqa. Jehujpa kamachisnenqa Ocoziasta Samariapi pakakushajtin tarerqanku, Jehujpa ñaupaqenman apamuspataj wañucherqanku. Paykunaqa nerqanku: “Jehosafatqa Jehová Diosta tukuy sonqo sirverqa, kaytaj Jehosafatpa allchhin”,+ nispa. Chayrayku Ocoziasta pʼamparqanku.+ Ocoziaspa familianmantaqa manaña pipis karqachu rey jina kamachinanpaj.
10 Ataliaqa+ wawan Ocozías wañusqanta yachaspa, sayarispa Judamanta reypa tukuynin wawasninta wañuracherqa.+
11 Reypa warmi wawan Jehosabeattaj Ocoziaspa wawan Jehoasta+ pakayllamanta apakaporqa reypa wawasnin chaupimanta, pikunachus wañuchisqa kananku kasharqa chaykuna chaupimanta. Chay wawataqa wawerantawan khuska uj cuartoman apaykorqa. Jehosabeatqa rey Jehorampa+ wawan karqa (payqa sacerdote Jehoiadaj+ warmin karqa, Ocoziaspa hermanantaj). Jehosabeatqa chay wawata Ataliamanta pakasqata japʼerqa, nitaj Ataliaqa chay wawata wañucherqachu.+
12 Ajinata chay wawaqa sojta watasta paykunawan khuska pakasqa kakorqa cheqa Diospa* wasinpi. Chay wataspeqa Atalía Judá nacionta kamachisharqa.
Sutʼinchaykunasnin
^ Campamentoqa ashkha toldo wasis.
^ Hebreo parlaypeqa nin, “wawan”.
^ Wakin unay hebreo qhelqasqaspi nin, “Azarías”.
^ Hebreo parlaypeqa nin, “wawan”.
^ Glosariopi cheqa Dios nisqata leeriy.
