2 Crónicas 23:1-21
23 Qanchis kaj watapitaj Jehoiadaqa mana manchachikuspa uj tratota ruwarqa sapa pachaj runaspa kamachejninkuwan,+ nisunman Jerohampa wawan Azariaswan, Jehohananpa wawan Ismaelwan, Obedpa wawan Azariaswan, Adayaj wawan Maaseyawan, Zicrij wawan Elisafatwan ima.
2 Chantá paykunaqa tukuynin Judá nacionta purimuspa levitasta tantarqanku+ Judaj tukuynin llajtasninmanta. Tantallarqankutaj Israel familiasmanta uma kajkunata. Jerusalenman chayamojtinkutaj
3 chay tukuynin tantasqa runasqa cheqa Diospa* wasinpi reywan uj tratota ruwarqanku.+ Chantá Jehoiadaqa paykunata nerqa:
“Jehová Diosqa nerqaña Davidpa wawasnin kamachinankuta, chayrayku kunanqa reypa wawan kamachenqa.+
4 Kayta ruwankichej: Samarikuna pʼunchaypi turnoyoj kaj sacerdotespis levitaspis kinsa gruposman tʼaqakunkichej,+ ujnin grupoqa punkuta qhawankichej.+
5 Ujnin grupotaj reypa wasinpi*+ kankichej, chay ujnin grupotaj Cimiento Punku nisqapi kankichej. Tukuy runastaj Jehová Diospa wasi patiosninpi+ kanqanku.
6 Ama ni pita Jehová Diospa wasinman yaykuchinkichejchu. Turnoyoj sacerdotesta, levitasllatawan+ yaykuchinkichej. Paykunaqa Diospaj tʼaqasqa kasqankurayku yaykuyta atillanqanku, tukuy runastaj Jehová Diospaj imatachus ruwanankuta jawapi sayakuspalla juntʼanqanku.
7 Levitasqa reyta muyuykunkichej, sapa ujniykichej armasniykichej japʼirisqa. Pillapis wasiman yaykumojtenqa wañuchinkichej. Qankunaqa reyllawanpuni kanaykichej tiyan mayman rejtinpis”, nispa.
8 Levitaspis Judamanta tukuy runaspis sacerdote Jehoiadaj kamachisqanman jinapuni ruwarqanku. Sapa ujninkutaj mandonpi kasharqanku chay runasta pusamorqanku, samarikuna pʼunchaypi turnoyoj kajkunata, mana turnoyoj kajkunatapis.+ Sacerdote Jehoiadaqa mana ni mayqen grupotapis turnonkumanta ripojta saqerqachu.+
9 Chantá sacerdote Jehoiadaqa sapa pachaj runasta kamachejkunaman+ qorqa tʼojsina lanzasta, juchʼuy escudosta, muyu escudostapis, mayqenkunachus rey Davidpata karqa,+ cheqa Diospa wasinpitaj kasharqa chaykunata.+
10 Sacerdote Jehoiadaqa tukuy runasta sayacherqa armasninku japʼirisqata, wasej paña ladonmantapacha wasej lloqʼe ladonkama, altar qayllapi, wasi qayllapi, reypa muyuynintinpi.
11 Chantá paykunaqa reypa wawan Jehoasta orqhomorqanku,+ umanmantaj coronata churaykorqanku, qhelqasqa Leytawan,*+ rey kananpajtaj churarqanku. Jehoiadawan wawasninwantaj Jehoasta aceitewan jichʼarqanku. Chantá qhaparerqanku: “Jallalla rey”, nispa.+
12 Ataliataj uyarerqa runas correshasqankuta, reytapis alabashasqankuta, chayrayku payqa chay ratopacha Jehová Diospa wasinman rerqa, runas kasharqanku chayman.+
13 Reytataj rikorqa pilarpa* ladonpi sayashajta, yaykunapi sayashajta. Kuraj kamachejkunapis+ cornetasta waqachejkunapis reywan khuska kasharqanku. Nacionnintinmanta tukuy runas maytapuni kusikusharqanku,+ cornetastapis waqachisharqanku. Tocanasniyoj takejkunapis alabanzasta takichisharqanku.* Chay ratopacha Ataliaqa ropanta llikʼirakuspa qhaparerqa: “¡Contrayta oqharikunku! ¡Contrayta oqharikunku!”, nispa.
14 Sacerdote Jehoiadataj sapa pachaj runaspa kamachejkunasninkuta llojsichimorqa, pikunachus soldadospa capitanesnin karqanku chaykunata, kay jinata nispa: “Chay warmita orqhoychej soldadospa chaupinkumanta, pillapis payta jarkʼakojtaqa espadawan wañuchinkichej”, nispa. Sacerdoteqa paykunata nisqaña: “Ama paytaqa Jehová Diospa wasinpi wañuchinkichejchu”, nispa.
15 Chantá Ataliata japʼerqanku, reypa wasinman Caballos Punkuman chayachispataj wañurpacherqanku.
16 Chantá Jehoiadaqa uj tratota ruwarqa tukuynin runaswan jinallataj reywanpis. Chay tratota ruwaspataj nerqanku Jehová Diospa kamachisnillanpuni kanankuta.+
17 Chaymanta tukuy runasqa Baalpa templonman rispa qʼalata urmaykucherqanku,+ altaresnintapis Baal santostapis phirillarqankutaj.+ Chay altarespa ñaupaqenpitaj Baalpa sacerdoten Matanta wañucherqanku.+
18 Chantá Jehoiadaqa sacerdotesta, levitastawan kamacherqa Jehová Diospa wasinta qhawanankuta. Paykunataqa Davidña churarqa grupo gruposta Jehová Diospa wasinpi sirvinankupaj, Jehová Diospaj jaywanasta qʼolachispa,*+ Moisespa Leyninpi qhelqasqa kasqanman jina,+ kusisqas, takirispataj, David kamachisqanman jina.
19 Chantá Jehová Diospa wasi punkusninman punku qhawajkunata+ churarqa, ama pi runapis chʼichipaj qhawasqa kashaspa yaykunanpaj.
20 Chantá Jehoiadaqa tantacherqa sapa pachaj runaspa kamachejkunasninta,+ kamachejkunata, llajtasmanta kamachejkunata, nacionnintinmanta tukuy runastawan. Chantá reyta cuidaspa paywan khuska uraykamorqa, Jehová Diospa wasinmanta. Chantá pata punkunta pasaspa reypa wasinman rerqanku, reytataj gobiernoj kamachina tiyananman tiyaykucherqanku.+
21 Nacionnintinmanta tukuy runas maytapuni kusikorqanku, llajtapipis allin kausay karqa, Ataliata espadawan wañuchisqankurayku.
Sutʼinchaykunasnin
^ Glosariopi cheqa Dios nisqata leeriy.
^ Chayri “kamachina wasinpi”.
^ Chayri “qhelqasqa Leytawan jaywarqanku”.
^ Hebreo parlaypeqa nin, “pilarninpa”.
^ Chayri “takinankupaj señalta qosharqanku”.
^ Chayri “ruphachispa”.
