2 Crónicas 30:1-27
-
Ezequías Pascuata ruwan (1-27)
30 Ezequiasqa tukuynin Israelmanta kajkunata, tukuynin Judamanta kajkunatapis wajyachimorqa,+ cartastapis apacherqa Efraín jallpʼaspi kajkunaman, Manasés+ jallpʼaspi kajkunamanpis, Jerusalenman jamunankupaj Jehová Diospa wasinman, chaypi Israelpa Diosnin Jehovapaj Pascuata ruwanankupaj.+
2 Jinapis reywan, kuraj kamachisninwan, Jerusalenmanta tukuy runaswanpis iskay kaj killapi Pascuata ruwanankuta nerqanku.+
3 Pisi sacerdoteslla llimphuchakusqanku,+ runaspis mana Jerusalenpi tantakamusqankuchu, chayrayku Pascuata mana ruwayta aterqankuchu ima diachus ruwaj kanku chay diapi.+
4 Chay parlasqankoqa reymanpis tukuynin tantasqa runasmanpis allin rijchʼarqa.
5 Chayrayku tukuynin Israelman chayta willachinankuta nerqanku Beer-Sebamantapacha Dankama,+ Jerusalenman jamunankupaj Israelpa Diosnin Jehovapaj Pascuata ruwaj. Imajtinchus ñaupajpeqa mana ajinata tantakuspachu ruwasqanku, leypi kamachisqa kasqanman jina.+
6 Chay kachasqa runasqa tukuy Israelman, tukuy Judamanpis rerqanku reypa, jinallataj kuraj kamachisninpa cartasninkuta apaspa, rey kamachisqanman jinataj nisharqanku: “Israelmanta runas, Jehová Diosman kutirikuychej, Abrahanpa, Isaacpa, Israelpa Diosninman, paytaj qankunaman kutirikamonqa Asiriaj reyesninmanta ayqekorqankichej chay puchojkunaman.+
7 Ama ñaupa tatasniykichej jinaqa kaychejchu, nillataj hermanosniykichej jinaqa. Paykunaqa ñaupa tatasninkoj Diosninku Jehovaj contranta juchallikorqanku. Chayrayku Diosqa paykunaman ñakʼariyta apachimorqa, chayta rikojkuna, uyarejkunapis mancharikorqanku, chaytaqa qankunapis ñawisniykichejwan rikushankichej.+
8 Kunanqa ama ñaupa tatasniykichej jina kʼullu runas* kaychejchu.+ Jehová Diospa kamachiyninman churakuychej, wasinmantaj jamuychej,+ chay wasita Diosqa wiñaypaj tʼaqakun. Jehová Diosniykichejta sirviychej, ajinamanta payqa manaña qankunapaj phiñasqachu kanqa.+
9 Jehová Diosman kutirikojtiykichejqa, hermanosniykichejta wawasniykichejtapis presosta jina japʼishanku chay runasqa paykunata khuyakonqanku,+ kay nacionman kutinpojtataj saqenqanku,+ Jehová Diosniykichej khuyakoj kasqanrayku, kʼacha sonqoyojtaj* kasqanrayku.+ Nitaj payqa wijchʼusonqachejchu payman kutirikojtiykichejqa”,+ nispa.
10 Chay kachasqa runastaj rerqanku llajtamanta llajta tukuynin Efraín jallpʼasman, Manasés jallpʼasmanpis,+ Zabulón jallpʼasmanpis chayarqanku. Runastajrí chay kachasqa runasmanta asikuspa burlakorqanku.+
11 Jinapis wakin runas Asermanta, Manasesmanta, Zabulonmantapis sonqonkuta wawayacherqanku, Jerusalenmantaj jamorqanku.+
12 Cheqa Diosqa* Judá naciontapis bendicerqa ujchasqa kanankupaj,* ajinamanta kasukunankupaj reypa kamachisqanta, kuraj kamachejkunaj nisqankutawan, Jehová Dios kamachisqanman jina.
13 May chhika runas Jerusalenpi tantakorqanku iskay kaj killapi+ Mana Levadurayoj Tʼanta Fiestata+ ruwanankupaj. May chhika runaspuni tantasqa kasharqanku.
14 Paykunaqa Jerusalenpi karqa chay tukuynin altaresta orqhorqanku,+ inciensota qʼoshñichinapaj altarestapis orqhollarqankutaj,+ chantá Cedrón wayqʼoman wijchʼuykamorqanku.
15 Chantá 14 pʼunchaypi chay iskay kaj killapi Pascuapaj uywasta ñakʼarqanku.* Sacerdoteswan levitaswantaj pʼenqakuspa llimphuchakorqanku, qʼolachina* ofrendastapis Jehová Diospa wasinman apamorqanku.
16 Yachasqa kasqankuman jinataj puestosninkuman rerqanku, cheqa Diospa kamachin Moisespa Leyninpi nisqanman jina. Sacerdotestaj chʼajchorqanku levitas jaywarqanku chay yawarta.+
17 Tantasqa kasharqanku chay runasmanta ashkha runasqa mana llimphuchakusqankuchu, levitastaj chay mana llimphuchasqa runaspaj Pascua uywasta ñakʼasharqanku,+ Jehová Diospa ñaupaqenpi llimphuchasqa kanankupaj.
18 Ashkha runaspuni mana llimphuchakusqankuchu, astawanqa Efrainmanta kajkuna, Manasesmanta kajkuna,+ Isacarmanta kajkuna, Zabulonmanta kajkunapis. Ajinapis Pascua mikhunata mikhorqanku, leypi nisqanta mana kasuspa. Ezequiastaj paykunapaj Diosmanta mañaporqa, kay jinata nispa: “Jehová Diosqa kʼacha kasqanrayku+ khuyakuchun,
19 pikunachus sonqonkuta wakicherqanku cheqa Dios Jehovata sirvinankupaj,+ ñaupa tatasninkoj Diosninta sirvinankupaj chaykunata. Diosqa paykunata khuyakuchun ley nisqanman jina fiestapaj mana llimphuchasqa kajtinkupis”,+ nispa.
20 Jehová Diostaj Ezequiasta uyarispa runasta perdonarqa.
21 Chayrayku Jerusalenpi kasharqanku chay israelitasqa Mana Levadurayoj Tʼanta Fiestata+ manchay kusisqa+ ruwarqanku qanchis pʼunchaykunata. Levitaswan sacerdoteswanqa sapa día Jehová Diosta alabarqanku, tocanasninkuta Jehová Diospaj sinchʼita tocaspa.+
22 Chantapis Ezequiasqa parlaspa kallpacharqa tukuynin levitasta, paykunaqa allin yachaywan Jehová Diosta sirvisharqanku. Fiestapeqa qanchis pʼunchayta mikhorqanku,+ khuska mikhurikuy ofrendasta+ jaywaspa, ñaupa tatasninkoj Diosnin Jehovatapis agradecekuspa.
23 Chantá tukuynin runasqa qanchis pʼunchaytawan fiestata ruwanankuta nerqanku, ajinamanta qanchis pʼunchaytawan kusisqas fiestata ruwarqanku.+
24 Judamanta rey Ezequiasqa chay tantasqa runaspaj qorqa 1.000 torosta, 7.000 ovejastawan. Kuraj kamachejkunapis chay tantasqa runaspaj qollarqankutaj 1.000 torosta, 10.000 ovejastawan.+ Ashkha sacerdotestaj llimphuchakusharqanku.+
25 Judamanta tukuy runas, sacerdotes, levitas, Israelmanta jamorqanku chay tukuy runaspis,+ Israelmanta jamorqanku chay waj llajtayoj runaspis,+ Judapi tiyakorqanku chay waj llajtayoj runaspis, tukuyninku may kusisqas kasharqanku.
26 Israelpa reynin Davidpa wawan Salomonpa tiemponmantapachaqa, mana ajina fiestata Jerusalenpi ruwarqankuchu. Chayrayku Jerusalenpeqa manchay kusiy karqa.+
27 Chantá levita sacerdotesqa sayarispa tukuy runasta bendicerqanku.+ Diostaj parlasqankuta uyarerqa, mañakusqankutaj cielokama chayarqa, Dios tiyakun chay santo lugarkama.
Sutʼinchaykunasnin
^ Chayri “tercos”.
^ Kʼacha sonqoyoj: waj lugarespi ninku jatun sonqoyoj.
^ Hebreo parlaypeqa nin, “uj sonqolla kanankupaj”.
^ Glosariopi cheqa Dios nisqata leeriy.
^ Ñakʼay: waj lugarespi ninku degollay, wañuchiy.
^ Chayri “ruphachina”.