2 Crónicas 31:1-21
31 Fiesta tukukusqantawan, chaypi karqanku chay tukuynin israelitasqa Judaj llajtasninman rerqanku, chantá yupaychana rumi pilaresta tʼunata ruwarqanku,+ yupaychana kʼullu postestapis* urmacherqanku,+ pata lugarestapis,+ altarestapis urmachillarqankutaj.+ Chayta ruwarqanku tukuynin Judapi, tukuynin Benjaminpipis, jinallataj Efrainpi, Manasespipis,+ chay tukuy imasta llimphuta chinkachinankukama. Chantá tukuy israelitasqa llajtasninkuman kutiporqanku, sapa ujpis wasinman kutiporqa.
2 Chantá Ezequiasqa sacerdotesta wakicherqa gruposninkuman jina,+ levitastapis gruposninkuman jina,+ sapa sacerdoteta, sapa levitatapis ruwanasninkuta ruwanankupaj,+ qʼolachina* ofrendasta, khuska mikhurikuy ofrendastapis jaywanankupaj, sirvinankupaj, graciasta qonankupaj, alabanzastapis takinankupaj Jehová Diospa patiosninpa* punkusninpi.+
3 Reypa kapuyninmanta wakin imasta qorqanku qʼolachina ofrendaspaj,+ chaytaj karqa tutamanta, tardenpi qʼolachina ofrendaspaj,+ jinallataj samarikuna pʼunchaypi,+ killa rikhuriypi,*+ fiestaspipis+ qʼolachina ofrendaspaj, Jehová Diospa Leyninpi qhelqasqa kasqanman jina.
4 Chantá reyqa Jerusalenpi tiyakoj runasman kamachillarqataj sacerdotesman, levitasmanpis qonanku karqa chay imasta qonankuta,+ ajinamanta paykunaqa Jehová Diospa leyninta allinta juntʼanankupaj.
5 Chayta kamachikusqantawan israelitasqa apamorqanku chʼaki mikhuykunata, mosoj vinota, aceiteta,+ miskʼita, campopi tukuy ima poqosqantapis ashkhata.+ Chay apamusqankoqa karqa ñaupaj kaj poqoy, jinallataj aswan sumajnin. Sapa chunkamanta ujta apamorqanku may ashkhatapuni.+
6 Israelmanta jinallataj Judamanta runaspis, pikunachus Judaj llajtasninpi tiyakoj kanku, chaykuna apamullarqankutaj wakasta, ovejastapis, sapa chunkamanta ujta. Jehová Diosninkupaj tʼaqasqa karqa chay santo imasmantapis sapa chunkamanta ujta apamorqanku.+ Chay tukuy imasta apamuspa ashkha montonespi churarqanku.
7 Kinsa kaj killapi+ chay imasta tantayta qallarerqanku, qanchis kaj killapitaj+ tukucharqanku.
8 Ezequiaswan kuraj kamachejkunawantaj jamuspa rikorqanku chay montonesta, Jehová Diostataj alabarqanku, Israel nacionnintapis bendicerqanku.
9 Ezequiasqa chay montonesmanta tapurerqa sacerdotesta, levitastawan.
10 Sadocpa familianmanta kuraj sacerdote Azariastaj kuticherqa: “Jehová Diospa wasinman chay imasta apamuyta+ qallarisqankumantapacha runasqa sajsakunankukama mikhunku, jinapis puchunraj, Jehová Dios nacionninta bendecisqanrayku. Kay tukuynintaj puchuwayku”,+ nispa.
11 Chayta uyarispa Ezequiasqa nerqa Jehová Diospa wasinpi jallchʼana cuartosta*+ wakichinankuta, paykunataj wakicherqanku.
12 Maychus kamachikusqanman jina apamushallarqankupuni imastachus qonanku karqa chay imasta, sapa chunkamanta ujta,*+ Diospaj tʼaqasqa imastawan. Levita Conaniasta churarqanku chay tukuy imasmanta cargoyoj kananpaj, hermanon Simeitaj yanapajnin karqa.
13 Rey Ezequías kamachisqanman jina, Conaniasta, hermanon Simeitapis kaykuna yanapaj kanku: Jehiel, Azazías, Náhat, Asahel, Jerimot, Jozabad, Eliel, Ismakías, Máhat, Benaya ima. Azariastaj cheqa Diospa* wasinmanta cargoyoj karqa.
14 Imnaj wawan Coretaj inti llojsimuy ladopi kaj punkuta qhawaj levita karqa.+ Payqa cargoyoj karqa cheqa Diospaj tukuy sonqo apamusqanku ofrendasmanta.+ Payqa tʼaqaj Jehová Diospaj apamusqanku imasta,+ Diospaj tʼaqasqa imastapis.+
15 Corejpa cargonpitaj sacerdotespa llajtasninkupi+ kasharqanku Edén, Miniamín, Jesúa, Semaya, Amarías, Secanías ima. Paykunaqa de confianza kasqankurayku, cargoyoj karqanku hermanosninkuman uj rejta partinankupaj gruposninkuman jina,+ jatuchajkunamanpis juchʼuykunamanpis.
16 Paykunaman chay partisqankoqa wajlla karqa, familiasninkumanta listasman jina partisqankumanta nisqaqa. Chay listaspeqa kasharqanku pikunachus Jehová Diospa wasinman sapa pʼunchay jamoj kanku, gruposninkuman jina ruwanasninkuta ruwaj chaykuna. Chay listaspi kashallarqankutaj qhari wawas, kinsa watasniyojmanta pataman.
17 Sacerdotespa familiasninkumanta listasqa ruwasqa kasharqa familiasninkumanta umas kajkunaman jina,+ levitaspatapis ajinallataj ruwasqa karqa 20 watasniyojkunamanta pataman,+ gruposninkoj ruwanasninkuman jina.+
18 Familiasninkumanta listaspeqa kashallarqankutaj tukuy warmisninku, qhari wawasninku, warmi wawasninku, wawitasninkupis, nisunman tukuyninku. Paykunaqa llimphuchasqallapuni karqanku santo ruwanasta ruwanankupaj de confianza kasqankurayku.
19 Chay listaspi kashallarqankutaj Aaronpa familianmanta kajkuna, nisunman llajtasninkoj muyuyninpi tiyakoj sacerdotes.+ Tukuynin llajtaspeqa ajllasqa runas karqanku, paykunaqa sacerdotes ukhupi qharisman partinankupaj churasqa karqanku, sapa ujninkuman, jinallataj levitasmanpis familiasninkumanta listaspi kajkunaman.
20 Ezequiasqa chayta ruwarqa tukuynin Judá nacionpi. Payqa Jehová Diosninpa ñaupaqenpi allin kajta, cheqan kajtawan ruwashallarqapuni, Diostapis kasukushallarqapuni.
21 Ezequiasqa Diosninta sirvinanpaj cheqa Diospa wasinpi ruwanasta wakicherqa,+ Leyta kasukorqa, kamachiykunatapis. Chay imasta tukuy sonqo ruwarqa, allintaj rerqa.
Sutʼinchaykunasnin
^ Glosariopi yupaychana kʼullu poste nisqata leeriy.
^ Hebreo parlaypeqa nin, “campamentosninpa”.
^ Chayri “ruphachina”.
^ Killa rikhuriy: waj lugarespi ninku mosoj killa.
^ Chayri “comedoresta”.
^ Chayri “diezmota”.
^ Glosariopi cheqa Dios nisqata leeriy.
