2 Crónicas 35:1-27
35 Josiasqa Jerusalenpi Jehová Diospaj Pascuata ruwacherqa.+ Pascuapaj uywastaqa ñakʼarqanku*+ ñaupaj kaj killapi, 14 pʼunchaypi.+
2 Josiasqa sacerdotesta ruwanasninkuman churarqa, chantá paykunata kallpacharqa Jehová Diospa wasinpi ruwanasninkuta juntʼanankupaj.+
3 Chantá Josiasqa levitasta, pikunachus tukuy Israelpi yachachej kanku,+ Jehová Diospaj tʼaqasqataj kaj kanku, chaykunaman nerqa: “Santo arcata apaychej Israelpa reynin Davidpa wawan Salomón ruwacherqa chay wasiman.+ Niña hombrosniykichej patapi apaykachanaykichejchu tiyan.+ Kunanqa Jehová Diosta sirviychej, Israel nacionnintapis.
4 Ñaupa tatasniykichejpa familiasninkuman jina, gruposniykichejman jinataj wakichikuychej, Israelpa reynin Davidwan wawan Salomonwan qhelqasqankuman jina.+
5 Santo lugarpi grupo grupo sayaykuychej hermanosniykichej israelitaspa ñaupa tatasninkoj familiasninkuman jina. Israelitaspa sapa familiankupajqa uj grupo kanan tiyan levitaspa ñaupa tatasninkoj familiasninkumanta.
6 Pascuapaj uywasta ñakʼaychej,+ llimphuchakuychejtaj, hermanosniykichejpajpis wakichiychej, imatachus Jehová Dios Moisesnejta nisqanta juntʼanaykichejpaj”, nispa.
7 Chantá Josiasqa chaypi tukuy kajkunaman Pascuapi jaywanankupaj uywasta qorqa, nisunman corderosta,* chivitostawan, 30.000 uywastapuni qorqa, 3.000 wakastawan. Chay tukuynin uywasqa reypa uywasninmanta karqa.+
8 Reypa kuraj kamachisninpis runaspaj, sacerdotespaj, levitaspajpis, tukuy sonqo jaywanasta qorqanku. Cheqa Diospa* wasinmanta encargados karqanku Hilquías,+ Zacarías, Jehiel ima. Paykunaqa sacerdotesman qorqanku Pascuapaj 2.600 uywasta, 300 wakastawan.
9 Conaniasqa hermanosnin Semayawan Netanelwan, jinallataj Hasabiaswan, Jeielwan, Jozabadwanpis levitasta kamachej kanku. Paykunataj levitasman qorqanku Pascuapaj 5.000 uywasta, 500 wakastawan.
10 Tukuy imata wakichiyta tukorqanku, sacerdotesqa puestosninkuman rerqanku, levitastaj gruposninkuman jina churakorqanku,+ rey kamachisqanman jina.
11 Paykunaqa uywasta Pascuapaj ñakʼarqanku.+ Levitas chay uywaspa qarasninkuta chʼuskinankukama,*+ sacerdotesqa levitasmanta japʼisqanku yawarta altar pataman chʼajchusharqanku.+
12 Chantá qʼolachina* ofrendasta wakicherqanku runasman qonankupaj, pikunachus ñaupa tatasninkoj familiasninkuman jina grupospi kasharqanku chaykunaman, Jehová Diosman jaywanankupaj, Moisespa libronpi qhelqasqa kasqanman jina. Wakastapis kikinta ruwarqanku.
13 Pascuapaj ofrendataqa ninapi chayacherqanku,* yachasqa kasqankuman jina.+ Diospaj tʼaqasqa ofrendastataj mankaspi, jatuchaj mankaspi, paylaspi ima chayacherqanku. Chantá usqhayllata tukuy runasman jaywamorqanku.
14 Chantá levitasqa Pascua mikhunata wakicherqanku paykunapaj, sacerdotespajpis. Aaronpa mirayninmanta sacerdotesqa chʼisiyaykunankama qʼolacherqanku jaywanasta, wirastapis. Chayrayku levitasqa mikhunata wakicherqanku paykunapaj, Aaronpa mirayninmanta sacerdotespajpis.
15 Asafpa+ mirayninmanta takejkunaqa, puestosninkupi kasharqanku David kamachisqanman jina,+ Asafpis,+ Hemanpis, reypa profetan* Jedutunpis.+ Punkusta qhawajkunapis punkusta qhawasharqanku.+ Paykunaqa mana ruwanasninkuta saqerqankuchu, hermanosninku levitas tukuy imata paykunapaj wakichisqankurayku.
16 Ajinata chay pʼunchaypi paykunaqa wakichiyta tukucharqanku imatachus Jehová Dios kamacherqa Pascuata ruwanankupaj chayta,+ jinallataj Jehová Diospa altarninpi ofrendasta qʼolachinankupaj, rey Josías kamachisqanman jina.+
17 Chaypi kasharqanku chay israelitasqa Pascuata ruwarqanku, Mana Levadurayoj Tʼanta Fiestatapis qanchis pʼunchaykunata+ ruwarqanku.
18 Chay Pascua Fiesta jinaqa mana Israelpi ruwakorqachu profeta Samuelpa tiemponmantapacha. Israelpa ni mayqen reyninpis chay jina Pascuata ruwasqachu, imaynatachus ruwarqa Josías,+ sacerdoteswan, levitaswan, Judamanta, Israelmantawan tukuy chaypi kajkunawan, Jerusalenpi tiyakojkunawanpis chay jinataqa.
19 Chay Pascua Fiestataqa ruwarqanku Josías 18 watastaña kamachishajtin.
20 Chay qhepata, Josías templota allinchasqanmantaña, Egiptoj reynin Nekoqa+ Carquemisman maqanakoj rerqa, Éufrates mayu chayman. Josiastaj paywan maqanakoj rerqa.+
21 Nekotaj runasta kacharqa Josiasta kayta nimunankupaj: “Judaj reynin, kaypi mana ima ruwanayki kanchu. Noqaqa mana qanwanchu maqanakoj jamushani, waj nacionwan maqanakoj rishani. Diostaj usqhayllata rinayta niwan. Chayrayku allinniykipaj ama Diosman churanakuychu, payqa noqawan kashan. Diosman churanakojtiykeqa pay chinkarparichisonqa”, nispa.
22 Josiastajrí mana kutipuyta munarqachu, astawanqa Nekowan maqanakunanpaj waj ropata churakorqa+ mana rejsinankupaj. Payqa mana Nekoj nisqanta uyarikorqachu, Diosmantapuni chay willay kashajtinpis. Ajinapitaj Josiasqa Meguidó+ pampaman maqanakoj rerqa.
23 Arcoswan* flechajkunataj rey Josiasta japʼirpacherqanku. Josiastaj kamachisninta nerqa: “Orqhowaychej kay maqanakumanta, wañuy patapiña kashani”, nispa.
24 Kamachisnintaj carretanmanta uraykuchispa, chay ujnin maqanakuna carretanman churaykorqanku, Jerusalenmantaj apamorqanku. Ajinapi Josiasqa wañuporqa, pʼamparqankutaj ñaupa tatasninpa sepulturankupi.+ Judamanta, Jerusalenmantawan tukuy runasqa Josías wañupusqanmanta mayta waqarqanku.
25 Jeremiasqa+ Josías wañupusqanmanta uj llakiy takiyta takerqa. Kunankamataj takidorespis, takidoraspis+ Josiasmanta takillankupuni llakiy takiykunasninkupi. Kamachisqataj karqa chay takiykunata Israelpi takinankuta, llakiy takiykunawan khuskataj qhelqasqa kashanku.
26 Josiaspa tukuy kausayninmanta, Diosta munakusqanrayku Jehová Diospa Leyninpi qhelqasqata kasukusqanpis,
27 ruwasqasninpis, qallariymantapacha tukukuykama qhelqasqa kashan Israelpa, Judajpa Reyesninmanta Libropi.+
Sutʼinchaykunasnin
^ Ñakʼay: waj lugarespi ninku degollay, wañuchiy.
^ Cordero nispaqa parlashan uj watayojmanta chayri aswan uñitamanta.
^ Glosariopi cheqa Dios nisqata leeriy.
^ Chayri “lluchʼunankukama”.
^ Chayri “ruphachina”.
^ Ichá nillanmantaj “kankarqanku”.
^ Chayri “mosqoypi jina willaykunata japʼej”.
^ Arco: waj lugarespi ninku camba flecha.
