2 Crónicas 7:1-22
7 Salomón Diosmanta mañakuyta tukuchasqantawan,+ cielomanta nina uraykamuspa+ chay qʼolachina* ofrendata, chay waj jaywanastawan qʼolaykorqa, Jehová Diospa jatun kayninpa kʼanchaynintaj wasiman juntʼaykorqa.+
2 Sacerdotesqa Jehová Diospa wasinman mana yaykuyta aterqankuchu, Jehová Diospa wasenqa Jehová Diospa jatun kayninpa kʼanchayninwan juntʼa kasqanrayku.+
3 Tukuy israelitas rikushajtinku cielomanta nina uraykamorqa, Jehová Diospa jatun kayninpis wasi patapi rikhurerqa. Tukuyninkutaj qonqorikuspa pampakama kʼumuykukorqanku, Jehová Diosmantaj graciasta qorqanku “kʼacha kasqanrayku, munakuynin wiñaypaj kasqanrayku”.
4 Reypis tukuynin israelitaspis Jehová Diospa ñaupaqenpi jaywanasta jaywarqanku.+
5 Salomonqa jaywarqa 22.000 wakasta, 120.000 ovejastawan. Ajinata reywan tukuynin israelitaswanqa cheqa Diosman* chay wasita jaywaporqanku.+
6 Sacerdotesqa levitas jinallataj puestosninkupi sayasharqanku. Paykunaqa tocanasniyoj kasharqanku, Jehová Diospaj takejtinku tocanankupaj.+ (Chay tocanastaqa rey David ruwachisqa Jehová Diosta agradecekunanpaj, chaykunawantaj alabanzasta tocanankupaj “munakuynin wiñaypaj kasqanrayku”). Sacerdotesqa cornetasta jatunmanta waqacherqanku+ levitaspa ñaupaqenkupi, tukuynin israelitas sayasqa kashajtinku.
7 Chantá Salomonqa Jehová Diospa wasinpa ñaupaqenpi karqa chay patio chaupita Diospaj tʼaqarqa, chaypi jaywasqanrayku qʼolachina ofrendasta,+ khuska mikhurikuy ofrendaspa wirasnintapis. Salomón ruwacherqa chay cobre altarmanqa+ niña yaykorqachu chay tukuynin qʼolachina ofrendas, ni chʼaki mikhuy ofrendas,+ ni wiraspis.+
8 Chaypacha Salomonqa tukuynin israelitaswan qanchis pʼunchayta fiestata ruwarqa.+ Manchay ashkha runaspuni tantakamorqanku. Wakenqa Lebó-Hamatmantapacha* jamorqanku, wakintaj Egipto mayumantapacha.*+
9 Paykunaqa qanchis pʼunchay juntʼata altarta Diosman jaywaporqanku, qanchis pʼunchay juntʼatataj fiestata ruwarqanku. Pusaj kaj pʼunchaytaj* uj sumaj tantakuyta ruwarqanku.+
10 Chantá Salomonqa qanchis kaj killapi, 23 pʼunchaypi israelitasta wasisninkuman kachaporqa. Israelitasqa rikorqanku Jehová Diosqa kʼacha kasqanta Davidpaj, Salomonpaj, Israel nacionninpajpis. Chayrayku kusisqas riporqanku,+ sonqo juntʼasqataj.+
11 Ajinata Salomonqa Jehová Diospa wasinta, reypa wasintawan* tukucharqa.+ Salomonqa Jehová Diospa wasinpaj, paypa wasinpajpis imatachá ruwayta yuyaychakorqa tukuy chayta ruwarqa.+
12 Tutantaj Jehová Diosqa Salomonman rikhurispa nerqa:+ “Mañakuwasqaykita uyariyki, kay wasitataj ajllakuni kaypi jaywanasta jaywanawaykichejpaj.+
13 Sichus cielosta wisqʼaykuyman manataj paramunmanchu, sichus saltamontesta kamachiyman nacionnintinmanta qʼomerkunata mikhukapunankuta, sichus nacionniyman wañuchej onqoyta kachaykamuyman,
14 sichus sutiyta apaj nacionniy+ kʼumuykukunman,+ mañakuwanman, khuyakunayta munaspa qhaparikamuwanman, sajra ruwayninkutataj saqepunkuman chayqa,+ chaypacha noqaqa mañakuwasqankuta cielomantapacha uyarimusaj, juchasninkutapis perdonasaj, jallpʼasninkutapis sumaj jallpʼasman tukuchisaj.+
15 Kunanqa sumajta qhawamusaj, allintataj uyarimusaj kay lugarmantapacha mañakuwajtinku.+
16 Kunanqa kay wasita ajllakuni, noqapajtaj tʼaqakuni chaypi sutiy kanallanpajpuni.+ Kay wasitaqa sumajta qhawamusaj, allintataj cuidasaj.+
17 ”Sichus tatayki David jina ñankunasniyta purinki, kamachisusqaytapis ruwanki, leyesniyta, juiciopi nisqasniytapis kasukunki chayqa,+
18 noqaqa kamachina tiyanaykita sumajta sayachisaj,+ imaynatachus tatayki Davidwan tratota ruwaspa nerqani ajinata.+ Noqa payman nerqani: ‘Israeltaqa qanpa mirayniykimanta kajkunapuni kamachenqanku’,+ nispa.
19 Sichus qankuna waj ñanta japʼirinkichej, qosqay leyesta, kamachisqasniytapis qonqankichej, waj diosesta yupaychaspataj qonqorikunkichej chayqa,+
20 noqaqa Israelta kay qosqay jallpʼaymanta saphinmantapacha tʼirasaj.+ Ñaupaqeymantataj chinkachisaj kay wasita, mayqentachus tʼaqakorqani sutiy chaypi kananpaj chay wasita. Waj llajtayoj runaspa chejninankuman, asikunankuman tukuchisaj.+
21 Kay waseqa rumi montonllaña kanqa. Kayninta tukuy pasajkunaqa tʼukuspa qhawanqanku,+ nenqankutaj: ‘Wá, ¿imajtintaj Jehová Dios kay jinata ruwaykun kay naciontari, kay wasitapisri?’,+ nispa.
22 Runastaj kutichenqanku: ‘Kayqa ajina kashan paykuna ñaupa tatasninkoj Diosninku Jehovata saqerparisqankurayku.+ Diosninkoqa Egiptomanta paykunata orqhomorqa.+ Paykunataj waj diosesman kʼaskakorqanku, chay diosesmantaj qonqorikorqanku, yupaycharqankutaj.+ Chayrayku Diosqa kay jina llakiyta paykunaman apachimun’,+ nispa”.
Sutʼinchaykunasnin
^ Chayri “ruphachina”.
^ Glosariopi cheqa Dios nisqata leeriy.
^ Chayri “Hamatman yaykunamantapacha”.
^ Chayri “Egipto wayqʼomantapacha”.
^ Fiestaj qʼayantin, nisunman chunka phishqayoj kaj pʼunchay.
^ Chayri “kamachina wasintawan”.
