2 Crónicas 8:1-18
8 Salomonqa 20 wataspi ruwayta tukucharqa Jehová Diospa wasinta, paypa wasintapis.*+
2 Chantá Salomonqa Hirampa+ qosqan llajtasta watejmanta sayaricherqa, chay llajtasmantaj israelitasta kacharqa chaypi tiyakunankupaj.
3 Chaymantataj Salomonqa Hamat-Zobamanta runaswan maqanakoj rerqa, atipaspataj chay lugarta japʼikaporqa.
4 Chantá watejmanta sayarichillarqataj chʼin pampapi Tadmor llajtata, jinallataj Hamatpi+ ruwarqa mikhuykunasta jallchʼananpaj chay llajtastapis.+
5 Chantapis sayarichillarqataj Pata Bet-Horonta,+ Ura Bet-Horontawan,+ sumaj perqasniyojta, punkusniyojta, punku barretasniyojta.
6 Salomonqa sayarichillarqataj Baalat llajtata,+ mikhuykunasta jallchʼananpaj tukuynin llajtasta, carretasninta sayachinanpaj tukuynin llajtasta,+ caballospi purejkunapaj llajtasta, imatachá Jerusalenpi Salomón ruwayta munarqa chay tukuy imastapis, Líbano orqopipis, jinallataj tukuynin kamachisqan jallpʼaspipis.
7 Chay llajtaspi puchojkunaqa karqanku: hititas, amorreos, perizitas, heveos, jebuseos ima,+ paykunaqa mana Israelmantachu karqanku.+
8 Paykunaj wawasninkoqa chay jallpʼaspi puchorqanku, chaykunatataj Salomonqa apamorqa sinchʼita trabajachinanpaj, kunankamapis paykunaqa ajinata trabajashallankupuni.+ Chay runastaqa israelitas mana chinkachisqankuchu.+
9 Salomonqa ni mayqen israelitatapis esclavoman tukucherqachu trabajachinanpaj.+ Israelitasqa karqanku soldadosnin, capitanesninpa kamachejkunasnin, carretasta apajkunajta, jinallataj caballospi purejkunajta kamachejkunasnin.+
10 Rey Salomonpa encargadosninpa kamachejkunasnenqa 250 karqanku, paykunaqa trabajadorespa capatazkunasnin karqanku.+
11 Chantapis Salomonqa faraonpa* warmi wawanta Davidpa Llajtanmanta pusakaporqa+ ruwapusqan wasiman,+ Salomonqa nerqa: “Warmiy kajtinpis payqa mana tiyakuyta atinchu Israelmanta rey Davidpa wasinpeqa. Maymanchus Jehová Diospa arcan chayarqa chay lugaresqa Diospaj tʼaqasqa”,+ nispa.
12 Chantá Salomonqa Jehová Diospaj jaywanasta qʼolacherqa*+ Jehová Diospa altarninpi,+ mayqentachus pay ruwacherqa temploj torrenpa ñaupaqenpi+ chaypi.
13 Salomonqa Moisés kamachisqanman jina sapa pʼunchay Diosman jaywanasta jaywaj, samarikuna pʼunchaypi,+ killa rikhuriypi,*+ jinallataj watapi kinsa fiestasta ruwaj kanku chaykunapipis,+ nisunman Mana Levadurayoj Tʼanta Fiestaspi,+ Semanas Fiestaspi,+ Chʼujllas Fiestaspi+ ima.
14 Chantá tatan David kamachisqanman jina sacerdotesta grupo grupota tʼaqarqa+ ruwanasninkuta ruwanankupaj. Levitastapis nerqa imastachus ruwanankuta Diosta jatunchanankupaj,+ sacerdotestapis yanapanankupaj* sapa pʼunchay imastachus ruwananku kasqanman jina. Punkusta qhawanankupajpis gruposta churarqa sapa punkupaj,+ cheqa Diospa* kamachin David ajinata kamachisqanrayku.
15 Sacerdotespaj, levitaspajpis imatachus rey kamachisqanmantaqa, ni imitapi wistʼuykaporqankuchu, ni jallchʼana wasispaj kamachisqanmantapis.
16 Ajinata Salomonpa tukuy ima ruwasqanqa sumaj wakichisqa kasharqa,* Jehová Diospa wasinpaj cimientosta churakusqanmantapacha+ tukuchakunankama. Ajinamanta Jehová Diospa wasenqa tukuchakorqa.+
17 Chantapis Salomonqa mar qocha kantuman rerqa Ezión-Gueberman,+ Elotmanpis,+ chaytaj kasharqa Edom jallpʼaspi.+
18 Hiramqa+ kamachisninwan barcosta apacherqa, mar qochapi puriyman yachasqa runastapis kacharqa. Paykunataj Salomonpa kamachisninwan khuska Ofirman+ rerqanku, chaymantataj qorita apamorqanku 15.390 kilosta,*+ chay qoritataj rey Salomonman jaywarqanku.+
Sutʼinchaykunasnin
^ Chayri “kamachina wasintapis”.
^ Faraonqa mana sutichu, manaqa Egiptomanta reyesta faraón nej kanku.
^ Chayri “ruphacherqa”.
^ Killa rikhuriy: waj lugarespi ninku mosoj killa.
^ Chayri “sacerdotespa ñaupaqenkupi sirvinankupaj”.
^ Glosariopi cheqa Dios nisqata leeriy.
^ Chayri “tukuchakorqa”.
^ Hebreo parlaypeqa nin, “450 talentosta”. Uj talentoqa pesarqa 34,2 kilos (1.101 onzas troy). Yanapa B14 nisqata leeriy.
