2 Reyes 11:1-21
11 Ataliaqa+ wawan Ocozías wañupusqanta yachaspa,+ sayarispa reypa tukuynin wawasninta wañuracherqa.+
2 Rey Jehorampa warmi wawan Jehosebaqa, Ocoziaspa hermanan karqa. Payqa Ocoziaspa wawan Jehoasta+ pakayllamanta apakaporqa reypa wawasnin chaupimanta, pikunachus wañuchisqa kananku kasharqa chaykuna chaupimanta. Chay wawataqa wawerantawan khuska uj cuartopi pakasqallata japʼerqa. Ajinamanta chay wawataqa Ataliamanta pakasqata japʼerqanku, nitaj wañuchisqachu karqa.
3 Ajinata chay wawaqa sojta watasta paywan khuska pakasqa kakorqa Jehová Diospa wasinpi. Chay wataspeqa Atalía Judá nacionta kamachisharqa.
4 Atalía qanchis watataña kamachishajtin Jehoiadaqa wajyacherqa sapa pachaj guardiaspa kamachejkunasninkuta. Chay guardiasqa karqanku reypa guardiasninmanta,* jinallataj reypa kamachina wasinpa guardiasninmantapis.*+ Paykunataj Jehová Diospa wasinpi Jehoiadawan tinkorqanku. Jehová Diospa wasinpitaj Jehoiadaqa uj tratota paykunawan ruwarqa, chayta juntʼanankupajtaj juracherqa, chantá paykunaman rikucherqa reypa wawanta.+
5 Chantá Jehoiadaqa paykunata kamacherqa: “Kayta ruwankichej: Kinsa gruposman tʼaqakuychej, ujnin grupoqa samarikuna pʼunchaypi guardias kankichej, reypa wasintataj* allinta qhawankichej.+
6 Ujnin grupotaj Cimiento Punku nisqapi kankichej, chay ujnin grupotaj ujnin punkupi kankichej, reypa kamachina wasinta qhawajkuna kashanku chaykunaj wasankupi. Qankunaqa turnakuspa templota* qhawankichej.
7 Qankunamanta iskay grupo guardiasqa samarikuna pʼunchaypi mana qhawana turnoyojchu kankichej chaypis, Jehová Diospa wasinta allinta qhawankichej reyta ni ima pasananpaj.
8 Qankunaqa reyta muyuykunkichej, sapa ujniykichej armasniykichej japʼirisqa. Pillapis chaupiykichejman satʼikamojtenqa wañuchinkichej. Qankunaqa reyllawanpuni kanaykichej tiyan mayman rejtinpis”, nispa.
9 Sapa pachaj guardiaspa kamachejkunasninkutaj+ sacerdote* Jehoiadaj kamachisqanman jinapuni ruwarqanku. Sapa ujninkutaj mandonpi kasharqanku chay runasta pusamorqanku, samarikuna pʼunchaypi turnoyoj kajkunata, mana turnoyoj kajkunatapis. Sacerdote Jehoiadajmantaj yaykorqanku.+
10 Sacerdotetaj sapa pachaj guardiasta kamachejkunaman qorqa tʼojsina lanzasta, muyu escudostapis, mayqenkunachus rey Davidpata karqa, Jehová Diospa wasinpitaj kasharqa chaykunata.
11 Reypa kamachina wasinmanta guardiastaj+ sapa ujninku lugaresninkupi sayaykorqanku armasninku japʼirisqa, wasej paña ladonmantapacha wasej lloqʼe ladonkama, altar* qayllapi,+ wasi qayllapi, reypa muyuynintinpi.
12 Chantá Jehoiadaqa reypa wawanta orqhomorqa,+ umanmantaj coronata churaykorqa, qhelqasqa Leytawan.*+ Ajinamanta paykunaqa Jehoasta aceitewan jichʼarqanku, rey kananpajtaj churarqanku. Chantá tʼajllarikuspa nerqanku: “Jallalla rey”,+ nispa.
13 Ataliataj runas correshasqankuta uyarispa chay ratopacha Jehová Diospa wasinman rerqa, runas kasharqanku chayman.+
14 Reytataj rikorqa pilarpa ladonpi sayashajta costumbreman jina.+ Guardiaspa kamachejkunasninku, cornetasta waqachejkunapis+ reywan khuska kasharqanku. Llajtamanta tukuy runastaj kusisqa kasharqanku, cornetastapis waqachisharqanku. Chayrayku Ataliaqa ropanta llikʼirakuspa qhaparerqa: “¡Contrayta oqharikunku! ¡Contrayta oqharikunku!”, nispa.
15 Sacerdote Jehoiadataj sapa pachaj soldadospa kamachejkunasninkuta+ kamacherqa, pikunachus soldadospa capitanesnin karqanku chaykunata, kay jinata nispa: “Chay warmita orqhoychej soldadospa chaupinkumanta, pillapis payta jarkʼakojtaqa espadawan wañuchinkichej”, nispa. Sacerdoteqa paykunata nisqaña: “Ama paytaqa Jehová Diospa wasinpi wañuchinkichejchu”, nispa.
16 Chantá Ataliata japʼerqanku, reypa wasinman+ caballos yaykunku chaynejman chayachispataj wañucherqanku.
17 Chantá Jehoiadaqa Jehová Diospa kamachisnillanpuni kanankupaj reytapis runastapis uj tratota ruwacherqa Jehová Dioswan.+ Chantá waj tratota ruwachillarqataj reytawan runastawan.+
18 Chantá tukuynin runasqa Baalpa templonman rispa altaresninta urmacherqanku,+ Baal santostataj kantumanta tʼunararqanku,+ Baalpa sacerdoten Matantapis altarespa ñaupaqenpi wañucherqanku.+
Chantá sacerdote Jehoiadaqa Jehová Diospa wasinpaj encargadosta churarqa.+
19 Chantapis sapa pachaj guardiaspa kamachejkunasninkuta+ tantaykorqa, reypa guardiasninta,* reypa kamachina wasinmanta guardiasta,+ tukuynin nacionmanta runastawan. Tukuyninkutaj reywan khuska Jehová Diospa wasinmanta uraykorqanku, reypa wasinmantaj chayarqanku. Paykunaqa reypa wasinta qhawaj guardiaspa punkun chayninta uraykorqanku. Chantá Jehoasqa reyespa kamachina tiyanankuman tiyaykorqa.+
20 Nacionnintinmanta tukuy runas maytapuni kusikorqanku, llajtapipis allin kausay karqa, Ataliata reypa wasin chaypi espadawan wañuchisqankurayku.
21 Jehoasqa+ kamachiyta qallarishajtin qanchis watitayoj karqa.+
Sutʼinchaykunasnin
^ Chayri “caria nisqa guardiasmanta”.
^ Hebreo parlaypeqa nin, “correjkunamantapis”.
^ Chayri “kamachina wasintataj”.
^ Ichá nillanmantaj “reypa wasinta”.
^ Chayri “qhelqasqa Leytawan jaywarqa”.
^ Chayri “caria nisqa guardiasta”.
