2 Reyes 12:1-21
12 Jehú+ qanchis watastaña Israelpi kamachishajtin, Jehoasqa+ rey jina kamachiyta qallarerqa, Jerusalenpitaj 40 watasta kamacherqa. Jehoaspa mamanqa Beer-Sebamanta+ karqa, sutintaj Zibíah karqa.
2 Jehoasqa Jehová Diospa qhawayninpi cheqan kajta ruwarqa, sacerdote Jehoiadá payta yuyaychasqan wataspi.
3 Jinapis waj diosesta yupaychanapaj pata lugaresqa+ kakushallarqapuni, runaspis chay pata lugarespi jaywanasta ruphachispa qʼoshñichishallarqankupuni.
4 Jehoasqa sacerdotesta nerqa: “Ima qolqetachus Diospaj tʼaqasqa ofrendata jina+ apamunku Jehová Diospa wasinman chay qolqeta japʼinkichej: sapa ujmanta impuestota apamusqankuta,+ mashkhatachus sacerdote uj runaman apamunanta nin chay qolqeta, sapa runa mashkhatachus sonqonmantapacha Jehová Diospa wasinman apamun chay qolqetapis.+
5 Sacerdotesqa chay qolqeta japʼenqanku tukuy apamojkunamanta, chay qolqewantaj Diospa wasinta arreglachenqanku, imaschari arreglana kashan chayta”,*+ nispa.
6 Rey Jehoasqa 23 watastaña kamachisharqa, sacerdotestaj manarajpuni arreglasqankuchu imastachus Diospa wasinpi arreglana karqa chayta.+
7 Chayrayku rey Jehoasqa sacerdote Jehoiadata,+ chay waj sacerdotestawan wajyachispa nerqa: “¿Imajtintaj Diospa wasinta mana arreglankichejchuri? Diospa wasinta mana arreglanaykichej kajtenqa, amaña qolqeta japʼinkichejchu”,+ nispa.
8 Sacerdotestaj de acuerdo karqanku manaña qolqeta runasmanta japʼinankupaj, nitaj cuentayojchu kanankupaj Diospa wasinta arreglachinamanta.
9 Sacerdote Jehoiadataj uj cajata+ japʼispa tapanpi uj juskʼuta ruwarqa. Chantá chay cajata altarpa ladonman churarqa, Jehová Diospa wasinman yaykojkunaj paña ladonkuman. Punkuta qhawaj sacerdotestaj chay cajaman churamoj kanku, mashkhatachus runas Jehová Diospa wasinman apamoj kanku chay tukuynin qolqeta.+
10 Chay cajapi ashkha qolqeña tantakusqanta rikuspataj, reypa secretarionwan kuraj kaj sacerdotewanqa* wicharimuspa chay qolqeta orqhoj kanku.* Chantá yupaj kanku mashkha qolqetachus Jehová Diospa wasinman apamusqankuta.+
11 Paykunataj chay yupasqa qolqeta jaywaj kanku Jehová Diospa wasinpi trabajosmanta encargadosman. Chay encargadostaj pagaj kanku carpinterosman, Jehová Diospa wasinpi trabajajkunaman,+
12 albañilesman, rumita chʼeqojkunamanpis. Encargadosqa chay qolqellawantaj rantej kanku maderasta, kʼutusqa rumistawan Jehová Diospa wasinta arreglanapaj. Chantá wasita arreglachinapaj waj imaspi gastakojtenqa, chay qolqellamantataj orqhoj kanku.
13 Jehová Diospa wasinman apamusqanku qolqewanqa mana ruwarqankuchu Jehová Diospa wasinpaj qolqe metalmanta fuentesta, ni nina wañuchinasta, ni juchʼuy fuentesta, ni cornetasta,+ nitaj qori imasta, ni qolqe imastapis.+
14 Qolqetaqa trabajajkunallaman qoj kanku. Chay qolqewantaj Jehová Diospa wasinta arreglarqanku.
15 Trabajadoresman paganankupaj qolqeta jaywaj kanku chay runasmantaqa, mana chay qolqemanta cuentata mañajchu kanku. Paykunaqa de confianza karqanku.+
16 Pantasqasmanta ofrenda+ qolqeta, jinallataj juchasmanta ofrenda qolqetapis mana Jehová Diospa wasinman apamojchu kanku. Chay qolqeqa sacerdotespaj karqa.+
17 Chaypacha Siriamanta rey Hazaelqa+ Gat+ llajtawan maqanakuspa chay llajtata japʼikaporqa. Chantá Jerusalenwanñataj maqanakunanpaj wakichikusharqa.+
18 Judamanta rey Jehoastaj oqharerqa tukuynin Diospaj tʼaqasqa ofrendasta. Chay imastaqa Diospaj tʼaqasqanku ñaupa tatasnin Jehosafat, Jehoram, Ocoziaspis. Paykunaqa Judamanta ñaupa reyes karqanku. Oqharillarqataj imastachus payllataj Diospaj tʼaqaporqa chay ofrendasta, oqharillarqataj Jehová Diospa wasinpi, jinallataj reypa wasinpi* jallchʼasqa kasharqa chay tukuynin qorita. Chantá Jehoasqa chay tukuynin imasta apacherqa Siriamanta rey Hazaelman.+ Hazaeltaj Jerusalenmanta riporqa.
19 Jehoaspa tukuy kausayninmanta, tukuy ima ruwasqanmantapis qhelqasqa kashan Judajpa reyesninmanta parlaj libropi.
20 Jehoaspa kamachisnintaj paypa contranta yachachinakuspa+ wañurpacherqanku Loma*+ wasi chaypi, Silaman uraykuna ñanpi.
21 Jehoastaqa wañucherqanku Simeatpa wawan Jozacar, Somerpa wawan Jehozabadwan, paykunaqa kamachisnillantaj karqanku.+ Chantá Jehoastaqa ñaupa tatasnintawan khuska pʼamparqanku Davidpa Llajtanpi. Wawan Amasiastaj paypa cuentanmanta rey jina kamachiyta qallarerqa.+
Sutʼinchaykunasnin
^ Chayri “lajrasqasninta”.
^ Chayri “bolsasman churaj kanku”. Hebreo parlaypeqa nin, “wataj kanku”.
^ Glosariopi kuraj kaj sacerdote nisqata leeriy.
^ Chayri “kamachina wasinpi”.
