2 Reyes 18:1-37
18 Israelmanta rey Elaj wawan Hosea+ kinsa watataña kamachishajtin, Judamanta rey Ajazpa*+ wawan Ezequiasqa+ rey jina kamachiyta qallarerqa.
2 Ezequiasqa 25 watasniyoj karqa kamachiyta qallarishaspa, Jerusalenpitaj 29 watasta kamacherqa. Mamanqa Abí* sutikorqa, Abitaj Zacariaspa wawan karqa.+
3 Ezequiasqa Jehová Diospa qhawayninpi allin imasta ruwarqa,+ ñaupa tatan David jina.+
4 Payqa chay yupaychana pata lugaresta+ chinkacherqa, yupaychana rumi pilarestapis tʼunararqa, yupaychana kʼullu postetapis*+ urmacherqa. Moisespa ruwasqan cobre kataritapis+ tʼunata ruwarqa, chay tiempokama israelitasqa chay kataripaj jaywanasta qʼoshñichej kanku, sutichajtaj kanku cobre katari lanti nispa.*
5 Ezequiasqa Israelpa Diosnin Jehovapi atienekoj.+ Judá nacionpa reyesninmantaqa ni ujpis pay jinaqa karqachu, ni paymanta ñaupajta, ni qhepatapis.
6 Payqa Jehová Diosman kʼaskasqa karqa.+ Diosta kasukullarqapuni. Ima kamachiykunatachus Jehová Dios Moisesman qorqa chayta paypis kasukullarqataj.
7 Jehová Diosqa Ezequiaswan karqa. Ezequiasqa tukuy imata sumaj yuyaywan ruwaj. Payqa Asiriaj reyninpa contranta oqharikorqa, nitaj payta sirviyta munarqachu.+
8 Ezequiasqa filisteosta kantumanta atipaykorqa+ qhawana torresninkupi, sumaj perqasniyoj llajtasninkupipis.* Payqa filisteosta atipaspa Gaza llajtakamapuni chayarqa, Gazaj tukuynin jallpʼasnintinman.
9 Rey Ezequiasqa tawa watastaña Judapi kamachisharqa, Israelpa reynin Elaj wawan Hoseapis+ qanchis watastaña Israelpi kamachisharqa. Chaypacha Asiriaj reynin Salmanasarqa Samaria llajtaman rerqa, Samaria llajtawan guerrapi tinkunanpaj, tukuynin llajtatataj muyuykuspa wisqʼaykorqa.+
10 Kinsa watanmantaj Asiriaj reynenqa Samaria llajtata atiparqa.+ Samaria llajta atipasqa kashajtin Ezequiasqa sojta watastaña Judapi kamachisharqa, rey Hoseapis jisqʼon watastaña Israelpi kamachisharqa.
11 Chantá Asiriaj reynenqa israelitasta presosta apakaporqa+ Asiria nacionman, kamacherqataj tiyakunankuta Halá lugarpi, Habor llajtapi, Gozán mayupi, medospa llajtasninkupipis.+
12 Israelitastaqa chay pasarqa Jehová Diosninkoj nisqanta mana uyarisqankurayku. Paykunaqa Diospa tratonta mana valecherqankuchu, Jehová Diospa kamachin Moisés imastachus paykunaman kamacherqa chayta.+ Paykunaqa manapuni uyarikorqankuchu, nipuni kasukorqankuchu.
13 Ezequiasqa 14 watastaña Judapi kamachisharqa. Chaypachataj Asiria+ nacionpa reynin Senaqueribqa Judá nacionpa sumaj perqasniyoj llajtasninman yaykuspa japʼikaporqa.+
14 Chayrayku Judaj reynin Ezequiasqa Lakís llajtaman runasta kacharqa Asiriaj reyninman kayta nimunankupaj: “Pantaykuni. Imatapis qoway niwajtiykeqa qosqayki. Ama jina kaspa ripullay ari”, nispa. Asiriaj reynintaj, Judaj reynin Ezequiasmanta mañarqa 10.260 kilos* qolqe metalta, 1.026 kilos* qoritawan.
15 Ezequiastaj Jehová Diospa wasinmanta, reypa wasinmantawan* jallchʼasqa kasharqa chay tukuynin qolqe metalta orqhospa apacherqa.+
16 Chaypachallataj Judaj reynin Ezequiasqa Jehová Diospa templonmanta punkusta+ orqhorqa, punku marcostawan, mayqentachus payllataj qoriwan forraykusqa chaykunata.+ Chaykunatapis Asiriaj reyninman apachillarqataj.
17 Chantá Asiriaj reynenqa Lakís+ llajtamanta Jerusalenman kacharqa tartanta,* rabsarista,* rabsaquetawan,* may chhika soldadostawan rey Ezequiaspaman.+ Paykunaqa Jerusalenman wicharispa sayaykorqanku pata estanquej larqʼan chaynejpi, tʼajsadorpaj jallpʼanman rej ñanpi.+
18 Chantá reyta wajyacherqanku, llojsimorqataj Hilquiaspa wawan Eliaquim,+ payqa reypa wasinmanta* cargoyoj karqa, llojsimullarqataj reypa secretarion Sebná,+ chantá Asafpa wawan Joapis, payqa reypa qhelqerin karqa.
19 Rabsaquetaj paykunata nerqa: “Ezequiasman nimuychej: ‘Asiria nacionpa atiyniyoj reynenqa kayta nin: “¿Imaykichejmantaj atienesqa kashankichej?+
20 Qanqa nishanki: ‘Sumaj wakichisqa kashani, soldadosniypis may chhika tiyapuwan guerrapi tinkunaypaj’, nispa. Chaytaqa qhasita parlashanki. ¿Pimantaj atienekushankichej contraypi oqharikunaykichejpajri?+
21 Qanqa Egipto nacionman atienekushanki.+ Egiptoqa pʼakisqa caña hueca jinalla, pipis payman atiykukojtenqa makinta tʼojsispa pasarpachin. Ajinata ruwan Egiptoj reynin faraonqa* pikunachus paypi atienekunku chaykunata.
22 Chantá sichus niwankichejman ‘noqaykoqa Jehová Diosniykupi atienekuyku’+ nispa chayqa, ¿nichu Ezequiasqa chay Diosniykichejpa pata lugaresninta, altaresnintapis urmacherqa?+ ¿Nichu Ezequiasqa chaykunata urmachishaspa Judatapis Jerusalentapis nerqa: ‘Jerusalenpi kashan chay altarpa ñaupaqellanpi kʼumuykukunkichej’,+ nispa?”’.
23 A ver, Asiriamanta señorniy reywan apuestata ruwaychej: 2.000 caballosta qosqayki, a ver atinkichus chay chhika runasta conseguiyta chay caballospi montanankupaj.+
24 Egipto nación carretaswan, caballospi purej soldadoswan yanapasunkichejman chaypis, mana atipawajchejchu señorniypa aswan mana kasuy kamachillantapis.
25 ¿Acaso noqaqa gustuymantachu kay lugarta tukuchej jamushani? ¿Jehová Dios mana kachasqallanchu jamushani? Noqataqa Jehová Diospuni kachamuwan: ‘Rispa chay nacionta tukuchimuy’, nispa”.
26 Chayta uyarispa Hilquiaspa wawan Eliaquimwan, Sebnawan,+ Joawanqa rabsaqueta+ nerqanku: “Ama jina kaspa, kay kamachisniykitaqa arameollapi*+ parlawayku, chaytaqa sutʼita entiendeyku. Ama parlawaykuchu judiospa parlayninkupeqa, perqa pataspi kashanku chay runaspa uyarinankutaqa”,+ nispa.
27 Rabsaquetaj paykunata nerqa: “Señorneyqa mana qankunallamanchu, nitaj señornillaykichejmanchu kay imasta ninaypaj kachamuwan. Perqa pataspi tiyashanku chay runaspis uyarinanku tiyan, paykunapis qankunawan khuska akankuta* mikhonqanku, jispʼayninkutapis ujyanqanku”, nispa.
28 Chayta niytawan rabsaqueqa sayarispa judiospa parlayninkupi sinchʼita qhaparerqa: “Uyariychej Asiriamanta atiyniyoj reypa nisqanta.+
29 Asiriamanta reyqa kayta nisunkichej: ‘Ama Ezequiasta creeychejchu. Payqa makiymanta manapuni salvasonqachejchu.+
30 Ezequiasqa Jehová Diospi atienekunaykichejpaj nisonqachej: “Jehová Diosqa salvawasunpuni. Asiriaj reynenqa mana kay llajtata japʼikaponqachu”,+ nispa. Ama creeychejchu.
31 Ama Ezequiasta uyariychejchu. Kaytamin Asiriaj reynin nisunkichej: “Noqawan allinyakuychej, mandoymantaj churakuychej. Chaywanqa sapa ujniykichej uva sachʼaykichejmanta, higo sachʼaykichejmantapis mikhunkichej, yakutapis estanqueykichejmanta ujyankichej.
32 Chayta ruwankichej jamunaykama. Chantá noqa waj lugarman pusasqaykichej, chay lugarqa kay jallpʼaykichej jinallataj.+ Chay jallpʼaspeqa sumajta poqorin trigo, grano,* uvaspis, chaywanqa tʼantatapis vinotapis ruwakunkichej. Kallantaj olivo sachʼaspis, miskʼipis. Ajinata qankunaqa kausallankichejpuni, mana wañunkichejchu. Chayrayku ama Ezequiasta kasuychejchu payqa llullakushasunkichej: ‘Jehová Dios salvawasunchej’, nispalla.
33 ¿Mayqen diostaj nacionninta salvasqa Asiriaj reyninpa makinmantari?
34 ¿Maytaj Hamat+ llajtaj diosnin, Arpad llajtaj diosninpis? ¿Maytaj Sefarvaim+ llajtaj diosnin, Hená llajtaj diosnin, Ivá llajtaj diosninpis? Chay diosesqa mana Samaria llajtata makiymanta salvayta aterqankuchu.+
35 Chay nacionespa tukuynin diosesninkumanta, ¿mayqen diostaj nacionninta makiymanta salvasqari? ¿Chanta Jehová Diospunichu Jerusalentaqa makiymanta salvayta atinman?”,+ nispa’”.
36 Runastajrí chʼinlla karqanku, ni uj simita kuticherqankuchu, imajtinchus rey Ezequiasqa paykunata kamachisqa: “Ama imatapis kutichinkichejchu”,+ nispa.
37 Chantá Hilquiaspa wawan Eliaquim, pichus reypa wasinmanta* cargoyoj karqa chay, chantá reypa secretarion Sebná, Asafpa wawan Joapis, pichus reypa qhelqerin karqa chay, kinsantinku rey Ezequiaspaman rerqanku ropasninku llikʼirasqa, rabsaquej nisqantataj willarqanku.
Sutʼinchaykunasnin
^ Abí suteqa pisi letrasllapi kashan, Abías sutimantataj jamun.
^ Glosariopi yupaychana kʼullu poste nisqata leeriy.
^ Chayri “sutichajtaj kanku Nehustán nispa”.
^ Nisunman tukuy cheqapi, pisi runasniyoj llajtaspi, ashkha runasniyoj llajtaspipis.
^ Hebreo parlaypeqa nin, “300 talentos”. Uj talentoqa pesarqa 34,2 kilos (1.101 onzas troy). Yanapa B14 nisqata leeriy.
^ Hebreo parlaypeqa nin, “30 talentos”.
^ Chayri “kamachina wasinmantawan”.
^ Chayri “coperospa kamachejninkutawan”.
^ Chayri “reypa wasinmanta ujnin kuraj kamachita”.
^ Chayri “comandanteta”.
^ Chayri “kamachina wasinmanta”.
^ Faraonqa mana sutichu, manaqa Egiptomanta reyesta faraón nej kanku.
^ Chayri “siriacollapi”.
^ Aka: waj lugarespi ninku jatun jispʼay.
^ Grano: waj lugarespi ninku cebada.
^ Chayri “kamachina wasinmanta”.
