2 Reyes 23:1-37
23 Chayta uyarispataj rey Josiasqa Judamanta, Jerusalenmantawan tukuynin kurajkunata tantachimorqa.+
2 Chantá rey Josiasqa Jehová Diospa wasinman wicharerqa Judamanta tukuy runaswan, Jerusalenpi tiyakoj tukuy runaswan, sacerdoteswan, profetaswan khuska. Tukuy runaspuni wicharerqanku wawaspis machituspis. Chaypitaj rey Josiasqa trato+ libropi+ tukuy ima nisqanta tukuy runaspaj leeporqa, mayqentachus Jehová Diospa wasinpi tarerqanku chay libromanta.+
3 Rey Josiasqa pilar qayllapi sayaykuspa Jehová Diospa ñaupaqenpi uj tratota ruwarqa.+ Chaypi pay nerqa Jehová Diosta yupaychanallantapuni, chantapis kamachiykunasninta, yuyarichisqasninta, leyesnintapis kasukunanta tukuy sonqonwan, tukuy kausayninwan,* imaschus chay trato libropi qhelqasqa kasharqa chayta juntʼaspa. Tukuy runaspis chay tratota juntʼanankuta nerqanku.+
4 Chantá rey Josiasqa kuraj kaj sacerdote Hilquiasta,+ chay waj sacerdotesta, punkuta qhawajkunatawan kamacherqa Jehová Diospa templonmanta orqhomunankuta imastachus ruwarqanku Baalta yupaychanankupaj, kʼullu posteta*+ yupaychanankupaj, imaschus cielopi kan chay imasta yupaychanankupaj, chay tukuy imasta. Chantá chay tukuy imasta ruphaykuchimorqa Jerusalén llajtaj jawanpi, Cedrón kinraykunapi.* Chay ushphatataj Betel llajtaman aparqa.+
5 Chantá waj llajtayoj diosespa sacerdotesninkuta wijchʼorqa. Chay sacerdotestaqa Judamanta reyes churarqanku jaywanasta qʼoshñichinankupaj Judaj llajtasninpa pata lugaresninpi, jinallataj Jerusalenpa muyuynintinpi. Chantá Baalpaj, intipaj, killapaj, chʼaskaspaj, imaschus cielopi kan chay tukuy imaspajpis jaywanasta qʼoshñichej kanku chay sacerdotestapis wijchʼullarqataj.+
6 Chantá rey Josiasqa Jehová Diospa wasinmanta chay yupaychanapaj kʼullu posteta+ orqhochimorqa, chantá Jerusalén llajtaj jawanman aparqa, Cedrón wayqʼoman, chaypitaj ruphaykucherqa,+ chantá kutarparqa ñutʼu jallpʼaman jina tukuchinankama. Chaytataj qhallamorqa* wajcha runas pʼampasqa kasharqanku chay pataman.+
7 Templospi pagorayku khuchichakoj qharispa+ wasisninkutapis thuñillarqataj. Chay wasisqa Jehová Diospa wasinpi karqanku, chay wasisllapitaj warmispis toldosta awaj kanku kʼullu posteta yupaychanankupaj.
8 Chantá rey Josiasqa Judá llajtasmanta tukuynin sacerdotesta pusamorqa. Sacerdotes jaywanasta qʼoshñichej kanku chay pata lugarestapis mana sirvejman tukucherqa, chayta ruwarqa Guebamantapacha+ Beer-Sebakama.+ Chantapis thuñillarqataj punkus chaynejpi karqa chay pata lugaresta. Chay pata lugaresqa karqanku llajtaj kuraj kamachejnin Josuejpa yaykuna punkun chaynejpi, llajta punkunta yaykojkunaj lloqʼe ladonkupi.
9 Chay pata lugarespi sacerdotes jina sirverqanku chaykunataqa, ni imata ruwachejchu kanku Jehová Diospa altarninpi, Jerusalén llajtapi.+ Jinapis mana levadurayoj tʼantata mikhullaj kanku hermanosninkuwan khuska.
10 Hinón wayqʼopi*+ karqa chay Tófet lugartapis+ mana sirvejman tukucherqa, manaña chaypi Molekta yupaychanankupaj, ajinamanta manaña pipis chay lugarpi qhari wawanta ni warmi wawanta Molekpaj ninapi ruphachinanpaj.*+
11 Judamanta reyes intipaj tʼaqaporqanku chay caballostapis Josiasqa kamacherqa manaña Jehová Diospa wasinman yaykuchinankuta, kuraj kamachi Natán-Melecpa cuarton* chaynejta. Chay cuartoqa pilaresniyoj wasi chaynejpi karqa. Intipaj+ tʼaqasqa carretastapis ruphaykucherqa.
12 Reyqa Ajazpa* pata cuartonpa terrazanpi* karqa chay altaresta+ urmachillarqataj, mayqenkunatachus Judamanta reyes ruwacherqanku chaykunata. Urmachillarqataj Jehová Diospa wasinpi iskaynin patiosninpi karqa chay altarestapis,+ mayqenkunatachus Manasés churarqa chaykunata. Payqa chay altaresta ñutʼuta ruwarparerqa, chaytataj Cedrón wayqʼoman qhallarpamorqa.
13 Chantapis mana sirvejman tukucherqa Jerusalenpa chimpanpi karqa chay pata lugaresta, Perdición orqoj* sur ladonpi* karqa chaykunata. Chay pata lugarestaqa Israelpa reynin Salomón ruwacherqa sidoniospa millay diosanku Astoretpaj, Moabmanta millay dios Kemospaj, ammonitaspa millay diosninku+ Milcompajpis.+
14 Yupaychana rumi pilaresta tʼunata ruwarqa, yupaychana kʼullu postestapis urmacherqa,+ chay lugaresmantaj runa tullusta juntʼaykucherqa.
15 Urmachillarqataj Betelpi karqa chay altarta. Chay pata lugartaqa Nebatpa wawan Jeroboán ruwarqa, chaywan israelitasta juchaman urmacherqa.+ Rey Josiasqa chay altarta, chay pata lugartawan urmachispa, chay pata lugarta ruphaykucherqa, ñutʼuta kutarparqa jallpʼa jinallaña kanankama, chantá yupaychana kʼullu postetapis ruphaykuchillarqataj.+
16 Chantá Josiasqa kutirikuspa rikorqa orqopi sepulturasta, kamacherqataj chay sepulturasmanta tullusta orqhomunankuta. Chay tullustataj chay altarpi ruphaykucherqa. Ajinamanta chay altarta mana sirvejman tukucherqa, manaña chaypi waj diosta yupaychanankupaj. Chaywan juntʼakorqa Jehová Diospa parlasqan, chaytaqa ñaupajmantaña kamachinwan willacherqa.+
17 Chantá rey Josiasqa taporqa: “Jaqay rumi,* ¿pejpa sepulturantaj?”, nispa. Llajtamanta runastaj nerqanku: “Chay sepulturaqa cheqa Diospa* kamachinpata, payqa Judamanta jamuspa+ willarqaña imastachus kunan kay Betel altarta ruwasqaykita”, nispa.
18 Reytaj paykunata nerqa: “Chaypi kakullachun. Ama chay tullusninta tʼojpinkichejchu”, nispa. Runastaj mana chay tullusta tʼojperqankuchu, nillataj Samariamanta jamorqa chay profetaj tullusnintapis.+
19 Chantapis rey Josiasqa Samaria llajtaspi tukuynin pata lugarespi karqa chay templostapis urmachillarqataj.+ Chaykunataqa Israelmanta reyes ruwarqanku Diosta phiñachinankupaj. Chay templostaqa imaynatachus Betelpi altarta ruwaykorqa kikinta ruwarqa.+
20 Chantá pata lugarespi kasharqanku chay sacerdotestapis tukuyninkuta chay altarespi wañuracherqa, runa tullustapis chay altarespi ruphaykucherqa.+ Chantá Josiasqa Jerusalenman kutinporqa.
21 Chantá reyqa tukuynin runasta kamacherqa: “Jehová Diosniykichejpaj Pascua Fiestata ruwapuychej+ kay trato libropi qhelqasqa kasqanman jina”,+ nispa.
22 Chay Pascua Fiesta jinaqa mana ruwakorqachu Israelta jueces juzgarqanku chay tiempomantapacha, nillataj Judata, Israeltawan reyes kamachishajtinkupis.+
23 Rey Josías 18 watastaña kamachishajtintaj Jerusalén llajtapi chay Pascua Fiestata Jehová Diospaj ruwaporqanku.
24 Chantá Josiasqa chinkachillarqataj aysirista, adivinosta,+ wasi santosta,*+ millay santosta, Judapi Jerusalenpi tukuy millay imasta rikhurichisqankutapis. Josiasqa chayta ruwarqa Leypa nisqanta juntʼananpaj,+ mayqenchus qhelqasqa kasharqa sacerdote Hilquías tarerqa Jehová Diospa wasinpi chay libropi.+
25 Ñaupajtaqa mana Josías jina waj rey karqachu. Mana mayqen reypis Josías jinaqa Jehová Diosman kutirikorqachu tukuy sonqonwan tukuy kausayninwan,*+ tukuy kallpanwan Moisespa Leyninpi tukuy ima nisqanman jinaqa. Paymanta qhepatapis nillataj waj rey pay jinaqa karqañachu.
26 Jehová Diostajrí Judapaj phiñasqallapuni kasharqa, Manasés payta phiñachinanpaj millay imasta ruwasqanmanta.+
27 Jehová Diosqa nerqa: “Judá naciontapis ñaupaqeymanta chinkarpachisaj,+ imaynatachus Israel nacionta chinkarpacherqani ajinata.+ Kay ajllakusqay Jerusalén llajtatapis wijchʼusaj, ‘kaypi sutiy kanqa’ nerqani chay wasitapis wijchʼusaj”,+ nispa.
28 Josiaspa tukuy kausayninmanta, tukuy ima ruwasqanmantapis qhelqasqa kashan Judajpa reyesninmanta parlaj libropi.
29 Jaqay pʼunchaykunapi Egiptomanta rey faraón* Nekó jamorqa Éufrates mayuman Asiriaj reyninta yanapaj. Rey Josiastaj rey Nekowan maqanakoj jamorqa, Nekotaj Josiasta rikuytawan Meguidopi wañurpacherqa.+
30 Josiaspa kamachisnintaj wañusqa cuerponta carretapi Meguidomanta Jerusalenman apakaporqanku, sepulturanpitaj pʼamparqanku. Judamanta runastaj Josiaspa wawan Jehoacazpa umanman aceiteta jichʼarqanku, chantá tatanpa cuentanmanta rey jina kamachinanpaj churarqanku.+
31 Jehoacazqa+ 23 watasniyoj karqa rey jina kamachiyta qallarishajtin, Jerusalenpitaj kinsa killata kamacherqa. Mamanqa Hamutal sutikorqa,+ Libnamanta Jeremiaspa wawan karqa.
32 Jehoacazqa ñaupa tatasnin jinallataj Jehová Diospa qhawayninpi sajra imasta ruwaj churakorqa.+
33 Faraón Nekoqa+ Jehoacazta presota japʼispa Riblapi+ wisqʼaykorqa, Hamat jallpʼaspi, manaña Jerusalenpi rey jina kamachinanpaj. Chantá faraón Nekoqa Judá nacionmanta mañarqa 3.420 kilos* qolqe metalta, 34 kilos* qoritawan.+
34 Chantapis faraón Nekoqa Josiaspa wawan Eliaquimta rey kananpaj churarqa tatan Josiaspa cuentanmanta. Eliaquimpa sutintataj Jehoiaquimman cambiarqa. Jehoacaztataj Egiptoman aparqa,+ chaypitaj Jehoacaz wañuporqa.+
35 Jehoiaquimtaj faraonman qorqa qolqetawan qoritawan. Chayta qonanpajtaj runasmanta impuestota cobrarqa. Jehoiaquimqa qolqetapis qoritapis Judá nacionpi tukuy runasmanta* uj rejta orqhorqa faraón Nekoman qonanpaj.
36 Jehoiaquimqa+ 25 watasniyoj karqa rey jina kamachiyta qallarishajtin. Jerusalenpitaj 11 watasta kamacherqa.+ Mamanqa Zebidá sutikorqa, Rumamanta Pedayaj wawan karqa.
37 Jehoiaquimqa ñaupa tatasnin jina+ Jehová Diospa qhawayninpi sajra imasta ruwarqa.+
Sutʼinchaykunasnin
^ Glosariopi yupaychana kʼullu poste nisqata leeriy.
^ Chayri “Cedrón faldaspi”.
^ Qhallay: waj lugarespi ninku qhalliy.
^ Hebreo parlaypeqa nin, “Hinonpa wawasninpa wayqʼon”. Glosariopi Hinón wayqʼo nisqata leeriy.
^ Chayri “nina ukhunta pasachinanpaj”.
^ Chayri “comedornin”.
^ Chayri “patanpi”.
^ Perdición orqoqa Olivos orqo karqa. Astawanqa chay orqoj sur ladonmanta parlashan, chay orqotaqa nillajtaj kanku Pantaykuymanta orqo.
^ Hebreo parlaypeqa nin, “paña ladonpi”.
^ Chayri “lápida”.
^ Glosariopi cheqa Dios nisqata leeriy.
^ Hebreo parlaypeqa nin, “terafim santosta”.
^ Faraonqa mana sutichu, manaqa Egiptomanta reyesta faraón nej kanku.
^ Hebreo parlaypeqa nin, “uj talento”.
^ Hebreo parlaypeqa nin, “100 talentos”. Uj talentoqa pesarqa 34,2 kilos (1.101 onzas troy). Yanapa B14 nisqata leeriy.
^ Hebreo parlaypeqa nin, “nacionpi runasmanta”.
