2 Reyes 6:1-33
6 Profetaspa wawasnenqa+ Eliseota nerqanku: “Kay tiyakusqanchej waseqa ancha juchʼuyña noqanchejpaj.
2 ¿Riykumanchu Jordán mayuman? Chaypi sapa ujniyku kʼulluta kʼutuspa wasita ruwakusqayku”,* nispa. Eliseotaj nerqa: “Rillaychej”, nispa.
3 Ujninkutaj nerqa: “Qanpis noqaykuwan riy ari”, nispa. Eliseotaj nerqa: “Ya, jakuchej”, nispa.
4 Chantá Eliseoqa paykunawan khuska rerqa. Paykunataj Jordán mayuman chayaspa sachʼasta kʼutoj churakorqanku.
5 Ujninku sachʼata kʼutushajtintaj, hachanpa umanqa phawaspa yakuman chinkaykorqa, chayrayku qhaparikorqa: “Señorníy, chay hachaqa mañarisqalla karqa”, nispa.
6 Cheqa Diospa* kamachintaj nerqa: “¿Maynejmantaj chinkaykun?”, nispa. Paytaj rikucherqa maynejmanchus chinkaykusqanta. Eliseotaj uj maderata kʼutuspa chayman choqaykorqa, hacha umatataj tuyturpachimorqa.
7 Chantá nerqa: “Orqhokapuy”, nispa. Paytaj makinwan taripaspa orqhokaporqa.
8 Siriamanta reyqa Israel nacionwan maqanakoj rerqa.+ Payqa kamachisninwan yachachinakuspa nerqa: “Qankunawan rispa chaynejpi chantá jaqaynejpi toldosninchejta* sayachisun”, nispa.
9 Cheqa Diospa kamachintaj+ Israelpa reyninman kay willayta apacherqa: “Ama chay lugarta pasankichu, Siriamanta soldadosqa chayman jamushanku qanwan maqanakoj”, nispa.
10 Israelpa reynintaj cheqa Diospa kamachin nisqanman jina chay lugarpi kajkunaman cuidakunankuta willacherqa. Ajinata Eliseoqa ashkha kutista reyta nerqa ima lugaresmanchus mana rinanta, reytaj mana chay lugaresman rerqachu.+
11 Siriaj reynintaj mayta rabiakorqa, chayrayku kamachisninta wajyachispa taporqa: “Rimariychej: ¿Pitaj noqanchej ukhupi Israelpa reynin parte kashan?”, nispa.
12 Ujnin kamachintaj nerqa: “Ni mayqenniyku señor reyníy. Israelpa reyninmanqa Israelpa profetan Eliseo willashan imatachus cuartoyki ukhupi parlasqaykita”,+ nispa.
13 Reytaj nerqa: “Rispa chay profetata maskʼamuychej. Noqataj runasta kachamusaj japʼinankupaj”, nispa. Chaymantataj reyman willacherqanku: “Dotanpi+ kashan”, nispa.
14 Chay ratopacha reyqa Dotanman soldadosta kacharqa caballospi, guerrapaj carretaspipis, uj jatun ejercitotawan. Chay soldadostaj tutan chayaspa Dotán llajtata muyuykorqanku.
15 Cheqa Diospa kamachinpata kamachintaj tutamanta sayarispa jawaman llojserqa, rikorqataj llajtaj muyuyninpi ashkha soldadosta, caballosniyojta, maqanakuna carretasniyojta. Chay ratopachataj Eliseota nerqa: “Señorníy, ¿imanasuntajri?”, nispa.
16 Eliseotaj nerqa: “Ama manchachikuychu.+ Noqanchejwan kajkunaqa aswan ashkha kanku, paykunawan kajkunamanta nisqaqa”,+ nispa.
17 Chantá Eliseoqa Diosmanta mañakorqa: “Jehová Diosníy, kamachiypa ñawisninta kicharillay ari rikunanpaj”,+ nispa. Chay ratopachataj Jehová Diosqa chay kamachej ñawisninta kicharerqa. Chay kamachitaj rikorqa tukuynin orqosqa juntʼa kashasqanta laurarishaj caballoswan, laurarishaj maqanakuna carretaswan,+ Eliseoj tukuy muyuynintinpi.+
18 Siriamanta chay soldados Eliseoman chimpamojtinkutaj Eliseoqa Jehová Diosmanta mañakorqa: “Diosníy, ama jina kaspa, kay runasta* ciegoyachiy”,+ nispa. Diostaj chay runasta ciegoyacherqa Eliseo mañakusqanman jina.
19 Eliseotaj paykunata nerqa: “Mana kay ñantachu jamunaykichej karqa, nitaj kayqa chay llajtachu. Jaku, noqa pusasqaykichej maskʼashankichej chay runaman”, nispa. Ajinata Eliseoqa Samariaman+ chay runasta pusarqa.
20 Samariaman chayasqankutawan Eliseoqa nerqa: “Jehová Diosníy, ñawisninkuta kichariy rikunankupaj”, nispa. Jehová Diostaj chay runaspa ñawisninkuta kicharerqa, paykunataj rikorqanku Samaria llajta chaupipi kashasqankuta.
21 Israelmanta reytaj paykunata rikuspa Eliseota taporqa: “Tatáy, ¿wañuchisajchu kay runasta? ¿Wañuchisajchu?”, nispa.
22 Eliseotaj nerqa: “Ama paykunata wañuchinkichu. ¿Guerramanta* apamusqayki preso runasta wañuchillawajchu? Paykunamanqa tʼantata jaywariy mikhurikunankupaj, yakutapis ujyarikunankupaj,+ chantá señorninkuman kachapuy”, nispa.
23 Reytaj ashkha mikhunata paykunapaj waykʼuchiporqa, paykunataj mikhorqanku, ujyarqankutaj. Chantá reyqa paykunata señorninkuman kachaporqa. Chaymantapachataj Siria nacionmanta suwa tropasqa+ manaña Israel nacionman yaykumojchu kanku.
24 Aswan qhepamantaj Siriaj reynin Ben-Hadadqa tukuynin ejercitonta tantaykorqa, jamuspataj Samaria llajtata tukuynin soldadosninwan muyuykorqa.+
25 Ajinapitaj Samaria llajtapeqa manchay yarqhay karqa.+ Siriaj soldadosnenqa Samaria llajtaj muyuynillanpipuni karqanku. Burro umaqa+ 80 qolqesña* valerqa, uj chhikan* paloma akapis phishqa qolqesña* valerqa.
26 Israelpa reynenqa llajtaj perqa patanta purisharqa, uj warmitaj qhaparimorqa: “Yanapawayku señor reyníy”, nispa.
27 Reytaj chay warmita nerqa: “Jehová mana yanapasojtin, ¿maymantataj noqa imatapis oqharimuyman yanapasunaypaj? ¿Eramantachu?* ¿Vino chʼirwanamantachu? ¿Aceite chʼirwanamantachu?”, nispa.
28 Chantá reyqa chay warmita taporqa: “¿Imataj llakiyniyki?”, nispa. Warmitaj kuticherqa: “Kay warmi niwarqa: ‘Wawaykita apamuy mikhunanchejpaj, qʼayataj wawayta mikhusunchej’,+ nispa.
29 Jinapitaj wawayta waykʼuspa mikhuykorqayku,+ qʼayantintaj kay warmita nerqani: ‘Wawaykitañataj apamuy mikhunanchejpaj’, nispa. Kay warmitaj wawanta pakaykun”, nispa.
30 Reytaj chay warmej nisqanta uyariytawan ropasninta llikʼirakorqa.+ Perqa patanta rey purishajtintaj runasqa rikorqanku qhashqa ropasta ukhunman churakusqanta.
31 Chantá reyqa nerqa: “Diosqa sinchʼita castigawachun, manachus kunanpacha Safatpa wawan Eliseoj umanta qholuchisaj chayqa”,+ nispa.
32 Eliseoqa wasinpi tiyasqa kasharqa, kurajkunapis paywan khuska tiyasqa kasharqanku. Reyqa uj runata ñaupaqenta Eliseoj wasinman kachamorqa, niraj chay runa chayamushajtintaj Eliseoqa kurajkunata nerqa: “Chay runa wañuchej wawanqa+ uj runata kachamun umayta qholuchinawanpaj. Sumajta qhawankichej. Chayamojtenqa punkuta wisqʼankichej, chay punkumantaj atiykukunkichej. Chay runaj qhepantapacha señornin thaskispa jamushan, ¿uyarinkichejchu?”, nispa.
33 Paykunawan parlashajtillanraj chay kachamusqan runa chayamorqa. Reypis qhepanta chayamullarqataj, nerqataj: “Kay ñakʼareyqa Jehová Diosmanta jamun. ¿Imapajñataj Jehová Diospa yanapayninta suyakuymanri?”, nispa.
Sutʼinchaykunasnin
^ Ruwakusqayku: waj lugarespi ninku ruwakusajku.
^ Glosariopi cheqa Dios nisqata leeriy.
^ Chayri “carpasninchejta”.
^ Hebreo parlaypeqa nin, “kay nacionta”.
^ Chayri “Espadaykiwan flechana arcoykiwan”.
^ Chay qolqesqa qolqe metalmanta ruwasqa karqa.
^ Chay qolqesqa qolqe metalmanta ruwasqa karqa.
^ Hebreo parlaypeqa nin, “uj cuarto cab”. Chayqa kanman 0,3 litros. Yanapa B14 nisqata leeriy.
