2 Reyes 8:1-29
8 Eliseoqa kausaricherqa chay wawaj mamanta nerqa:+ “Sayarispa familiaykiwan khuska ripuy, mayllapipis forastera jina tiyakamuy. Jehová Diosqa ninña qanchis watasta kay nacionpi yarqhay kananta”,+ nispa.
2 Warmitaj sayarispa cheqa Diospa* kamachinpa nisqanta ruwarqa. Tukuynin familianwan filisteospa+ nacionninkuman riporqa, chaypitaj qanchis watasta tiyakorqa.
3 Chay qanchis watas juntʼakojtintaj warmeqa filisteospa nacionninkumanta kutinporqa, chantá reypaman rerqa wasinta, jallpʼasnintawan kutichikapunanpaj.
4 Chay ratollataj reyqa cheqa Diospa kamachin Guehazita nisharqa: “Ama jina kaspa willariway ima tʼukunastachus Eliseo ruwasqanta”,+ nispa.
5 Guehazitaj reyman willasharqa imaynatachus Eliseoqa uj wañusqa wawata kausarichisqanta.+ Chay ratotaj chay kausarichisqa wawaj mamanqa reypaman yaykumorqa wasinta, jallpʼasnintawan mañakapoj.+ Guehazitaj reyta nerqa: “Señor reyníy, kayqa chay warmi, kay wawanta Eliseoqa kausaricherqa”, nispa.
6 Reytaj warmita nerqa willarinanta imaynachus chay kasqanta, warmitaj tukuysitunta willarqa. Chantá reyqa ujnin kuraj kamachinta wajyaspa nerqa: “Kay warmiman kutichipuy tukuy imasninta, ripusqanmanta kunankama imaschus jallpʼasninpi poqorqa chaytapis”, nispa.
7 Eliseoqa Damascoman+ rerqa, chaypachataj Siriamanta rey Ben-Hadadqa+ onqosqa kasharqa. Chayrayku reyman willacherqanku: “Cheqa Diospa kamachin+ chayamusqa”, nispa.
8 Reytaj Hazaelta+ nerqa: “Regalosta apaspa cheqa Diospa kamachinwan parlamuy.+ Jehová Diosta tapurichipuway: ‘¿Sanoyapusajchu kay onqoymanta?’, nispa”.
9 Hazaelqa Diospa kamachinwan parlaj rerqa regalos aparisqa. Payqa Damascomanta tukuy laya* sumaj imasta aparqa 40 camellospi cargaykuspa. Chantá Eliseojman chayaspa nerqa: “Wawayki, Siriaj reynin Ben-Hadad qanman kachamuwan tapusunaypaj: ‘¿Sanoyapusajchu kay onqoymanta?’, nispa”.
10 Eliseotaj kuticherqa: “Rispa willamuy: ‘Sanoyapunki’, nispa. Jinapis Jehová Diosqa noqaman willawanña wañupunanta”,+ nispa.
11 Chantá Hazaelta qhawarqa pʼenqaykuchinankama. Chaymanta cheqa Diospa kamachenqa waqarqa.
12 Hazaeltaj taporqa: “Señorníy, ¿imajtín waqashanki?”, nispa. Eliseotaj nerqa: “Noqa yachani imaynatapunichus israelitasta ñakʼarichinaykita,+ sumaj perqasniyoj llajtasninkuta ruphaykuchinaykita, aswan wapu runasninkuta espadawan wañuchinaykita, wawasninkutapis imata jina wañuchinaykita, onqoj warmisninkutapis wijsankuta phatachinaykita”,+ nispa.
13 Hazaeltaj nerqa: “¿Imaynatá noqa chay jinasta ruwayman kasqa, kay jina mana kasuy alqolla kashaspari?”, nispa. Eliseotaj nerqa: “Jehová Diosqa willawanña Siria nacionpa reynin kanaykita”,+ nispa.
14 Chantá Hazaelqa riporqa, señorninmantaj kutiporqa. Señornintaj payta taporqa: “¿Ima nisunkitaj Eliseo?”, nispa. Hazaeltaj kuticherqa: “Payqa sanoyaponqa nisunki”,+ nispa.
15 Qʼayantintaj Hazaelqa uj phulluta yakuman churaykorqa, chaywantaj señorninpa uyanta qhataykuspa samayninta taparparqa wañuchinankama.+ Chantá Hazaelqa paypa cuentanmanta rey jina kamachiyta qallarerqa.+
16 Israelpa reynin Achabpa* wawan Jehoramqa+ phishqa watataña Israelta rey jina kamachisharqa. Chaypacha rey Jehosafatpa wawan Jehoramqa+ Judapi rey jina kamachiyta qallarerqa, tatan Jehosafat reyllaraj kashajtin.
17 Jehoramqa rey jina kamachiyta qallarishajtin 32 watasniyoj karqa. Payqa pusaj watata Jerusalenpi kamacherqa.
18 Jehoramqa Israelpa reyesninpa chakinta qhatillarqataj.+ Payqa Achabpa warmi wawanwan casarasqanrayku+ Achabpa familian jinallataj ruwarqa.+ Jehoramqa Jehová Diospa qhawayninpi millay imasta ruwarqa.+
19 Jehová Diostaj kamachin Davidrayku+ mana munarqachu Judá nacionta chinkarpachiyta. Diosqa Davidta nisqaña paytapis wawasnintapis wiñaypaj kamachejta saqenanta.*+
20 Jehoram kamachishajtin Edompi tiyakojkunaqa Judaj contranta oqharikorqanku,+ uj reytataj churakorqanku.+
21 Jehoramtaj tukuynin carretasninwan Zaír ladoman rerqa. Jehoramqa payta, comandantesnintawan muyuykushajtinku tutan sayarispa edomitasta atipaykorqa, soldadostaj toldosninkuman* ayqerqanku.
22 Edomqa kunan pʼunchaykamapis Judaj contranta oqharikushallanpuni. Chaypacha Libnapis+ oqharikullarqataj.
23 Jehorampa tukuy kausayninmanta, tukuy ima ruwasqanmantapis qhelqasqa kashan Judajpa reyesninmanta parlaj libropi.
24 Chantá Jehoramqa ñaupa tatasnin jina wañupullarqataj, ñaupa tatasnintawan khuskataj pʼamparqanku Davidpa Llajtanpi.+ Wawan Ocoziastaj+ paypa cuentanmanta rey jina kamachiyta qallarerqa.
25 Israelpa reynin Achabpa wawan Jehoramqa 12 watastaña Israelta kamachisharqa. Chaypacha Judajpa reynin Jehorampa wawan Ocoziasqa Judapi kamachiyta qallarerqa.+
26 Ocoziasqa 22 watasniyoj kasharqa rey jina kamachiyta qallarishaspa, Jerusalenpitaj uj watata kamacherqa. Mamanpa sutenqa Atalía+ karqa, Ataliaqa Israelpa reynin Omrij+ allchhin* karqa.
27 Ocoziasqa Achabpa familian jinallataj ruwarqa.+ Payqa Achabpa familian jina Jehová Diospa qhawayninpi millay imasta ruwallarqataj, paypa tatanqa Achabpa ujnin warmi wawanwan casarasqa.+
28 Ocoziasqa maqanakuman riysikusqa Achabpa wawan Jehoramwan khuska. Paykunaqa Siriaj reynin Hazaelwan maqanakoj rerqanku Ramot-Galaadpi.+ Siriamanta soldadostaj Jehoramta flechaspa japʼirpacherqanku.+
29 Rey Jehoramtaj Jezreelman+ kutiporqa chay nanasqasninmanta sanoyapunanpaj. Paytaqa Ramapi sirio soldados flechawan japʼirpachisqanku Siriamanta rey Hazaelpa contranta maqanakushajtin.+ Judamanta rey Jehorampa wawan Ocoziastaj Jezreelman uraykorqa Achabpa wawan Jehoramta watukoj onqosqa kasqanrayku.
Sutʼinchaykunasnin
^ Glosariopi cheqa Dios nisqata leeriy.
^ Chayri “tukuy rijchʼaj”.
^ Hebreo parlaypeqa nin, “uj lamparata qonanta”.
^ Chayri “carpasninkuman”.
^ Hebreo parlaypeqa nin, “warmi wawan”.
