2 Samuel 1:1-27
1 Saulqa wañuporqa. Chaypacha Davidqa amalequitasta atipasqanmanta kutimuytawan iskay diastaña Ziclagpi+ kasharqa.
2 Kinsa dianmantaj Saulpa campamentonmanta* uj runa chayamorqa llikʼisqa ropayoj, umanmantaj jallpʼawan qhallaykusqa.* Davidman chimpaykuspataj qonqoriykukuspa pampakama kʼumuykukorqa.
3 Davidtaj chay runata taporqa: “¿Maymantá jamushanki?”, nispa. Chay runataj kuticherqa: “Israelpa campamentonmanta ayqekamuni”, nispa.
4 Davidtaj taporqa: “¿Imataj karqari? Ama jina kaspa willariway”, nispa. Chay runataj kuticherqa: “Israelita soldadosqa maqanakumanta ayqekunku, ashkhastaj wañunku. Saulpis wawan Jonatanpis wañullankutaj”,+ nispa.
5 Davidtaj chay willayta apamoj joventa taporqa: “¿Imaynapi chanta qan yachanki Saulwan wawan Jonatanwan wañusqankutari?”, nispa.
6 Chay joventaj kuticherqa: “Guilboa orqopi+ purishaspa Saulta rikorqani. Payqa tʼojsina lanzanman atiykusqa kasharqa. Filisteospa maqanakuna carretasninkutaj, caballospi purej soldadosninkupis payman qayllaykamusharqankuña.+
7 Paytaj qhepata qhawarimorqa, rikuwaspataj wajyamuwarqa. Noqataj nerqani: ‘Nillaway wiraqochíy’, nispa.
8 Paytaj tapuwarqa: ‘¿Pitaj kanki?’, nispa. Noqataj kuticherqani: ‘Amalequita kani’,+ nispa.
9 Chantaqa niwarqa: ‘Ama jina kaspa jamuspa wañuchiway, kay jinata ñakʼarishani, mana wañuyta atishanichu’, nispa.
10 Chayrayku payman chimpaykuspa wañucherqani.+ Payqa wañunanpaj jinaña kasharqa, niñataj kutirinanpaj jinachu karqa. Chantá umanmanta coronata orqhorqani, makinmanta manillatawan. Qanpajtaj apanpuyki wiraqochíy”, nispa.
11 Chayta uyarispa Davidqa ropanta llikʼikorqa, paywan kaj runaspis ropasninkuta llikʼikullarqankutaj.
12 Chantá qhaparikorqanku, waqarqanku, chʼisiyaykunankamataj ayunarqanku+ Saulrayku, wawan Jonatanrayku, Jehová Diospa nacionninrayku, israelitasrayku,+ paykuna espadawan wañuchisqa kasqankurayku.
13 Chantá Davidqa chay willayta apamoj joventa taporqa: “¿Maymantá kanki?”, nispa. Paytaj kuticherqa: “Amalequitaj wawan kani, forasteroj wawan”, nispa.
14 Davidtaj payta nerqa: “¿Imaraykutaj mana manchachikorqankichu Jehová Diospa ajllakusqanta wañuchiytari?”,+ nispa.
15 Chayta niytawan Davidqa ujnin runata wajyaspa nerqa: “Kay runata wañuchiy”, nispa. Paytaj espadawan tʼojsispa wañucherqa.+
16 Davidqa chay joventa nerqa: “Qanllataj juchayoj kanki wañunaykipaj. Simillaykiwantaj enqhaykukunki ‘noqa Jehová Diospa ajllakusqanta wañucherqani’+ nispa”.
17 Saulwan wawan Jonatanwan wañusqankumanta+ Davidqa uj llakiy takiyta takerqa.
18 Davidqa kamacherqa chay llakiy takiyta Judapi tiyakojkunaman yachachinankuta. Chay llakiy takeyqa “Arco” nisqa, qhelqasqataj kashan Jasar libropi:+
19 “Ay Israel, jatunpaj qhawasqa runasqa pata lugaresniykipi wañunku.+
Chay jinata wapu runasqa wañunku.
20 Ama Gatpi chayta willaychejchu,+ama Asquelón callespipis chayta willaychejchu,ama filisteospa warmi wawasninku kusikunankupaj,ama chay mana circuncidasqa* runaspa warmi wawasninku fiestachakunankupaj.
21 Guilboa orqos,+amaña qankunapaj chhullamuchunchu, amaña paramuchunchu,amaña jallpʼasniykichejpi ima ofrendapis Diospaj poqochunchu.+
Chaypi wapu runaspa escudosninkoqa chʼichichasqa karqa.
Saulpa escudonqa manaña aceitewan jawisqachu kashan.
22 Jonatanpa flechana arconpis*+ Saulpa espadanpis,
enemigosninkoj yawarninpi chhapukorqa, maqanakojkunaj wirasninkumanpis satʼikorqa.
Chay flechana arcopis espadapis wañuchejpuni kanku.+
23 Saulwan Jonatanwanqa+ kausashaspa may munasqa karqanku,ni wañuypipis tʼaqanakunkuchu.+
Paykunaqa aguilasmantapis aswan ligeros karqanku,+leonesmantapis aswan kallpasapas karqanku.+
24 Israelpa warmi wawasnin, Saulmanta waqaychej.
Payqa puka ropaswan pʼachallichisorqachej, sumaj valorniyoj imaswantaj kʼachanchasorqachej,ropasniykichejmanpis qori kʼachanchanasta churasorqachej.
25 Chay jinata kallpasapa runasqa maqanakupi wañunku.
Jonatanqa pata lugaresniykipi wañusqa kashan.+
26 Hermanóy Jonatán, qanmanta kay jina llakisqa kashani.
Noqapajqa manchay munasqa karqanki.+
Munakuwasqaykeqa warmispa munakuwasqankumantapis aswan sumaj karqa.+
27 Kallpasapa runasqa chay jinata wañupunku.
Maqanakuna armasninkupis chay jinata tʼunarakapunku”.
Sutʼinchaykunasnin
^ Campamentoqa ashkha toldo wasis.
^ Qhallay: waj lugarespi ninku qhalliy.
^ Circunciday niyta munan qharejpa jispʼananpa puntanmanta qaritanta khuchurpariy. Glosariopi circuncisión nisqata leeriy.
^ Flechana arco: waj lugarespi ninku camba flecha.
