Isaías 19:1-25
19 Kay willayqa Egiptoj contranpi kashan:+
Jehová Diosqa usqhayta phawarej phuyu patapi Egiptoman yaykushan.
Egiptoj qhasi manakaj diosesnenqa ñaupaqenpi kharkatenqanku.+
Egiptoj sonqontaj manchariywan pharaqeyarenqa.
2 “Egipciostaqa egipciosllawantaj maqanachisaj,paykunapura maqanakonqanku,sapa ujpis hermanonpa contranta, vecinonpa contranta sayaykonqa,uj llajtaqa waj llajtaj contranta sayaykonqa, uj gobiernopis waj gobiernoj contranta sayaykonqa.
3 Egiptopi tiyakojkunaqa ni imanakuyta atenqankuchu.
Noqaqa wakichikusqankuta pantachisaj.+
Paykunaqa maskʼanqanku qhasi manakaj dioskunata,katarista tusuchejkunata, aysirista, adivinostapis.+
4 Egiptotaqa sajra patronpa makinman jaywaykusaj,uj sajra rey paykunata kamachenqa”,+ nispa nin cheqa Señorqa, angelesta kamachej Jehová Diosqa.
5 Mar qochamanta yakoqa chʼakiponqa,mayumanta yakupis tukukaponqa, qʼalata chʼakiponqa.+
6 Mayusqa asnarenqanku.
Egipto Nilo mayumanta llojsej canalespis pisimanta pisi qʼalata chʼakiponqanku,caña huecaspis totoraspis ismuykaponqanku.+
7 Nilo mayu kantuspi plantaspis chʼakiponqanku, mar qochaman yaykun chaypi.
Chʼakipullanqankutaj Nilo mayu patapi chajraspis.+
Wayraqa qʼalata apakaponqa, manañataj imapis kanqañachu.
8 Pescadoresqa waqanqanku,Nilo mayuman anzuelota choqajkunapis llakikonqanku,chʼipasninkuta* yakuman choqaykojkunapis astawan astawan pisiyanqanku.
9 Linomanta telasta ruwajkuna,+yuraj telasta telarpi awajkunapis pʼenqaypi rikhurenqanku.
10 Awajkunaqa qʼala sonqo pʼakisqas kanqanku.
Tukuynin peonesqa manchay llakisqas kanqanku.
11 Zoanmanta+ kuraj kamachejkunaqa wampus kanku,faraonpa* sumaj yachayniyoj yuyaychajkunasnenqa mana yuyaychanasta yuyaychanku.+
¿Imaynatá faraonta ninkichej“noqaqa sumaj yachayniyojkunaj mirayninmanta kani,ñaupa reyespa miraynin kani” nispari?
12 ¿Maytaj chay yachayniyoj runasniykiri?+
Yachanku chayqa, paykuna willasuchunku imatachus angelesta kamachej Jehová Dios Egiptota ruwasaj nisqanta.
13 Zoanmanta kuraj kamachejkunaqa wampu jina imatapis ruwanku.
Nofmanta*+ kuraj kamachejkunaqa chʼaukiyachikunku.*
Egiptotaqa ayllusninmanta* kamachejkunallataj pantaykuchinku.
14 Jehová Diosqa qʼalata musphaykachachin.+
Paykunaqa Egiptota tukuy ima ruwasqanpi pantaykuchinku,imaynatachus uj machasqa lansakusqan patapi lluskʼaykachan ajinata.
15 Egiptotaj ni imata ruwayta atenqachuni umapis, ni chupapis, ni pʼutumusqanpis, ni wiñasqan kʼaspipis.*
16 Chay pʼunchay egipciosqa warmi jinallaña kanqanku. Kharkatitenqanku, sinchʼita mancharikonqanku angelesta kamachej Jehová Dios contrankuta makinta oqharisqanrayku.+
17 Judá nacionqa Egiptota sinchʼita manchaykuchenqa. Paymanta parlajta uyarispalla mancharikonqanku, angelesta kamachej Jehová Dios imatachus contrankupi ruwasaj nisqanrayku.+
18 Chay pʼunchayqa Egiptoj phishqa llajtasninpi Canaanpa parlayninta parlanqanku,+ angelesta kamachej Jehová Diosmantaj kutisqa kanankuta juranqanku. Ujnin llajtaj sutenqa Thuñina Llajta kanqa.
19 Chay pʼunchayqa Egipto nación chaupipi Jehová Diospaj uj altar kanqa. Lindesninpitaj* Jehová Diospaj uj rumi pilar kanqa.
20 Chayqa uj señal kanqa Egiptopi runas yuyarikunankupaj angelesta kamachej Jehová Diosmanta. Paykunaqa ñakʼarichisqa kasqankurayku Jehová Diosman qhaparikonqanku. Diostaj uj sumaj salvajta paykunaman kachanqa, chaytaj paykunata salvanqa.
21 Jehová Diosqa egipcioswan rejsichikonqa. Chay pʼunchayqa egipcios Jehová Diosta rejsenqanku, paypajtaj ofrendasta, tʼinkastawan apaponqanku. Jehová Diosman nenqanku imatachus ruwapunankuta, chaytataj ruwaponqankupuni.
22 Jehová Diosqa Egiptota castiganqa,+ castiganqataj jampenqataj. Paykunaqa Jehová Diosman kutirenqanku, paytaj mañakusqankuta uyarispa jampenqa.
23 Chay pʼunchayqa Egiptomanta Asiriaman rinapaj uj ñan kanqa.+ Chayninta Asiriaqa Egiptoman yaykonqa, Egiptotaj Asiriaman. Egiptoqa Asiriawan khuska Diosta sirvenqa.
24 Chay pʼunchay Israelqa Egiptomanwan Asiriamanwan ujchaykukonqa,+ jallpʼa chaupipitaj uj bendición kanqa.
25 Angelesta kamachej Jehová Diosqa kay jinata bendicenqa: “Bendecisqa kachun nacionniy Egiptoqa, makiypa ruwasqan Asiriapis, herenciay Israelpis”,+ nispa.
Sutʼinchaykunasnin
^ Chayri “mallasninkuta”.
^ Faraonqa mana sutichu, manaqa Egiptomanta reyesta faraón nej kanku.
^ Chayri “Menfismanta”.
^ Chayri “engañachikunku”.
^ Uj aylloqa uj familiamanta miraj ashkha familias kanku.
^ Ichá nillanmantaj “ni palmera ramapis, ni caña huecapis”.
^ Linde: waj lugarespi ninku lindero.
