Isaías 21:1-17
21 Kay willayqa kashan mar qocha kantupi chʼin jallpʼaj* contranpi:+
Sur ladota* picharparej sinchʼi wayras jina jamushan,chʼin jallpʼamantapacha, mancharina jallpʼamantapacha.+
2 Mosqoypi jina mancharinata rikuni:
Wasanchaj nacionqa wasanchashan,thuñej llajtapis thuñishan.
Elam, wichariy. Media,+ maqanakoj wichariy.
Noqaqa chay tukuynin rikhurichisqan llakiyta chinkachisaj.+
3 Chayrayku may llakisqa kashani.+
Nanaywan qʼewiykachakuni,nacechikoj warmi jina.
Llakisqa kasqaypi niña uyariytapis munanichu,mancharisqa kasqaypi niña rikuytapis munanichu.
4 Sonqoyqa sayapunayan, manchariywanqa ukhuypis ras niwan.
Tutayanallantaña suyaj kani, kunantaj manchachikuni tutayananta.
5 Mesaman mikhunasta churaychej, tiyanastapis wakichiychej.
Mikhuychej, ujyaychej.+
Kuraj kamachejkuna, sayarikuychej, jarkʼakuna escudota aceitewan jawiykuychej.
6 Jehová Diosqa kay jinata niwarqa:
“Rispa uj qhawaj runata churamuy, rikusqanta willananpaj”, nispa.
7 Paytaj uj maqanakuna carretata rikorqa iskay caballoswan aysasqata,uj maqanakuna carretata burroswan aysasqata,uj maqanakuna carretata camelloswan aysasqata.
Allinta qhawarqa, sumajtapuni qhawarqa.
8 Chantataj uj león jina qhaparerqa:
“Jehová Diosníy, pʼunchayqa qhawana torrepi sayasqa kani,sapa chʼisitaj qhawanay lugarpi kani.+
9 Qhawariy imachus jaqayninta jamushasqanta:
Runas jamushanku iskay caballoswan aysasqa maqanakuna carretapi”,+ nispa.
Chantá qhaparispa nerqa:
“Urmanña. Jatun Babilonia urmanña.+
Payqa Babiloniaj tukuynin santosninta pampaman choqaspa tʼunaran”,+ nispa.
10 Nacionníy, trigo jina trillasqa karqanki.
Qanqa eraypi* oqharisqa poqoy kanki.+
Qankunaman willarqaykichej angelesta kamachej Jehová Diospa nisqanta, Israelpa Diosninpa nisqanta.
11 Kay willayqa Dumaj* contranpi kashan:
Seirmantapacha pichá qhaparimushawan:+
“Qhawaj runa, ¿sutʼiyamonqañachu?
Qhawaj runa, ¿sutʼiyamonqañachu?”, nispa.
12 Qhawaj runataj kutichin:
“Sutʼiyamonqaña, chʼisiyamonqaña.
Tapukuyta munaspaqa tapukullaychej.
Ujtawan jamullaychej”, nispa.
13 Kay willayqa chʼin pampaj contranpi kashan:
Dedanmanta+ jamoj viajeros,chʼisenqa chʼin pampaj montenpi puñunkichej.
14 Temá jallpʼapi tiyakojkuna,chʼakichikojman yakuta apaychej,+ayqekojmanpis tʼantata jaywamuychej.
15 Paykunaqa espadawan wañuchisqa kaymanta ayqekunku, jallchʼananmanta orqhosqa espadamanta,matʼisqa flechana arcomanta,* wañuchinaku maqanakumantapis.
16 Jehová Diosqa kayta niwarqa: “Uj watamantawan Quedarpa+ tukuy jatun kaynenqa tukukaponqa. (Chay wataqa yupasqa kanqa imaynatachus peonqa trabajasqan watasta allinta yupakun ajinata).*
17 Quedarmanta flechaj soldadosqa pisillaña puchonqanku, Israelpa Diosnin Jehová nisqanrayku”, nispa.
Sutʼinchaykunasnin
^ Mar qocha kantupi chʼin jallpʼa nispaqa ñaupa Babiloniamantasina parlashan.
^ Chayri “Ura ladota”.
^ Dumá suteqa niyta munan chʼin.
^ Flechana arco: waj lugarespi ninku camba flecha.
^ Chayqa niyta munan wata cabalpi juntʼakunanta.