Isaías 36:1-22
36 Ezequiasqa 14 watastaña Judapi kamachisharqa. Chaypachataj Asiria nacionpa reynin+ Senaqueribqa Judá nacionpa sumaj perqasniyoj llajtasninman yaykuspa japʼikaporqa.+
2 Chantá Asiriaj reynenqa Lakís llajtamanta+ Jerusalenman kacharqa rabsaqueta,*+ may chhika soldadostawan rey Ezequiaspaman. Chayaspataj sayaykorqanku pata estanquej larqʼan chaynejpi,+ tʼajsadorpa jallpʼanman rej ñanpi.+
3 Paywan tinkojtaj llojsimorqa Hilquiaspa wawan Eliaquim,+ payqa reypa wasinmanta* cargoyoj karqa, llojsimullarqataj reypa secretarion Sebná,+ chantá Asafpa wawan Joapis, payqa reypa qhelqerin karqa.
4 Rabsaquetaj paykunata nerqa: “Ezequiasman nimuychej: ‘Asiria nacionpa atiyniyoj reynenqa kayta nin: “¿Imaykichejmantaj atienesqa kashankichej?+
5 Qanqa nishanki: ‘Sumaj wakichisqa kashani, soldadosniypis may chhika tiyapuwan guerrapi tinkunaypaj’, nispa. Chaytaqa qhasita parlashanki. ¿Pimantaj atienekushankichej contraypi oqharikunaykichejpajri?+
6 Qanqa Egipto nacionman atienekushanki. Egiptoqa pʼakisqa caña hueca jinalla, pipis payman atiykukojtenqa makinta tʼojsispa pasarpachin. Ajinata ruwan Egiptoj reynin faraonqa* pikunachus paypi atienekunku chaykunata.+
7 Chantá sichus niwankichejman ‘noqaykoqa Jehová Diosniykupi atienekuyku’ nispa chayqa, ¿nichu Ezequiasqa chay Diosniykichejpa pata lugaresninta, altaresnintapis urmacherqa?+ ¿Nichu Ezequiasqa chaykunata urmachishaspa Judatapis Jerusalentapis nerqa ‘kay altarpa ñaupaqellanpi kʼumuykukunkichej’ nispa?”’.+
8 A ver, Asiriamanta señorniy reywan apuestata ruwaychej:+ 2.000 caballosta qosqayki, a ver atinkichus chay chhika runasta conseguiyta chay caballospi montanankupaj.
9 Egipto nación carretaswan, caballospi purej soldadoswan yanapasunkichejman chaypis, mana atipawajchejchu señorniypa aswan mana kasuy kamachillantapis.
10 ¿Acaso noqaqa gustuymantachu kay nacionta tukuchej jamushani? ¿Jehová Diospa mana kachamusqallanchu jamushani? Noqataqa Jehová Diospuni kachamuwan: ‘Rispa chay nacionta tukuchimuy’, nispa”.
11 Chayta uyarispa Eliaquimwan, Sebnawan,+ Joawanqa rabsaqueta+ nerqanku: “Ama jina kaspa, kay kamachisniykitaqa arameollapi*+ parlawayku, chaytaqa sutʼita entiendeyku. Ama parlawaykuchu judiospa parlayninkupeqa, perqa pataspi kashanku chay runaspa uyarinankutaqa”,+ nispa.
12 Rabsaquetaj nerqa: “Señorneyqa mana qankunallamanchu, nitaj señornillaykichejmanchu kay imasta ninaypaj kachamuwan. Perqa pataspi tiyashanku chay runaspis uyarinanku tiyan, paykunapis qankunawan khuska akankuta* mikhonqanku, jispʼayninkutapis ujyanqanku”, nispa.
13 Chayta niytawan rabsaqueqa sayarispa judiospa parlayninkupi+ sinchʼita qhaparerqa: “Uyariychej Asiriamanta atiyniyoj reypa nisqanta.+
14 Asiriamanta reyqa kayta nisunkichej: ‘Ama Ezequiasta creeychejchu. Payqa manapuni salvasonqachejchu.+
15 Ezequiasqa Jehová Diospi atienekunaykichejpaj nisonqachej:+ “Jehová Diosqa salvawasunpuni. Asiriaj reynenqa mana kay llajtata japʼikaponqachu”, nispa. Ama creeychejchu.
16 Ama Ezequiasta uyariychejchu. Kaytamin Asiriaj reynin nisunkichej: “Noqawan allinyakuychej, mandoymantaj churakuychej. Chaywanqa sapa ujniykichej uva sachʼaykichejmanta, higo sachʼaykichejmantapis mikhunkichej, yakutapis estanqueykichejmanta ujyankichej.
17 Chayta ruwankichej jamunaykama. Chantá noqa waj lugarman pusasqaykichej, chay lugarqa kay jallpʼaykichej jinallataj.+ Chay jallpʼaspeqa sumajta poqorin trigo, grano,* uvaspis, chaywanqa tʼantatapis vinotapis ruwakunkichej.
18 Ama Ezequiasta kasuychejchu, payqa llullakushasunkichej: ‘Jehová Dios salvawasunchej’, nispalla. ¿Mayqen diostaj nacionninta salvasqa Asiriaj reyninpa makinmantari?+
19 ¿Maytaj Hamat llajtaj diosnin, Arpad llajtaj diosninpis?+ ¿Maytaj Sefarvaim llajtaj diosninpis?+ Chay diosesqa mana Samaria llajtata makiymanta salvayta aterqankuchu.+
20 Chay nacionespa tukuynin diosesninkumanta, ¿mayqen diostaj nacionninta makiymanta salvasqari? ¿Chanta Jehová Diospunichu Jerusalentaqa makiymanta salvayta atinman?”,+ nispa’”.
21 Paykunatajrí chʼinlla karqanku, ni uj simita kuticherqankuchu, imajtinchus rey Ezequiasqa paykunata kamachisqa: “Ama imatapis kutichinkichejchu”,+ nispa.
22 Chantá Hilquiaspa wawan Eliaquim, pichus reypa wasinmanta* cargoyoj karqa chay, chantá reypa secretarion Sebná,+ Asafpa wawan Joapis, pichus reypa qhelqerin karqa chay, kinsantinku rey Ezequiaspaman rerqanku ropasninku llikʼirasqa, rabsaquej nisqantataj willarqanku.
Sutʼinchaykunasnin
^ Chayri “coperospa kamachejninkuta”.
^ Chayri “reypa kamachina wasinmanta”.
^ Faraonqa mana sutichu, manaqa Egiptomanta reyesta faraón nej kanku.
^ Chayri “siriacollapi”.
^ Aka: waj lugarespi ninku jatun jispʼay.
^ Grano: waj lugarespi ninku cebada.
^ Chayri “reypa kamachina wasinmanta”.
