Isaías 49:1-26
49 Yaku chaupipi kaj churus,* uyariwaychej.
Karupi kaj naciones, allinta uyariwaychej.+
Jehová Diosqa niraj nacekushajtiy wajyawarqaña,+mamaypa wijsallanpiraj kashajtiy sutiymanta wajyawarqaña.
2 Simiytaqa sumaj filoyoj espadata jina ruwarqa.
Makinpa llanthunpi pakaykuwarqa.+
Filochasqa flechaman jina tukuchiwarqa,flecha apaykachananman pakaykuwarqa.
3 Niwarqataj: “Israel, qan kamachiy kanki,+qanpi jatun kʼanchayniyta rikuchisaj”,+ nispa.
4 Noqatajrí nerqani: “Qhasillata manchayta trabajani.
Kallpaytapis qhasillata tukuchini.
Chaywanpis Jehová Dios juzgawan,*tʼinkaypis* Diosniymanta jamun”,+ nispa.
5 Kunanqa Jehová Diosmin, pichus wijsallapiraj kashajtiy kamachinta jina ruwawarqa,pay niwan Jacobta kutichimunayta,Israel paywan tinkukunanpaj.+
Noqaqa Jehová Diospa ñaupaqenpi jatunchasqa kasaj,Diosneyqa kallpay kanqa.
6 Payqa nerqa: “Mana kamachillaychu kankiJacobpa ayllusninta* oqharinaykipaj,Israelmanta puchojkunatapis kutichimunaykipaj.
Qantaqa churallarqaykitaj nacionespa kʼanchaynin kanaykipaj,+salvacionniypis jallpʼaj karu kʼuchusninkama chayananpaj”,+ nispa.
7 Jehová Diosqa, Israelta Kacharichej Diosqa, Israelpa Santo Diosnenqa,+ pisipaj qhawasqa kajta nin,+ pitachus chay nación chejnikun, kamachejkunaj kamachintaj, chayta nin:
“Reyesqa rikuspa sayarikonqanku,kuraj kamachejkunapis kʼumuykukonqankuJehová Diosrayku, atienekunapaj jina Diosrayku.+
Payqa Israelpa Santo Diosnin, qantataj ajllakusorqa”,+ nispa.
8 Jehová Diosqa kayta nin:
“Allin tiempopi uyarerqayki,+salvakuna pʼunchaypi yanaparqayki.+
Jarkʼakullarqaykipuni runasman uj tratota jina qosunaypaj,+jallpʼata watejmanta mosojyachinaypaj,chʼinpacha qhepakorqa chay herenciasninkuta watejmanta japʼikapunankupaj,+
9 presos kajkunata ninankupaj ‘llojsimuychej’ nispa,+laqhapi kajkunata+ ninankupaj ‘sutʼiman llojsimuychej’ nispa.
Mikhunataqa ñan pataspi tarenqanku,pastopis tukuynin purina ñan pataspi* paykunapaj kanqa.
10 Paykunaqa mana yarqhayta pasanqankuchu, ni yaku chʼakiytapis,+ni ruphaypis, ni intipis paykunata ruphanqachu.+
Paykunata khuyakojmin paykunataqa pusaykachanqa,+yaku juturisnintataj pusanqa.+
11 Tukuynin orqosniyta ñanman tukuchisaj,ancho ñankunasniytapis altochasaj.+
12 Kaykunaqa karumanta jamushanku,+kaykunataj norte ladomanta,* inti yaykuy ladomanta jamushanku,kay ujkunataj Sinim nacionmanta jamushanku”.+
13 Cielos, kusiywan qhapariychej, jallpʼa, qanpis kusikuy.+
Orqosqa kusikuchunku, kusiywantaj qhaparichunku.+
Jehová Diosqa nacionninta sonqochan,+ñakʼarejkunatapis khuyakun.+
14 Siontajrí nishallarqapuni:
“Jehová Dios saqerpariwan,+ Jehová Dios qonqawan”,+ nispa.
15 ¿Uj warmeqa ñuñoj wawitanmanta qonqapunmanchu?
¿Wijsanpi apasqan wawanta nichu khuyanman?
Warmis qonqapunkuman chaypis, noqaqa ni jaykʼaj qanmanta qonqapusajchu.+
16 Sutiykitaqa makiyman qhelqaykuni.
Perqasniykeqa ñaupaqellaypipuni kashanku.
17 Wawasniykeqa usqhayllata kutimushanku.
Thuñiykusojkuna, chʼusajpachata saqerpasojkuna qanmanta karunchakonqanku.
18 Umaykita oqharispa muyuyniykita qhawariy.
Tukuyninku tantakushanku.+
Qanpaman jamushanku.
Jehová Diosqa nin: “Kausayniyrayku jurani:
Qanqa tukuyninkuwan pʼachallikunki, kʼachanchanaspis kankuman jina,paykunawan kʼachanchakunki, noviapis kawaj jina.
19 Tiyakusqayki lugares thuñisqa kajtinpis, mana runayoj kajtinpis, jallpʼaykipis llakiyllaña kajtinpis,+kunanqa chaypi tiyakojkunapaj ancha juchʼuy kanqa,+tukuykusorqanku chaykunapis+ manchay karupi kanqanku.+
20 Wawasniykita pierdesqaykimanta qhepaman nacej wawasniykeqa nisonqanku:
‘Kay lugarqa ancha juchʼuysitu noqapaj.
Campochapuway kaypi tiyakunaypaj’,+ nispa.
21 Sonqoykipitaj ninki:
‘Wawasneyqa wañupunku, manataj wawata rejsiyta atinichu,waj ladoman apawanku, presochasqataj kashani.
¿Pitaj kay wawasta qowanri?
¿Pitaj uywarqari?+
Noqaqa sapallay qhepakorqani.+
¿Maymantá chanta kay wawas rikhurimunkuri?’,+ nispa”.
22 Tukuyta Kamachej Señor Jehová Diosqa nin:
“Makiyta nacionespaj oqharisaj,señalniytapis llajtaspaj oqharisaj.+
Qhari wawasniykitaqa makipi chayachimonqanku,warmi wawasniykitapis qʼepispa chayachimonqanku.+
23 Reyes qhawasonqanku,+princesasninkutaj wawasniykita uywanqanku.
Ñaupaqeykipi pampakama kʼumuykukonqanku,+chakisniykimantapis jallpʼata llajwanqanku,+yachankitaj noqa Jehová Dios kasqayta.
Noqapi atienekojkunaqa mana pʼenqaypi rikhurenqankuchu”.+
24 ¿Wapu soldadomantaqa presochasqan runasta qhechuyta atikullanchu?
¿Sajra runamantapis presochasqan runasta kacharichiyta atikullanchu?
25 Jehová Diostajrí kayta nin:
“Wapu soldadomantapis presochasqan runasta qhechonqanku,+sajra runamantapis presochasqan runasta kacharichenqanku.+
Qanman sayaykojkunamanqa noqa sayaykusaj,+wawasniykitapis salvasaj.
26 Ñakʼarichisojkunamanqa kikin aychallankutataj mikhuchisaj,yawarnillankuwantaj machaykonqanku miskʼi vinowan jina.
Tukuy runas yachanqanku noqa Jehová Dios kasqayta,+Salvasojniyki Dios,+ Kacharichisoj Dios,+Jacobpa Atiyniyoj Diosnin”,+ nispa.
Sutʼinchaykunasnin
^ Chayri “Islas”.
^ Chayri “Jehová Dios justiciata ruwapuwanqa”.
^ Chayri “pagoypis”.
^ Uj aylloqa uj familiamanta miraj ashkha familias kanku.
^ Ichá nillanmantaj “qʼara lomaspi”.
^ Chayri “pata ladomanta”.
