Isaías 7:1-25
7 Rey Ajazqa*+ Judapi kamachisharqa, payqa Jotanpa wawan karqa, Uziaspa allchhintaj. Chaypacha Siriaj reynin Rezinwan, Remaliaspa wawan Israelpa reynin Pecahwan,+ Jerusalén llajtaman maqanakoj wicharerqanku. Nitaj atipayta aterqankuchu.*+
2 Davidpa gobiernonpa kamachina wasinmanqa willarqanku: “Siriaqa Efrainwan ujchaykukun”, nispa.
Ajazwan chay llajtamanta runaswantaj mancharispa kharkatiterqanku wayraj kuyuchisqan monte sachʼas jina.
3 Jehová Diostaj Isaiasta nerqa: “Ama jina kaspa qanwan wawayki Sear-Jasubwan* rispa Ajazwan parlamuychej,+ pata estanquej larqʼan chaynejpi,+ tʼajsadorpaj jallpʼanman rej ñanpi.
4 Paytaqa ninki: ‘Allinta qhawarikuy, sonqo tiyasqalla kay. Amataj manchachikuychu, nitaj qʼewakuychu chay iskay qʼoshñishaj llantʼasta rikuspa. Ama manchachikuychu Siriaj reynin Rezinpa sinchʼi phiñakuyninta, nitaj Remaliaspa wawanpa sinchʼi phiñakuynintapis.+
5 Siriawan, Efrainwan, Remaliaspa wawanwanqa, contraykipi jamunankupaj yachachinasqaña kashanku. Paykunaqa ninkuña:
6 “Judawan maqanakoj wicharina, qʼalata thuñiykamuna,* japʼikanpunataj.* Chantá Tabeelpa wawanta chaypi rey kananpaj churasunchej”,+ nispa.
7 ”’Tukuyta Kamachej Señor Jehová Diosqa nin:
“Chayqa mana allinchu llojsenqa,mana ajinachu kanqa.
8 Siriaj capitalnenqa Damasco,Damascoj reynintaj Rezín.
Efraintaqa 65 watasmantawan qʼalata thuñiykonqanku,manañataj uj nacionchu kanqa.+
9 Efrainpa capitalnenqa Samaria,+Samariaj reynintaj Remaliaspa wawan.+
Manachus sinchʼi creeyniyoj kankichej chayqa,mana sumaj sayachisqachu kankichej”’”.
10 Jehová Diosqa Ajazta nillarqataj:
11 “Jehová Diosniykimanta uj señalta mañakuy.+ Chay señalqa Sepultura jina* allin ukhu kanman chayri cielo jina may alto kanman”, nispa.
12 Ajaztajrí nerqa: “Mana imatapis mañakusajchu, nitaj Jehová Diosta pruebaman churasajchu”, nispa.
13 Isaiastaj nerqa: “Qankuna Davidpa gobiernonpa kamachina wasinpi kajkuna, ama jina kaspa uyariwaychej. ¿Nichu runata rabiachispa kusisqaña kankichej? ¿Diostawanchu rabiachiyta munashankichej?+
14 Chayrayku Jehová Diosqa kay señalta qosonqachej: Sipasqa* onqoj rikhurenqa, uj qhari wawatataj nacechikonqa,+ chay wawamantaj Emmanuel* sutita churanqa.+
15 Chay wawaqa mana allin kajta qhesachayta yachajtinña, allin kajtapis ruwayta yachajtinña, mantequillatawan miskʼitawan mikhonqa.
16 Niraj chay wawa mana allin kajta qhesachayta yachashajtin, niraj allin kajtapis ruwayta yachashajtin, manchachikushanki chay iskay reyespa jallpʼasninkoqa qʼala saqerasqa kanqa.+
17 Jehová Diosqa contraykita, llajtaykej contranta, tataykej familianpa contrantapis uj llakiy tiempota apamonqa. Chay jina llakeyqa manaraj karqachu Efraín Judamanta tʼaqakusqanmantapacha.+ Diosqa Asiriaj reyninta contraykita kachaykamonqa.+
18 ”Chay pʼunchay Jehová Diosqa silbarispa wajyanqa chay Egiptoj karu Nilo mayunpi kaj chʼuspista, Asiria jallpʼasmanta abejastawan.
19 Chaykunaqa jamuspa tiyaykonqanku ukhu mayuspi,* chhanka kʼajlluspi,* tukuynin khishkararaspi, uywas yakuta tomanku chay tukuynin lugarespipis.
20 ”Chay pʼunchay Jehová Diosqa Mayu* chaynejmanta uj navajata alquilakonqa, Asiriaj reyninta.+ Chaywan payqa tukuynin umasta pʼajlanqa, chakismanta pelostapis barbastapis* navajawan rasuranqa.
21 ”Chay pʼunchay uj runaqa uj malta wakata, iskay ovejastawan tropanmanta puchuchenqa.
22 Ashkha leche kasqanrayku chay runaqa mantequillata mikhonqa, chay nacionpi tukuy puchojkunapis mantequillatawan miskʼitawan mikhonqanku.
23 ”Chay pʼunchayqa, maypichus waranqa uva sachʼas karqa waranqa qolqes* valorniyoj chaypeqa, khishkaswan qhorasllawanña kanqa.
24 Runasqa chayman renqanku flechana arcosniyoj,* flechasniyoj, chay tukuynin nacionman khishkaswan qhoraswan juntʼaykusqanrayku.
25 Azadonwan pichaj kanku chay orqosmanqa khishkasta, qhorasta manchachikuspa manaña chimpayta atinkichu. Chay orqospeqa torosllaña, ovejasllaña mikhonqanku”.
Sutʼinchaykunasnin
^ Ichá nillanmantaj “Nitaj atipayta aterqachu”.
^ Sear-Jasub suteqa niyta munan pisi puchoj runaslla kutimonqanku.
^ Ichá nillanmantaj “mancharichimuna”.
^ Chayri “perqantataj uj trechota qʼasaykamuna”. Hebreo parlaypeqa nin, “lajramuna”.
^ Chayri “Doncellaqa”.
^ Emmanuel suteqa niyta munan Dios noqanchejwan kashan.
^ Chayri “wayqʼospi”.
^ Kʼajllu: waj lugarespi ninku kʼallka.
^ Mayu nispaqa Éufrates mayumanta parlashan.
^ Barba: waj lugarespi ninku chhunka, sunkha.
^ Chay qolqesqa qolqe metalmanta ruwasqa karqa.
^ Flechana arco: waj lugarespi ninku camba flecha.
