Jeremías 12:1-17
12 Jehová Diosníy, qanqa cheqan kanki,+ qanman quejayta apamojtiy,justiciamanta qanwan parlajtiypis.
Chanta, ¿imajtintaj sajra runasta allin rin tukuy ima ruwasqankupiri?+
¿Imajtintaj wasanchaj runas mana imamanta llakikuspa kausankuri?
2 Paykunata plantarqanki, paykunataj saphichakorqanku.
Paykunaqa wiñarqanku, poqorqankutaj.
Paykunaqa simillankuwan qanmanta parlanku, sonqonkutajrí qanmanta karupi kashan.+
3 Jinapis Jehová Diosníy qanqa sumajta rejsiwanki,+ qhawamushawankitaj.
Qanqa sonqoyta allinta qhawaykorqanki, rikorqankitaj sonqoyqa qanpaj kasqanta.+
Chay runastaqa ñakʼanapaj* ovejasta jina tʼaqay,wañuchina pʼunchaypaj tʼaqay.
4 ¿Maykʼajkamataj jallpʼaqa chʼakillapuni kanqari?
¿Maykʼajkamataj campopi qʼomerkunapis qawillanqankupuniri?+
Kay jallpʼapi tiyakojkuna sajra imasta ruwasqankurayku,animalespis pʼisqospis chinkapunku.
Paykunaqa nerqanku: “Payqa mana yachanchu qhepaman imachus pasanawanchejta”, nispa.
5 Diostaj niwarqa: “Runaswan correspallaraj saykʼunki chayqa,¿imaynatataj caballosta atipawajri?+
Maypichus allin kausay tiyan chaypeqa, ichapis ni imata manchachikunkichu.
Jinapis, ¿imaynataj risonqa Jordán monte ukhusman yaykojtiykiri?
6 Kikin hermanosnillaykitaj wasanchasunku,tataykej wasinpi tiyakojkunallataj wasanchasunku.+
Qanpa contraykita kallpawan qhaparinku.
Ama paykunapi confiaychu,miskʼi simiwan parlasojtinkupis.
7 ‘Noqaqa wasiyta saqepuni,+ herenciayta saqepuni.+
Munasqa llajtayta enemigosninpa makinman jaywaykuni.+
8 Herenciayqa montepi kaj leonman tukupun.
Contrayta qhaparirin.
Chayrayku paytaqa chejnikuni.
9 Herenciayqa tukuy laya* coloresniyoj* aycha mikhu pʼisqo jina.
Paytaqa waj aycha mikhu pʼisqos muyuykuspa maqanku.+
Tantakamuychej tukuy monte animales,mikhoj jamuychej.+
10 Ashkha ovejeros uvas huertayta pampata ruwarpanku.+
Noqapaj tʼaqasqa jallpʼayta saruranku.+
Aswan sumaj jallpʼayta chʼin jallpʼaman tukuchinku.
11 Jallpʼayqa chʼinpacha kashan,chʼakipacha kashan,*mana piniyoj ñaupaqeypi kashan.+
Tukuynin nacionnintinta chʼinta saqerparinku,nitaj pipis llakikojqa kanchu.+
12 Tukuchejkunaqa chʼin jallpʼaj tukuy ñankunasninta jamunku.
Jehová Diospa espadanqa nacionnintinmanta runasta wañuchishan, ujnin kantunmantapacha ujnin kantunkama.+
Ni pipaj allin kausay kanchu.
13 Paykunaqa trigota tarpuspapis, khishkasllata oqharerqanku.+
Qhasillata saykʼukorqanku.
Cosechata oqharisqankoqa paykunapaj pʼenqay kanqa,Jehová Diospa kʼajaj phiñakuyninrayku’, nispa”.
14 Jehová Diosqa kayta nin: “Tukuy sajra vecinosneyqa Israel llajtayman qosqay herenciata qallariykushanku.+ Chayrayku paykunataqa kay jallpʼamanta tʼirasaj,+ Judá naciontapis paykunaj chaupinkumanta tʼirallasajtaj.
15 Paykunata tʼiraytawanqa, watejmanta paykunata khuyakullasajtaj. Sapa ujninkuta herenciankuman, jallpʼankumanwan kutichimusaj”.
16 “Chay nacionesqa llajtayta yachacherqanku Baalpa sutinpi jurayta. Chaywanpis sichus paykuna sutiypi jurayta yachakuspa nenqanku, ‘kausaj Jehová Diospa sutinpi jurayku’ nispa chayqa, sitajchus llajtay jina imatapis ruwanqanku chayqa, llajtay ukhupi tiyakuyta atenqanku.
17 Sichus mayqen nacionllapis mana kasuwayta munanqachu chayqa, chay mana kasukoj naciontaqa tʼirasaj, tʼiraspa chinkachisaj”, nispa nin Jehová Diosqa.+
Sutʼinchaykunasnin
^ Ñakʼay: waj lugarespi ninku degollay, wañuchiy.
^ Chayri “chʼejchi”.
^ Chayri “tukuy rijchʼaj”.
^ Ichá nillanmantaj “waqashan”.
