Jeremías 13:1-27
13 Jehová Diosqa niwarqa: “Linomanta ruwasqa chumpita rantikamuy, chaytataj chumpiykukuy. Ama chay chumpitaqa yakuwan joqʼochankichu”, nispa.
2 Ajinapi noqaqa Jehová Dios niwasqanman jina uj chumpita rantikamorqani, chaywantaj chumpiykukorqani.
3 Chantá Jehová Diosqa ujtawan parlamuwaspa niwarqa:
4 “Chay rantisqayki chumpita, mayqentachus churakushankiña chayta apariykukuspa Éufrates mayuman riy, chaypi uj qaqa kʼajlluman* pakaykamuy”, nispa.
5 Chantá noqaqa rispa Éufrates mayu chaynejman chay chumpita pakaykamorqani, Jehová Dios kamachiwasqanman jina.
6 Unayninmantaj Jehová Diosqa niwarqa: “Sayarispa Éufrates mayuman riy. Pakamunaykita kamacherqayki chay chumpita oqharimuy”, nispa.
7 Chantá noqaqa Éufrates mayuman rerqani, chay chumpitataj maypichus pakarqani chay lugarmanta pʼamparaspa orqhomorqani. Chay chumpeqa qorwariyapusqa, niña imapajpis valesqachu.
8 Chantá Jehová Diosqa niwarqa:
9 “Jehová Diosqa kayta nin: ‘Kay chumpita jinallataj tukuchisaj Judá nación umata oqharisqanta. Ajinallatataj tukuchisaj Jerusalén mayta jatuncharikusqantapis.+
10 Kay sajra runasqa nisqasniyta mana kasukuyta munankuchu.+ Kʼullukuspa* sonqonkoj munaynillanta ruwanku.+ Paykunaqa waj diosesta yupaychanku, paykunata sirvispa, ñaupaqenkuman kʼumuykukuspa ima. Chayrayku paykunaqa chay chumpi jina ni imapaj valenqankuchu’, nispa.
11 Jehová Diosqa nillantaj: ‘Imaynatachus uj runa chumpiwan chumpiykukun, ajinallatataj noqapis ruwarqani Israel nacionwan, Judá nacionwanpis noqaman kʼaskasqa kanankupaj, llajtay kanankupaj,+ rejsisqa kanaypaj,+ alabasqa kanaypaj, jatunchasqa kanaypajtaj. Chaywanpis paykunaqa mana kasuwarqankuchu’,+ nispa.
12 ”Chantapis kayta willanayki tiyan: ‘Israelpa Diosnin Jehovaqa kayta nin: “Tukuy pʼuñus vinowan juntʼachisqa kanku”, nispa’. Paykunataj nisonqanku: ‘¿Nichu yachaykuña pʼuñusqa vinowanpuni juntʼachisqa kasqankuta?’, nispa.
13 Chayta nisojtinku qanqa ninki: ‘Jehová Diosqa kayta nin: “Noqaqa vinowan juntʼaykuchisaj kay nacionpi tukuy tiyakojkunaman,+ Davidpa kamachina tiyananman tiyaykukoj reyesman, sacerdotesman, profetasman, jinallataj Jerusalenpi tukuy tiyakojkunamanpis. Paykunamanqa vinowan juntʼaykuchisaj machaykunankukama.
14 Paykunataqa paykunapurata chʼallpanachisaj. Tatastapis wawastapis kikinta ruwasaj.+ Mana paykunataqa khuyakusajchu, mana sonqoyta nanachikusajchu, nitaj paykunamanta llakikusajchu. Paykunataqa tukuchisajpuni, ni ima jarkʼawanqachu”,+ nispa nin Jehová Diosqa’.
15 Sumajta uyariychej.
Ama umata oqhariychejchu, Jehová Diosmin parlamun.
16 Jehová Diosniykichejta jatunchaychej,niraj pay laqhayachimushajtin.
Pajtataj laqhayaykojtin chakisniykichejta jaytʼakuspa* orqospi chankaykachashawajchej.*
Qankunaqa kʼanchayta suyakushankichej,Diostajrí sinchʼita laqhayachimonqa.
Payqa kʼanchayta manchay laqhaman tukuchenqa.+
17 Sichus mana uyariwayta munankichejchu chayqa,pakaypi waqasaj chay jinata jatunchakusqaykichejmanta.
Sinchʼita waqasaj, ñawisneyqa waqaywan juntʼa kanqa.+
Imaraykuchus Jehová Diospa ovejitasninta presosta apakapunku.+
18 Kayta nimuy reyman, reypa mamanmanpis:+ ‘Kamachina tiyanaykichejmanta uraykuychej.
Imaraykuchus kʼachitu coronaykichejqa umaykichejmanta urmaponqa’, nispa.
19 Sur lado* llajtaspa punkusninkoqa wisqʼasqa* kashanku, nitaj pipis kicharej kanchu.
Tukuynin Judá nacionta presota apakapunku, tukuyninkutapuni presosta apakapunku.+
20 Qhawariy norte ladomanta* jamojkunata.+
¿Maypitaj kashanku qanman qosorqanku chay munasqa ovejitasniykiri?+
21 Qallariymantapacha munasqa amigosniykipaj qhawakorqanki chaykunacastigota chayachimusojtinku, ¿ima ninkitajri?+
¿Manachu chaypacha qanmanqa nacechikoj warmej nanaynin jina chayamusonqa?+
22 Maypachachus sonqoykipi ninki ‘¿imajtintaj kay imas qhatiriwanri?’+ nispa,chaypacha yachanki juchaykirayku faldaykita qhechuchikusqaykita,+chaki talonesniykitapis sinchʼita nanachikusqaykita.
23 ¿Etíope runaqa atinmanchu aychanta waj colorman cambiayta? ¿Chʼejchi leonpis* atinmanchu chʼejchisninta chinkachiyta?+
Atinkuman chayqa, qankunapis allin kajta ruwayta atiwajchej,ajina sajra ruwayman amañasqa kashaspapis.
24 Chayrayku qankunataqa qhallarparisqaykichej* chʼin jallpʼamanta wayraj apaykachasqan pajata jina.+
25 Jerusalén, chaymin qanta qhatirisonqa. Chaytamin qanman qoyki,noqata qonqawasqaykirayku,+ llulleriostataj creesqaykirayku,+ nispa nin Jehová Diosqa.
26 Chayrayku faldaykita umayki patakama oqharisaj,runastaj pʼenqayniykita rikonqanku.+
27 Rikullanqankutaj qhenchachakusqaykita,+ caballo jina qʼoñirisqa correykachasqaykita,millayta* qhenchachakusqaykita.
Lomaspi, pampaspi,millayta purisqaykita rikuni.+
Ay Jerusalén, imanallankichus.
¿Maykʼajkamataj chay jina millayta purillankipuniri?”.+
Sutʼinchaykunasnin
^ Kʼajllu: waj lugarespi ninku kʼallka.
^ Chayri “Tercos kaspa”.
^ Jaytʼakuy: waj lugarespi ninku tropezakuy.
^ Chankaykachay: waj lugarespi ninku tharpiykachay, aylinkachay, thamaykachay.
^ Chayri “Sur lado llajtasqa muyuykusqa”.
^ Chayri “Ura lado”.
^ Chayri “pata ladomanta”.
^ Chayri “Leopardopis”.
^ Qhallay: waj lugarespi ninku qhalliy.
^ Chayri “pʼenqayta”.
