Jeremías 14:1-22
14 Jehová Diosqa kayta Jeremiasman nerqa chʼaki watasmanta:+
2 Judá nacionqa llakiymanta waqashan.+ Punkusnenqa urmarapunku.
Punkusnenqa sinchʼi llakisqa pampaman wijchʼukunku.
Jerusalenmantapachataj uj llakiy qhapariy uyarikun.
3 Patronesqa kamachisninkuta yakuman kachanku.
Kamachisninkutaj yaku estanquesman* rinku, nitaj uj chhika yakullatapis tarinkuchu.
Chʼusaj yurusninkuwan kutinpunku.
Paykunaqa pʼenqakuspa, llakikuspataj
umankuta qhataykukunku.
4 Jallpʼaqa chʼakipuspa pʼakirakushan.
Mana parasqanrayku pʼakirakushan.+
Chayrayku tarpojkunaqa sinchʼita llakikuspa umankuta qhataykukunku.
5 Tarukapis recién wachakusqan uñitanta saqerparin,pasto mana kasqanrayku.
6 Kʼita burrospis qʼara lomaspi purikushanku,kʼita alqos jina ñakʼayllataña samashanku,pastomanta jina chharpullataña qhawashanku.+
7 Jehová Diosníy, juchasnillaykutaj juchachawayku chaypis,sutiykirayku yanapariwayku ari.+
Wasanchasusqaykoqa may chhikapuni.+
Noqaykoqa qanpa contraykita juchallikuyku.
8 Qanmin Israelpa suyakuynin kanki, qanmin llakiy tiempopi Israelpa salvajnin kanki.+
¿Imajtintaj kay nacionpi forastero jinalla kankiri?
¿Imajtintaj uj chʼisillata qheparikoj forastero jina kankiri?
9 ¿Imajtintaj tʼukushaj runa jina kankiri?
¿Imajtintaj atiyniyoj kashaspa mana salvayta atiwaykuchuri?
Jehová Diosníy, qanqa noqayku ukhupi kashanki,+noqaykutaj qanpa sutiykita apayku.+
Ama saqerpariwaykuchu ari.
10 Jehová Diosqa kay runasmanta kayta nin: “Paykunaqa gustachikunku kayman jaqayman puriyta.+ Mana chakisninkuta mandarikunkuchu.+ Chayrayku Jehová Diosqa paykunawan mana kusisqachu kashan.+ Payqa pantasqasninkumanta yuyarikonqa, juchasninkumantataj cuentata mañanqa”,+ nispa.
11 Chantá Jehová Diosqa niwarqa: “Ama mañakuwaychu kay runasta allin rinantaqa.+
12 Paykuna ayunaspa rogakuwasqankutaqa mana uyarinichu.+ Qʼolachina* ofrendasta, chʼaki mikhuy ofrendasta jaywawasqankutapis mana japʼikunichu.+ Paykunataqa espadawan tukuchisaj, yarqhaywan, wañuchej onqoywan ima”,+ nispa.
13 Chantá noqa nerqani: “Tukuyta Kamachej Señor Jehová Diosníy, profetasqa runasman kayta nishanku: ‘Qankunaqa mana espadata rikunkichejchu, nitaj yarqhaytapis pasankichejchu. Diosmin kay lugarpi allin kausayta qosonqachej’,+ nispa”.
14 Jehová Diostaj niwarqa: “Profetasqa llullakuspa sutiypi parlashanku.+ Mana noqaqa paykunata kachamunichu, nitaj imatapis kamachinichu, nillataj imatapis ninichu.+ Paykunaqa parlashanku mosqoypi jina llulla imasta rikusqankumanta, qhepaman imachus kananmanta llullakuspa willashanku, sonqonkupi kaj llulla imasllamanta parlashanku.+
15 Chayrayku Jehová Diosqa chay profetasmanta kayta nin: ‘Paykunaqa llullakuspa sutiypi willashanku. Mana noqachu paykunata kachamorqani. Paykunaqa nishanku kay nacionpeqa mana espadata rikunankuta, nitaj yarqhaytapis rejsinankuta. Jinapis chay profetas espadawan wañuchisqa kanqanku, chayri yarqhaywan wañonqanku.+
16 Pikunamanchus willashanku chay runastaj, Jerusalén callespi mastʼalla choqarayanqanku, yarqhaywan wañusqankurayku chayri espadawan wañuchisqa kasqankurayku. Ni pi paykunataqa pʼampanqachu,+ ni warmisninkuta, ni qhari wawasninkuta, nitaj warmi wawasninkutapis. Sajra imasta ruwasqankurayku ñakʼariyta paykunaman apachimusaj’,+ nispa.
17 ”Paykunaman kayta willamuy:
‘Ñawisneyqa waqaywan juntʼa kachun, tuta pʼunchay mana samarispa waqanaypaj.+
Llajtaypa doncella warmi wawanqa qʼala sarusqa, qʼala tʼunasqataj kashan.+
Nanasqanqa may sinchʼipuni.
18 Jawaman llojsispaqa,espadawan wañuchisqasta rikuni.+
Llajtaman yaykuspataj,yarqhaymanta runas onqosqankuta rikuni.+
Profetaspis sacerdotespis mana rejsisqanku jallpʼaspi thamaykachashanku’,+ nispa”.
19 ¿Imajtintaj Judá nacionta manañapuni rikuyta munankichuri? ¿Imajtintaj Siontapis chejnikapunkiri?+
¿Imajtintaj chay jinata jasutʼiwaykuri? Kunanqa niña ima jampipis noqaykupaj kanñachu.+
Allin kausay kananta suyarqayku, nitaj ima allinpis jamorqachu.
Sanoyachisqa kanayku tiempota suyasharqayku, jinapis manchariylla tiyan.+
20 Jehová Diosníy, noqaykoqa yachayku mana allintachu ruwasqaykuta,yachayku ñaupa tatasniykupis pantasqankuta.
Noqaykoqa qanpa contraykita juchallikuyku.+
21 Sutiykirayku ama qhesachawaykuchu ari.+
Jatunpaj qhawasqa kamachina tiyanaykitaqa ama pisipaj qhawaychu ari.
Yuyarikuy noqaykuwan uj tratota ruwasqaykita, amataj chaytaqa pʼakiychu.+
22 Waj nacionespa qhasi manakaj diosesninkoqa, ¿atinkumanchu parachimuyta?
¿Cielopis atinmanchu sapallanmanta parachimuyta?
Jehová Diosniyku, chay imastaqa qanlla ruwayta atinki.+
Qanllapi suyakuyku.
Imaraykuchus qanllamin chay tukuy imastaqa ruwanki.