Jeremías 15:1-21
15 Chantá Jehová Diosqa niwarqa: “Moiseswan Samuelwan ñaupaqeyman jamojtinkupis,+ manapuni kutikuymanchu kay nacionmanqa. Kay nacionqa ñaupaqeymanta chinkachisqa kachun, ripuchun.
2 ‘¿Imataj pasawasqaykuri?’ nispa tapusojtinkutaj, qanqa kutichinki: ‘Jehová Diosqa kayta nin:
“Wakenqa wañuchej onqoywan wañunkichej,wakintaj espadawan wañuchisqa kankichej,+wakintaj yarqhaywan wañunkichej,wakintajrí presos apasqa kankichej”,+ nispa’.
3 ”Jehová Diosqa nin: ‘Paykunamanqa kay tawa castigosta* apachimusaj:+ espadata apachimusaj paykunata wañuchinanpaj, alqosta kachamusaj paykunaj cuerposninkuta qhatatinankupaj, pʼisqosta, kay jallpʼapi purej animalestawan kachamusaj, paykunaj aychankuta mikhukapunankupaj, mitharanankupajtaj.*+
4 Kay nacionmanta runastaqa mancharinaman tukuchisaj. Kay jallpʼamanta tukuy gobiernosqa paykunata rikuspa mancharenqanku.+ Chaytaqa ruwasaj Ezequiaspa wawan Manasespa juchanrayku, Judamanta rey Manasés Jerusalenpi imatachus ruwasqanrayku.+
5 Jerusalén, ¿pitaj khuyakusonqari?
¿Pitaj qanmanta llakikonqari?
¿Pitaj jamuspa watusonqa imaynachus kashasqaykitari?’, nispa.
6 Jehová Dios nin: ‘Qanqa saqerpariwanki’.+
‘Qanqa sapa kuti qhepaman kutirispa noqamanta karunchakunki.+
Chayrayku noqaqa makiyta contraykita oqharispa chinkarpachisqayki.+
Saykʼuniña qanta khuyakusqaypi.
7 Paykunata jurkawan wayrarpachisaj kay nacionpa llajtasninpi.*
Paykunataqa mana wawasniyojta rikhurichisaj.+
Nacionniymanta runastaqa chinkachisaj.
Paykunaqa manapuni saqeyta munankuchu chay sajra ñanninkuta.+
8 May chhika warmis viudas rikhurenqanku, mar qocha kantupi tʼiyumanta aswan ashkha.
Las doce chayta enemigosta paykunaman kachaykusaj, jinallataj mamasman, wawasninkumanpis.
Paykunataqa ujllata musphaykachachisaj, mancharichisajtaj.
9 Qanchis wawasniyoj karqa chay warmeqa llauchʼiyapushan,
manaña samaytapis atinñachu.
Inteqa paypaj yaykupun pʼunchayllaraj kashajtin.
Paytaqa pʼenqaypi rikhurichinku, kʼumuykachachinkutaj’.
‘Paykunamanta chay pisi puchojkunataqa,enemigosninkoj espadanman entregaykusaj’, nispa nin Jehová Diosqa”.+
10 Ay mamáy, imanallasajchus. ¿Imapajtaj nacechikuwarqankiri?+
Nacionnintinmanta tukuy runasqa noqallawanpuni maqanakunku, noqallawanpuni japʼinakunku.
Noqaqa mana pimanpis manunichu, nitaj pimantapis manukunichu,jinapis tukuyninku maldeciwanku.
11 Jehová Diostaj niwarqa: “Noqa yanapasqayki.
Noqa qanrayku enemigoykiwan parlamusaj,ñakʼariy tiempopi kashajtiykipis, llakiy tiempopi kashajtiykipis.
12 ¿Atinmachu pipis fierrota pʼakirayta?
¿Atinmachu pipis norte ladomanta* fierrota chayri cobreta pʼakirayta?
13 Judá nación, qanpa tukuy kapuyniykita, tukuy qhapaj kayniykitapis enemigosniykiman jaywaykusaj.+
Paykunaqa ni mashkhata pagaspa apakaponqanku. Chayqa kanqa tukuy jallpʼasniykipi imaymana juchasta ruwasqaykirayku.
14 Chay imastaqa enemigosniykiman jaywaykusaj,mana rejsisqayki jallpʼaman apakapunankupaj.+
Chaytaqa ruwasaj phiñakuyniy nina jina laurarisqanrayku,phiñakuyniy contraykipi nina jina kʼajarisqanrayku”,+ nispa.
15 Jehová Diosníy, qan tukuy imata yachashanki.
Noqamanta yuyarikuy ari, uyariwaytaj.
Enemigosniymanta vengakuy.+
Ama paykunawan pacienciakuychu, nitaj wañojta saqewaychu.
Qanqa allinta yachanki qanrayku ima niwasqankutapis aguantasqayta.+
16 Palabrasniyki noqaman jamuwajtin, noqaqa chayta mikhuykakaporqani.+
Palabrasniykeqa sonqoypi kusiyman tukorqa, manchay jatun kusiyman tukorqa.
Angelesta kamachej Jehová Diosníy, noqamin sutiykita apani.
17 Kusirikunallapaj churasqa kajkunawanqa mana purinichu, nitaj paykunawan khuska kusirikunichu.+
Makiyki noqaj pataypi kasqanrayku sapallay kakuni.
Qanqa phiñakuywan juntʼaykuchiwanki, paykuna sajra imasta ruwasqankurayku.+
18 ¿Imajtintaj onqoyniy allin sinchʼiri? ¿Imajtintaj nanayniypaj mana jampi kanchuri?
Onqoyneyqa manapuni sanoyayta munanchu.
¿Qanqa chʼakipoj yaku juturiman jinachu noqapaj tukunki?
¿Chay mana atienekunapaj yaku juturiman jinachu tukunki?
19 Chayrayku Jehová Diosqa kayta nin:
“Sichus cambianki chayqa, noqaqa watejmanta allinpaj qhawasqayki,qanpis ñaupaqeypi noqata sirvillawankipuni.
Sichus valorniyoj imasta, mana valorniyoj imasmanta tʼaqanki chayqa,kikin simiypis kawaj jina kanki.*
Chaypacha paykunaqa qanman kutimonqanku,chaywanpis qanqa mana paykunaman kutinkichu”.
20 “Qantaqa kay runaspa contranpi sumaj ruwasqa cobre perqata jina sayachisqayki.+
Paykunaqa seguro qanwan maqanakonqanku,pero mana atipasonqankuchu.+
Noqamin qanwan kashani salvasunaypaj, librasunaypajtaj”, nispa nin Jehová Diosqa.
21 “Noqa librasqayki sajra runaspa makisninkumanta.
Noqa kacharichisqayki mana khuyakoj runaspa makisninkumanta”.
Sutʼinchaykunasnin
^ Ichá nillanmantaj “tawa laya castigosta”.
^ Mithay: waj lugarespi ninku wikhay, tʼisay.
^ Hebreo parlaypeqa nin, “punkusninpi”.
^ Chayri “pata ladomanta”.
^ Chayri “sutiypi parlanki”.
