Jeremías 2:1-37
2 Jehová Diosqa parlamuwaspa niwarqa:
2 “Rispa kayta willamuy Jerusalenpi tiyakojkunaman: ‘Jehová Diosqa kayta nin:
“Sumajta yuyakuni joven kashaspa munakuwasqaykita,+casarananchejpaj parlasqaña kashajtinchej munakuwasqaykita,+chʼin jallpʼapi qhepayta jamusqaykita,chay mana tarpusqa jallpʼaspi qhepayta purisqaykita.+
3 Israelqa Jehová Diospa ñaupaqenpi llimphu karqa,+ cosechanmanta ñaupaj kaj poqoynin karqa”, nispa’.
‘Pillapis payta imanajqa juchayoj rikhurej,paykunata desgracia qhatirej’, nispa nin Jehová Diosqa”.+
4 Jacobpa mirayninmanta kajkuna, Jehová Diospa nisqanta uyariychej.
Israel nacionmanta familias, tukuy qankunapis uyariychej.
5 Jehová Diosqa kayta nin:
“¿Ima juchatataj noqapi tarerqanku ñaupa tatasniykichejri?+
Paykunaqa chay jinata noqamanta karunchakuspa,chay qhasi manakaj santosninkuta yupaychanku.+ Kunantaj paykunapis mana imapaj valejman tukunku.+
6 Paykunaqa mana nerqankuchu: ‘¿Maypitaj Jehová Dios kashanri?
Payqa Egipto jallpʼamanta orqhomuwarqanchej,+pusamuwarqanchejtaj chʼin jallpʼasninta,tʼajra jallpʼasninta,+ ukhu tʼoqosniyoj jallpʼasninta,chʼaki jallpʼasninta,+ manchay laqha jallpʼasninta,may jallpʼaspichus ni pi purinchu,nitaj pipis tiyakunchu chayninta’, nispa.
7 Chantá paykunata huertasniyoj jallpʼaman pusamorqani.
Chay jallpʼaj poqoyninta mikhunankupaj, allin imasninwantaj sajsakunankupaj.+
Qankunatajrí jallpʼayman yaykuspa, jallpʼayta chʼichicharqankichej.
Herenciaytaqa millayman tukucherqankichej.+
8 Sacerdotesqa mana nerqankuchu: ‘¿Maypitaj Jehová Dios kashanri?’,+ nispa.
Leymanta yachachej runasqa mana rejsiwarqankuchu.
Nacionniyta kamachejkunaqa noqaj contrayta oqharikorqanku.+
Profetaspis Baalpa sutinpi parlarqanku,+qhasi manakaj diosestataj yupaycharqanku.
9 Chayrayku Jehová Diosqa nin: ‘Qankunaj contraykichejpi quejasta churallasajpuni.+
Wawasniykichejpa wawasninkoj contranpipis quejasta churasaj’, nispa.
10 ‘Rispa qhawamuychej mar kantupi kitimkunaj+ jallpʼasninkuta.*
Quedarman+ runasta kachaychej, chantá allinta reparaychej.
Qhawamuychej chay lugarespi imapis kaypi jinachus pasasqanta chayri manachus.
11 ¿Ima naciontaj diosesninkuta cambian, mana dioseschu kanku chaykunata yupaychanankupajri?
Chaywanpis noqataqa llajtallaytaj cambiawan chay qhasi manakaj dioskunawan.+
12 Qankuna cielos, chayta rikuspa tʼukuychej,manchariywantaj kharkatiychej, nispa nin Jehová Diosqa.
13 Imaraykuchus llajtayqa iskay imasta manapuni allintachu ruwan.
Paykunaqa noqata saqerpariwanku, kausayta qoj yaku juturi kashajtiy.+
Chantapis estanquesta ruwakunku,*lajrasqa estanquesta, yakuta mana sayachej estanquesta’.
14 ‘Israelqa mana kamachichu, nitaj esclavochu.
Chanta, ¿imajtintaj presota jina apakapunkuri?
15 Maltón leonesqa Israelpa contranta qhaparinku,+jatunmanta qhaparinku.
Israelpa jallpʼantaqa mancharinaman tukuchinku.
Israelpa llajtasnenqa ninawan japʼiykuchisqa kanku, niñataj pipis chaypi tiyakunñachu.
16 Nofmanta,*+ Tahpanesmanta+ runasqa jallpʼasniykita ni imayojta rikhurichinku.*
17 Chaytaqa qanllataj maskʼakunkiJehová Diosniykita saqerparispa,+pay ñanta pusashasojtin.
18 Kunanqa, ¿imajtintaj riyta munanki Egiptoman rej ñannintari?+
¿Imajtintaj ujyayta munanki Sihorpa* yakusnintari?
¿Imajtintaj riyta munanki Asiriaman+ rej ñannintari?
¿Imajtintaj ujyayta munanki Éufrates mayoj yakusnintari?
19 Sajra ruwasqayki cheqanchasunan tiyan,wasanchaj kasqallaykitaj kʼamisunan tiyan.
Yachakuy ari, reparakuytaj imayna sajrachus, imayna mana allinchus kasqanta+Jehová Diosniykita saqerpareyqa.
Noqataqa manapuni manchachikuwarqankichu’,+ nispa nin Tukuyta Kamachej Señor Jehová Diosqa, paymin angelesta kamachejqa.
20 ‘Noqaqa unayña yugoykita pʼakirarqani,+cadenasniykitapis pʼitirarqani.*
Qantajrí niwarqanki: “Mana qanta sirvisqaykichu”, nispa.
Qanqa jatuchaj lomaspi, ramarara sachʼa uraspi+sirisqa* kasharqanki, khuchi warmi jina* qhenchachakuspa.+
21 Sumajnin puka uvata jina plantarqayki,+ aswan sumajnin mujumanta.
¿Imaynapitaj ñaupaqeypi mana walejman tukorqankiri? ¿Imaynapitaj kʼita uva sachʼaman tukorqankiri?’.+
22 Tukuyta Kamachej Señor Jehová Diosqa nin: ‘Sosawan* mayllakojtiykipis, may chhika ushpha yakuwan* mayllakojtiykipis,chay jucha ruwasqaykeqa pachan chʼichillapuni ñaupaqeypi kanqa’,+ nispa.
23 ¿Ima uyaykiwantaj ninki: ‘Mana chʼichichakorqanichu.
Mana Baal santosta yupaycharqanichu’, nispari?
Reparakuy ari, chay wayqʼopi imastachus ruwasqaykita.
Allinta qhawarikuy tukuy ruwasqasniykita.
Qanqa qʼoñirisqa malta camello jina kanki.
Kayman jaqayman correykachanki, maymanchus rinaykita mana yachakuspa.
24 Qanqa chʼin jallpʼasman yachasqa kʼita china burroman rijchʼakunki,mayqenchus qʼoñirisqa kaspa, orqo burrosta muskhispa maskʼan chayman.
¿Pitaj chay china burrota sujetayta atinman qʼoñirisqa kashajtinri?
Orqo burrosqa mana saykʼonqankuchu payta maskʼaspa.
Qʼoñirisqa kashajtenqa tarenqankupuni.
25 Ama qʼara chakilla rikhuriychu,amataj chʼakichikuychu.
Qantaj ninki: ‘Mana, mana chayqa kanmanchu.+
Waj llajtayojkunawan* sonqoyta suwachikuni,+paykunaj qhepankutataj risaj’,+ nispa.
26 Imaynatachus suwaqa japʼichikuspa pʼenqaypi rikhurin,ajinallatataj israelitaspis pʼenqaypi rikhurinku.
Pʼenqaypi rikhurinku tukuy paykuna, reyesninku, kuraj kamachejkunasninku,sacerdotesninku, profetasninku ima.+
27 Paykunaqa uj sachʼata ninku: ‘Qan tatay kanki’,+ nispa.
Uj rumitataj ninku: ‘Qan mamay kanki’, nispa.
Noqamantajrí wasankuta rikuchiwanku uyankuta rikuchinawankumantaqa.+
Llakiypi rikhurisparaj niwanqanku:
‘Jamuy, salvawayku’,+ nispa.
28 Judá nación, ¿maytaj ruwakorqanki chay diosesniykiri?+
Llakiypi kashajtiyki salvayta atisunkuman chayqa, jamuchunku ari.
Qanpa diosesniykeqa may chhika kanku, llajtasniyki jinapuni.+
29 Jehová Diosqa nin: ‘¿Imajtintaj contraypi sigue quejasta churashankichejri?
¿Imajtintaj tukuyniykichej noqaj contrayta oqharikorqankichejri?’,+ nispa.
30 Qhasillata wawasniykichejta seqʼoni.+
Wawasniykichejqa mana kʼamisqayta japʼikunkuchu.+
Profetasniykichejtaqa qankunaj espadallaykichejtajuj phiña león jina wañuchin.+
31 Llajtaymanta kajkuna, Jehová Diospa nisqasninta allinta uyariychej.
¿Israelpajqa chʼin jallpʼa jinachu kasqani?
Chayri, ¿manchay laqha jallpʼa jinachu kasqani?
¿Imajtintaj kay llajtaymanta kajkuna ninku: ‘Kacharichisqa kayku.
Manaña qanmanqa kutimusqaykuchu’, nispari?+
32 ¿Uj doncellaqa qonqanmanchu kʼachanchanasninta churakuyta?
¿Noviapis qonqanmanchu kʼachanchana cintanta churakuyta?
Llajtaytajrí unayña noqata qonqawan.+
33 Qanqa manchay habilidadniyoj warmi kasqanki, chay jina sumajta yuyaychakunki qanta munakusoj qharista tarinaykipaj.
Qanllataj ñankunasniykitaqa mana walejman tukuchinki.+
34 Ropaykeqa chʼichichasqa kashan wajcha runaspa, mana juchayoj runaspa yawarninkuwan.+
Noqaqa mana paykunata rikorqanichu a la fuerzalla wasiykiman yaykojta,chaywanpis rikuni ropaykeqa paykunaj yawarninkuwan chʼichichasqa kashasqanta.+
35 Qantajrí ninkiraj: ‘Mana juchayojchu kani.
Diosqa niñachá noqapaj phiñasqachu kashanman’, nispa.
Kunanqa qanta castigasqayki,‘mana juchayojchu kani’ nisqaykirayku.
36 ¿Imajtintaj chay jina usqhayllata wajmanñataj kʼaskakunkiri?
Qanqa Egiptomantapis pʼenqakullankitaj,+imaynatachus Asiriamanta pʼenqakorqanki ajinata.+
37 Chayrayku qanpis llojsimunki makisniykita umayki pataman churakuspa.+
Jehová Diosqa qhesachan pikunapichus qan atienekushanki chaykunata.
Paykunaqa mana yanapasonqankuchu”.
Sutʼinchaykunasnin
^ Chayri “qhawamuychej kitimkunaj islasninkuta”.
^ Chayri “estanquesta chʼeqospa ruwakunku”. Ichapis chhankapi.
^ Chayri “Menfismanta”.
^ Hebreo parlaypeqa nin, “umaykimanta coronaykita mikhuykakapunku”.
^ Sihor nispaqa parlashan Nilo mayumanta pʼitikun chay ujnin mayumanta.
^ Pʼitiy: waj lugarespi ninku tʼipiy.
^ Siriy: waj lugarespi ninku winkuy.
^ Khuchi warmi nispaqa parlashan qhariswan puñuykoj warmimanta, astawanqa qolqerayku.
^ Chayri “may chhika jabonwan”.
^ Sosa: waj lugarespi ninku bico, bicarbonato.
^ Chayri “Waj llajtasmanta dioseswan”.
