Jeremías 22:1-30
22 Jehová Diosqa nin: “Judamanta reypa wasinman* uraykuy, paymantaj willamuy
2 kayta: ‘Davidpa kamachina tiyananpi tiyakoj Judamanta rey, Jehová Diospa nisqanta uyariy, kamachisniykiwan khuska, llajtaykimanta runaswan khuska, pikunachus kay punkunta yaykumunku chaykunawan khuska.
3 Jehová Diosqa kayta nin: “Cheqan kajman jina justiciata ruwaychej. Runasta kacharichiychej engañaspa suwajkunaj makisninkumanta. Ama ñakʼarichiychejchu forasterosta, amataj ima sajratapis ruwaychejchu wajcha wawasta,* nitaj mayqen viudatapis.+ Ama mana juchayoj runaspa yawarninkuta jichʼaychejchu.+
4 Sichus kay nisqasniyta kasunkichej chayqa, Davidpa kamachina tiyananpi tiyaykukonqanku chay reyesqa,+ kamachisninkuwan khuska, llajtanmanta runaswan khuska kay wasej punkusninta yaykumonqanku carretasninkupi, chayri caballosninkupi montasqas”,+ nispa’.
5 ”Jehová Diosqa nin: ‘Sitajchus kay nisqasniyta mana kasukunkichejchu chayqa, noqa kikiy sutiypi jurani kay wasita chʼinman tukuchinayta’,+ nispa.
6 ”Judamanta reypa kamachina wasinmanta parlaspa Jehová Diosqa kayta nin:
‘Qanqa Galaad jina noqapaj kanki,Líbano orqoj puntan jina.
Jinapis qantaqa chʼin jallpʼaman tukuchisqayki,llajtasniykipeqa ni pi tiyakonqachu.+
7 Noqaqa armasniyoj runastacontraykipi kachamusaj tukuchisunankupaj.+
Paykunaqa aswan sumaj cedro sachʼasniykita kʼuturanqanku,ninamantaj wijchʼuykonqanku.+
8 ”’Ashkha nacionesmanta runas kay llajtanejta pasaspa ninakonqanku: “¿Imaraykutaj Jehová Dios kay jinata ruwaykun kay sumaj llajtatari?”,+ nispa.
9 Wakin runastaj nenqanku: “Kayqa ajina pasan Jehová Diosninkuwan trato ruwasqankuta mana juntʼasqankurayku, waj diosesman kʼumuykukusqankurayku, chaykunatataj sirvisqankurayku”,+ nispa’.
10 Ama uj runa wañusqanraykoqa waqaychejchu,ama chay runamanta llakikuychejchu.
Astawanqa jikʼun jikʼunta waqaychej presos apasqa kajkunamanta.
Imajtinchus paykunaqa niña ujtawan rikonqankuñachu nacekusqanku jallpʼata.
11 ”Josiaspa wawan Salumqa*+ Judapi rey karqa, tatan Josiaspa cuentanmanta.+ Kunantajrí kaymanta ripunña. Paymanta Jehová Diosqa kayta nin: ‘Salumqa ni jaykʼaj kutimonqañachu.
12 Payqa maypichus preso kashan chaypi wañonqa, manaña kay jallpʼata rikonqañachu’,+ nispa.
13 Ay imanallanqachus, pichus mana cheqan kajman jinachu ruwaspa wasinta sayachejqa.
Ay imanallanqachus, pichus mana justiciaman jinachu ruwaspa altos wasinta sayachejqa.
Payqa runa masinta ni imata qospalla trabajachin,nitaj jornalninta pagapuyta munanchu.+
14 Payqa nin: ‘Jatun wasita ruwakusaj,altos patapi jatuchaj cuartosniyojta,ventanasniyojta ima.
Perqasnintataj cedro maderawan forraykusaj, chantá pukata pintarqosaj’, nispa.
15 ¿Qanqa yuyankichu reyllapuni kanaykita, wajkunamanta nisqa aswan ashkha cedro maderawan wasiykita ruwachisqaykirayku?
Tataykipis mikhorqataj ujyarqataj.
Jinapis payqa justiciata ruwarqa, cheqan kajtawan,+allintaj rerqa.
16 Payqa justiciata ruwaporqa wajcha runaspaj, ñakʼarichisqa kajkunapajpis.
Chay tukuy ima ruwasqantaj allin karqa.
‘¿Manachu payqa noqata rejsiwasqanrayku chayta ruwarqa?’, nispa nin Jehová Diosqa.
17 ‘Qanpatarí, ñawiykipis sonqoykipis runasta engañaspa ganayllaman rin,mana juchayoj runaspa yawarninta jichʼayllaman,runasta chʼaukiyayllaman,* kapuyninkuta a la fuerza qhechuyllaman’.
18 ”Chayrayku Jehová Diosqa kayta nin Josiaspa wawan Jehoiaquimmanta,+ pichus Judamanta rey chaymanta:
‘Mana paymanta waqanqankuchu,“ay hermanitóy. Ay hermanitáy” nispaqa.
Mana paymanta waqanqankuchu,“ay patronníy. Ay reyníy” nispaqa.
19 Paytaqa burro wañusqata jinalla pʼampanqanku,+qhatataspa jawaman wijchʼonqanku,Jerusalén llajtaj punkusninmanta jawaman wijchʼonqanku’,+ nispa.
20 Líbano orqoman wicharispa qhapariy,Basanpi jatunmanta parlay,Abarimmantapachataj qhapariy,+imaraykuchus tukuy qʼoñirisqa qharisniykeqa atipachikunku.+
21 Ni ima llakiyniyoj kashajtiyki qanwan parlarqani.
Qantajrí niwarqanki: ‘Mana kasusqaykichu’,+ nispa.
Qanqa ajinapuni karqanki sipas kasqaykimantapacha.
Ni jaykʼaj nisqayta kasuwarqankichu.+
22 Michejkunasniykitaqa uj wayra michenqa.+
Qʼoñirisqa qharisniykitaj presos apasqa kanqanku.
Chay jina llakiy qhatirisojtin, qantaqa pʼenqaypi rikhurichisonqanku, kʼumuykachachisonqanku ima.
23 Qanqa Líbano orqopi tiyakushanki,+cedro sachʼas chaupipi thapachasqa.+
Qanqa mayta qhaparinki nanaykuna chayamusojtin,nacechikoj warmej nanaynin jina chayamusojtin”.+
24 “Jehová Diosqa Judamanta reyman nin: ‘Kausayniyrayku jurani: Jehoiaquimpa+ wawan Conías,*+ qan paña makiypi sellana anilloy kawaj chaypis, makiymanta orqhospa wijchʼuykiman.
25 Qantaqa jaywaykusqayki wañuchisuyta munajkunaman, pikunatachus manchachikunki chaykunaman, Babiloniaj reynin Nabucodonosorman,* jinallataj caldeosmanpis.+
26 Qantawan, qanta nacechikusorqa chay mamaykitawan, waj lado jallpʼaman wijchʼusqaykichej, maypichus ni mayqenniykichej nacekorqankichejchu chayman, chaypitaj wañunkichej.
27 Qankunaqa mana jaykʼajpis kutimunkichejchu ima jallpʼatachus mayta rikuyta munankichej chayman.+
28 Coniasqa, ¿uj pʼakisqa manka jinachu, despreciasqa manka jinachu?
Coniasqa, ¿ni pejpa munasqan manka jinachu?
¿Imajtintaj payta, miraynintawan uraman wijchʼunkuri?
¿Imajtintaj mana rejsisqanku jallpʼaman wijchʼunkuri?’,+ nispa.
29 Kay jallpʼapi tiyakoj runas,* uyariychej Jehová Diospa nisqanta.
30 Jehová Diosqa nin:
‘Kay runataqa anotaychej manapis wawasniyojchu kanman jinata.
Kay runataqa kausayninpi mana allinchu renqa.
Ni mayqen wawanpisDavidpa kamachina tiyananman tiyaykukonqachu, Judata watejmanta kamachinanpaj’,+ nispa”.
Sutʼinchaykunasnin
^ Chayri “kamachina wasinman”.
^ Chayri “mana tatayoj wawasta”.
^ Sutikullantaj Jehoacaz.
^ Chayri “engañayllaman”.
^ Sutikullantaj Joaquín, Jeconías.
^ Hebreo parlaypeqa nin, “Nabucodorosor”. Kay suteqa ajinatapis escribikullantaj.
^ Hebreo parlaypeqa nin, “Jallpʼa, jallpʼa, jallpʼa”. Chayri “Nación”.
