Jeremías 23:1-40
23 Jehová Diosqa nin: “Imanallanqankuchus ovejasniyta tukuchej ovejerosqa, ovejasniyta chʼeqerachej* ovejerosqa”,+ nispa.
2 Israelpa Diosnin Jehovaqa kayta nin llajtanta michejkunaj contranta: “Qankunaqa ovejasniyta chʼeqeracherqankichej. Chʼeqerachispallapuni karqankichej, nitaj qhawarqankichejchu”,+ nispa.
Jehová Diosqa nillantaj: “Chay sajra ruwasqasniykichejrayku castigasqaykichej”.
3 “Chantá puchoj ovejasniyta tantamusaj, maykunamanchus chʼeqeracherqani chaykunamanta.+ Ovejasniytaqa pastosninman qhatimusaj,+ chaypitaj miranqanku, ashkhamantaj tukonqanku.+
4 Ovejasniyta michinankupajqa allin michejkunata churasaj.+ Ovejasneyqa manaña manchachikonqankuchu, manaña manchariywan kharkatenqankuchu, niñataj ujpis chinkanqañachu”, nispa nin Jehová Diosqa.
5 Jehová Diosqa nillantaj: “Pʼunchaykuna qayllamushan, chaypachataj noqaqa Davidmanta uj mirayta* rikhurichisaj.+ Payqa rey jina kamachenqa,+ yachayniyoj kanqa, kay jallpʼapitaj justiciata ruwanqa, cheqan kajtawan.+
6 Pay kamachishajtenqa Judá salvasqa kanqa,+ Israeltaj mana manchachikuspa tiyakonqa.+ Payqa kay sutiwan rejsisqa kanqa: Jehovamin Justicianchejqa”,+ nispa.
7 Jehová Diosqa nin: “Uj pʼunchay qayllamushan, chaypachataj runasqa niña nenqankuchu: ‘Kausaj Jehová Diospa sutinpi jurani, paymin Egipto jallpʼamanta Israel nacionta orqhomorqa’,+ nispa.
8 Chayta ninankumantaqa kayta nenqanku: ‘Kausaj Jehová Diospa sutinpi jurani, paymin Israel nacionpa mirayninta orqhomorqa. Chantá watejmanta pusamorqa norte jallpʼasmanta,* jinallataj may jallpʼasmanchus chʼeqeracherqa chay jallpʼasmantapis’, nispa. Paykunataj kikin jallpʼankupi tiyakonqanku”,+ nispa.
9 Kay willayqa profetaspaj:
Sonqo pʼakisqa kashani.
Tukuy cuerpoy* kharkatishan.
Jehová Diosrayku, santo nisqasninraykutajmachasqa runa jina kashani,ashkha vinota tomaykoj runa jina kashani.
10 Kay jallpʼaqa qhencha runaswan juntʼa kashan.+
Jallpʼaqa maldecisqa kasqanrayku llakiyta waqashan,+chʼin jallpʼaspi pastospis chʼakipunku.+
Paykunaqa sajra imasta ruwanku, atiyninkuman atienekuspataj runasta ñakʼarichinku.
11 Jehová Diosqa nin: “Profetaspis sacerdotespis chʼichipaj qhawasqa kanku.*+
Paykunataqa kikin wasiypi sajra imasta ruwashajta taripani”,+ nispa.
12 Jehová Diosqa nillantaj: “Chayrayku ñanninkoqa llustʼa kanqa, laqhataj.+
Paykunataqa tanqaspa urmachenqanku.
Paykunamanqa ñakʼariykunata apachimusaj,cuentata mañanay watapi”.
13 “Samariamanta profetaspi uj millay imata rikuni.+
Paykunaqa Baalpa sutinpi willanku.
Chaywantaj Israel llajtayta pantachinku.
14 Jerusalenmanta profetaspi millay imasta rikuni.
Paykunaqa qhenchachakunku,+ llulleriostataj parlanku.+
Sajra runasman sayakunku,nitaj sajra ruwasqasninkumanta pesachikunkuchu.
Noqaj ñaupaqeypeqa tukuyninku Sodoma llajtayojkunaman rijchʼakunku.+
Llajtapi tiyakojkunataj Gomorra llajtayojkunaman rijchʼakunku”.+
15 Chayrayku angelesta kamachej Jehová Diosqa profetaspa contrankupi kayta nin:
“Paykunamanqa ajenjota* mikhuchisaj,venenasqa yakutataj tomachisaj.+
Imaraykuchus Jerusalenmanta profetasqa nacionnintinmanta runasman Diosta wasanchayta yachachinku”, nispa.
16 Angelesta kamachej Jehová Diosqa kayta nin:
“Imatachus profetas willashasunkichej chaytaqa, ama uyariychejchu.+
Paykunaqa llullakushasunkichej.*
Mosqoypi jina rikusqankuta willasqankoqa mana Jehová Diosmantachu,+manachayqa paykunaj yuyaynillankumanta.+
17 Noqata mana manchikuwankuchu chaykunamanqa nishallankupuni:
‘Jehová Diosqa nin: “Allinta kausakunkichej”,+ nispa’.
Kʼullukuspa* sonqonkoj munayninta ruwajkunamantaj ninku:
‘Mana ima llakiypis qhatirisonqachejchu’,+ nispa.
18 ¿Pitaj karqa Jehová Diospa aswan qaylla amigonnisqasninta uyarispa entiendenanpajri?
¿Pitaj palabrasninta allinta uyarerqari?
19 Jehová Diospa kʼajaj phiñakuynenqa para wayra jina sinchʼita oqharikonqa.
Sajra runaspa umankuman muyoj wayra jina uraykamonqa.+
20 Jehová Diospa kʼajaj phiñakuynenqa mana tiyaykonqachu,sonqonpi imatachus ruwayta munasqanta juntʼanankama.
Qankunataj chayta sutʼita entiendenkichej tukukuy pʼunchaykunapi.
21 Mana noqachu profetasta kachamorqani, jinapis paykunaqa correspa jamorqanku.
Paykunawanqa mana parlallarqanipischu, jinapis paykunaqa sutiypi parlarqanku.+
22 Sichus paykuna aswan qaylla amigosniy kankuman karqa chayqa,llajtaymanta kajkunaman nisqasniyta willankuman karqa,sajra ñanninkumantapis kutichimunkuman karqa, jinallataj sajra ruwasqasninkutapis saqechinkuman karqa”,+ nispa.
23 Jehová Diosqa nin: “Noqaqa mana qayllaypi kaj imasllatachu rikuni, manaqa karupi kaj imastapis rikullanitaj”, nispa.
24 Jehová Diosqa nin: “¿Atinmanchu pillapis pakakuyta mana rikuyta atinaypaj jinaqa?”,+ nispa.
Jehová Diosqa nillantaj: “¿Imallapis kanmanchu cielopi chayri kay jallpʼapi mana rikuyta atinaypaj jinaqa?”.+
25 “Sutiypi llullakuspa willashanku chay profetasta kayta nejta uyarerqani: ‘Mosqokuni, mosqokuni’,+ nispa.
26 ¿Maykʼajkamataj chay profetas llullakullanqankupuniri? Paykunaqa sonqonkupi kaj llulla imasllata willashanku.+
27 Paykunaqa mosqokusqankuta willanakusqankuwan llajtaymanta kajkunata sutiyta qonqachiyta munanku, imaynatachus tatasninkupis Baal santorayku noqaj sutiyta qonqarqanku ajinata.+
28 Mosqokoj profetaqa chay mosqokusqanta willachun. Chaywanpis palabrasniyta uyarej profetaqa, maychus kajta palabrasniyta willachun”.
Jehová Diosqa nin: “¿Imapitaj pajawan trigowan kikin kasqari?”, nispa.
29 Jehová Diosqa nin: “¿Nichu palabrasneyqa nina jina?+ ¿Nichu palabrasneyqa chhankata phirinapaj combo jina?”,+ nispa.
30 Jehová Diosqa nillantaj: “Chayrayku noqaqa profetaspa contrankupi kashani, pikunachus palabrasniyta qʼewispa willanku chaykunaj contrankupi. Paykunaqa munasqankuta runasman willanku”,+ nispa.
31 Jehová Diosqa nin: “Noqaqa profetaspa contrankupi kashani, pikunachus ‘Diosqa nin’ nispa nejkunaj contrankupi”,+ nispa.
32 Jehová Diosqa nin: “Mosqokusqankuta llullakuspa willaj profetaspa contrankupi kashani. Paykunaqa mosqokusqankuta willaspa purinku, llajtaymanta kajkunatataj llullakusqankuwan runaykachasqankuwan pantachinku”,+ nispa.
Jehová Diosqa nillantaj: “Paykunataqa mana noqachu kachamorqani, nitaj imatapis kamacherqanichu. Chayrayku paykunaqa mana kay llajtata yanapanqankuchu”,+ nispa.
33 “‘¿Imataj Jehová Diospa qʼepinri?’* nispa tapusojtinkoqa, qan kutichinki: ‘Jehová Diosqa nin: “Qankuna chay qʼepi kankichej, qankunata wijchʼuspa saqerparisqaykichej”,+ nispa’. Ajinata kutichinki profetamanpis sacerdotemanpis.
34 Sichus uj profeta chayri uj sacerdote manachayri llajtamanta pillapis ninman, ‘kaymin Jehová Diospa qʼepenqa’* nispa chayqa, noqa chay runata castigasaj, jinallataj wasinmanta kajkunatapis.
35 Qankunaqa sapa ujniykichej tapukushankichej runa masiykichejta, hermanoykichejtapis: ‘¿Imatataj Jehová Dios kuticherqari? ¿Imatataj Jehová Dios nerqari?’, nispa.
36 Jehová Diospa qʼepinmantaqa* amaña parlaychejchu. Sapa ujniykichejpa parlasqallaykichejtaj Diospa qʼepenqa* kashan. Qankunaqa kausaj Diospa palabrasninta cambiarqankichej, angelesta kamachej Jehová Diosninchejpa palabrasninta cambiarqankichej.
37 ”Profetastaqa kayta tapunki: ‘¿Imatataj Jehová Dios kutichisorqachejri? ¿Imatataj Jehová Dios nisorqachejri?
38 Sichus qankuna nillankichejpuni “kaymin Jehová Diospa qʼepin”* nispa chayqa, Jehová Diosqa kayta nisunkichej: “Noqaqa kamacherqaykichej: ‘Ama ninkichejchu, “kaymin Jehová Diospa qʼepin”* nispa’. Qankunatajrí sigue nishallankichejpuni, ‘Kay palabrasqa Jehová Diospa qʼepin* kanku’ nispa.
39 Chayrayku noqaqa qankunata oqharispa, ñaupaqeymanta karuman wijchʼusqaykichej. Chantapis wijchʼullasajtaj qankunaman ñaupa tatasniykichejmanwan qorqani chay llajtata.
40 Qankunataqa wiñaypaj pʼenqaypi rikhurichisqaykichej, kʼumuykachachisqaykichejtaj. Chaytaj ni jaykʼaj qonqasqachu kanqa”,+ nispa’”.
Sutʼinchaykunasnin
^ Chʼeqerachiy: waj lugarespi ninku tʼaqarachiy.
^ Hebreo parlaypeqa nin, “uj ramitata”.
^ Chayri “pata jallpʼasmanta”.
^ Hebreo parlaypeqa nin, “tullusniy”.
^ Chayri “noqata wasanchawajkuna kanku”.
^ Chayri “qʼoteaykushasunkichej”.
^ Chayri “Terco kaspa”.
^ Chayri “sinchʼi willayninri”. Qʼepi palabraqa hebreo parlaypi niyta munan “Diosmanta uj sinchʼi willay”, manachayri “llasa imas”.
^ Chayri “sinchʼi willaynenqa”.
^ Chayri “sinchʼi willayninmantaqa”.
^ Chayri “sinchʼi willaynenqa”.
^ Chayri “sinchʼi willaynin”.
^ Chayri “sinchʼi willaynin”.
^ Chayri “sinchʼi willaynin”.
