Jeremías 24:1-10
-
Sumaj higoswan millay higoswan (1-10)
24 Chantá Jehová Diosqa iskay canastasta rikuchiwarqa, chay canastasqa higosniyoj kasharqanku Jehová Diospa templonpa ñaupaqenpi. Chayta rikuchiwarqa Babiloniamanta rey Nabucodonosor* Jehoiaquimpa wawan+ Jeconiasta*+ presota apakapusqanmantaña. Rey Nabucodonosorqa Jerusalenmanta Babiloniaman presota aparqa Judamanta rey Jeconiasta, Judamanta kuraj kamachejkunata, tukuy imata ruwayta yachaj runasta, herrerosta* ima.+
2 Ujnin canastaqa sumaj higosniyoj karqa. Chay higosqa ñaupajta poqoj higos jina karqa. Chay ujnin canastataj millay higosniyoj karqa, mana mikhunapaj jina millay higosniyoj.
3 Chantá Jehová Diosqa tapuwarqa: “Jeremías, ¿imatá rikushanki?”, nispa. Noqataj kuticherqani: “Higosta rikushani. Chay sumaj higosqa manchay sumajpuni kashan, chay millay higostaj allin millaypuni kashan, mana mikhunapaj jinachu”,+ nispa.
4 Chantá Jehová Diosqa niwarqa:
5 “Israelpa Diosnin Jehovaqa kayta nin: ‘Chay sumaj higosta jina qhawasaj Judamanta presos apasqa kajkunata, pikunatachus kay lugarmanta presosta apacherqani caldeospa jallpʼankuman chaykunata.
6 Paykuna qhawarisqalla kasaj, paykunata allin rinanpaj, chantá kay jallpʼaman paykunata kutichimusaj.+ Paykunataqa sumajta sayachisaj, manataj thuñiykusajchu. Paykunataqa plantasaj, manataj tʼirasajchu.+
7 Noqaqa paykunaj sonqonkuta kuyurichisaj noqata rejsinawankupaj, noqa Jehová kasqayta yachanankupaj.+ Paykunaqa llajtay kanqanku, noqataj Diosninku kasaj.+ Paykunaqa noqaman tukuy sonqo kutimonqanku.+
8 ”’Chay millay higosmanta, mayqenkunachus manchay millay kasqankurayku mana mikhunapaj jinachu kanku,+ chaykunamanta Jehová Diosqa nin: “Chay millay higosta jina qhawasaj Judamanta rey Sedequiasta,+ kuraj kamachisninta, kay nacionpi Jerusalenmanta puchojkunata, Egiptoman tiyakoj rejkunatapis.+
9 Chay runastaqa mancharinaman tukuchisaj. Paykunaman sinchʼi ñakʼariykunata apachimusqayta rikuspa, kay jallpʼamanta tukuy gobiernos mancharenqanku.+ Runasqa paykunata insultanqanku, paykunamanta parlanqanku ñakʼariymanta parlanankupaj, paykunamanta burlakonqanku, paykunata maldicenqanku,+ may lugaresmanchus paykunata chʼeqerachisaj* tukuy chaykunapi.+
10 Paykunaman kachaykusaj espadata,+ yarqhayta, wañuchej onqoytawan,+ kay jallpʼamanta chinkachisqa kanankukama, mayqen jallpʼatachus paykunaman, ñaupa tatasninkumanpis qorqani chaymanta”, nispa’”.
Sutʼinchaykunasnin
^ Hebreo parlaypeqa nin, “Nabucodorosor”. Kay suteqa ajinatapis escribikullantaj.
^ Sutikullantaj Joaquín, Conías.
^ Ichá nillanmantaj “sumaj perqasta ruwajkunata”.
^ Chʼeqerachiy: waj lugarespi ninku tʼaqarachiy.
