Jeremías 27:1-22
27 Josiaspa wawan Jehoiaquim Judapi rey kayta* qallarishajtin, Jehová Diosqa Jeremiaswan parlarqa.
2 Jeremiasqa nerqa: “Jehová Diosqa kayta niwarqa: ‘Waskhasta ruwakuy, yugostawan. Chaykunatataj kunkaykiman churaykukuy.
3 Chantá chaykunata apachiy Edommanta reyman,+ Moabmanta+ reyman, ammonitaspa+ reyninkuman, Tiromanta+ reyman, Sidonmanta+ reymanpis. Chaykunataqa apachiy Judamanta rey Sedequiasta watukoj Jerusalenman jamorqanku chay runaswan.
4 Paykunamanqa niy, patronesninkuman kayta ninankuta:
”’Qankunaqa patronesniykichejman kayta willankichej: “Angelesta kamachej Israelpa Diosnin Jehovaqa kayta nin:
5 ‘Noqamin ruwarqani tukuy atiyniywan, kallpayoj makiywan kay jallpʼata, runasta, jinallataj kay jallpʼa patapi kaj animalestapis. Noqataj chaykunataqa pimanchus munasqayman* qoporqani.+
6 Kunantaj noqaqa tukuy kay nacionesta entregaykuni Babiloniamanta rey Nabucodonosorman.+ Campomanta monte animalestapis kamachiy Nabucodonosorman qopuni, payta sirvinankupaj.
7 Tukuy naciones payta sirvenqanku, jinallataj wawanta, allchhintapis. Paytaqa sirvenqanku Babiloniaj horan chayamunankama,+ chaypachataj paytaqa ashkha naciones, atiyniyoj reyespis esclavonkuman tukuchenqanku’,+ nispa.
8 ”’”Jehová Diosqa nin: ‘Sichus mayqen nacionllapis chayri mayqen gobiernollapis mana munanqachu Babiloniamanta rey Nabucodonosorta sirviyta, nitaj paypa yugontapis kunkanman churakuyta munanqachu chayqa, noqa chay nacionta castigasaj espadawan,+ yarqhaywan, wañuchej onqoywan ima. Ajinata paykunataqa tukuchisaj Nabucodonosorpa makinwan’, nispa.
9 ”’”‘Chayrayku ama uyariychejchu profetasta, adivinosta, mosqokojkunata, magiata ruwajkunata, layqasta* ima. Paykunaqa nishasunkichej: “Qankunaqa mana Babiloniamanta reyta sirvinkichejchu”, nispa.
10 Chayta nispaqa llullakushasunkichej. Sichus chay llullakusqankuta creenkichej chayqa, jallpʼaykichejmanta karuman apachisqa kankichej, noqataj qankunata chʼeqerachisqaykichej,* qankunataj wañunkichej.
11 ”’”’Jinapis mayqen nacionchus Babiloniamanta reypa yugonman churakuspa payta sirvenqa chayqa, chay naciontaqa jallpʼanpi qhepakojta* saqesaj, chaypi tarpunanpaj, tiyakunanpajtaj’, nispa nin Jehová Diosqa”’”.
12 Judamanta rey Sedequiasmanpis+ kikillantataj nerqani: “Babiloniamanta reypa yugonman churakuspa payta, llajtantawan sirviychej. Ajinamanta kausallankichejpuni.+
13 ¿Imajtintaj qanpis llajtaykimanta kajkunapis wañuchisqa kanaykichej kanman espadawan,+ yarqhaywan,+ wañuchej onqoywan+ imari? Jehová Diosqa nerqaña chay imas qhatirinanta Babiloniaj reyninta mana sirvej nacionta.
14 Profetasqa nishasunkichej: ‘Qankunaqa mana Babiloniamanta reyta sirvinkichejchu’,+ nispa. Ama paykunata uyariychejchu, chayta nispaqa llullakushasunkichej.+
15 ”Jehová Diosqa nin: ‘Mana noqachu paykunata kachamorqani. Paykunaqa llullakuspa sutiypi willashanku. Sichus paykunata uyarinkichej chayqa, noqa chʼeqerachisqaykichej, qankunataj wañunkichej, jinallataj qankunaman willashasunkichej chay profetaspis’,+ nispa”.
16 Chantá sacerdotesman, kay llajtamanta runasmanpis nerqani: “Jehová Diosqa nin: ‘Profetasniykichejqa nishasunkichej: “Jehová Diospa wasinmanta imastaqa, tumpitamantawan Babiloniamanta kutichimonqanku”,+ nispa. Ama chay willasqankuta uyariychejchu. Paykunaqa llullakushasunkichej.+
17 Ama paykunata uyariychejchu. Babiloniamanta reyta sirviychej, kausallankichejpunitaj.+ ¿Ima kajtataj kay llajta raqayllamanña* tukunmanri?
18 Sichus paykuna profetaspuni kanku chayqa, Jehová Diostaj paykunawan parlarqa chayqa, ama jina kaspa mañakuchunku ari, angelesta kamachej Jehová Diosmanta. Mañakuchunku ari, ama Jehová Diospa wasinmanta puchoj imasta Babiloniaman apakapunankupaj, nillataj Judamanta reypa wasinmanta,* nitaj Jerusalenmantapis’, nispa.
19 ”Kaytamin angelesta kamachej Jehová Diosqa nin temploj pilaresninmanta,+ jatun wirkhimanta,*+ carrosmanta,+ kay llajtapi puchoj valorniyoj imasmantawan.
20 Chaykunataqa Babiloniamanta rey Nabucodonosor mana Babiloniaman aparqachu, maypachachus Judamanta rey Jehoiaquimpa wawan Jeconiasta, Judamantawan Jerusalenmantawan kurajkunata presosta apakaporqa chaypacha.+
21 Angelesta kamachej Israelpa Diosnin Jehovaqa kayta nin, Jehová Diospa wasinpi puchoj imasmanta, jinallataj Judamanta reypa wasinpi, Jerusalenpipis puchoj imasmanta.
22 ‘Jehová Diosqa nin: “Chay imastaqa Babiloniaman apakaponqanku,+ chaykunamanta* yuyarikunay pʼunchaykama. Chantá noqa kayman kutichimuspa, watejmanta kay lugarman churasaj”,+ nispa’”.
Sutʼinchaykunasnin
^ Chayri “Judapi kamachiyta”.
^ Hebreo parlaypeqa nin, “pichus qhawayniypi cheqan kajman”.
^ Chayri “brujosta”.
^ Chʼeqerachiy: waj lugarespi ninku tʼaqarachiy.
^ Hebreo parlaypeqa nin, “samarikojta”.
^ Raqay: waj lugarespi ninku laqayas.
^ Chayri “kamachina wasinmanta”.
^ Hebreo parlaypeqa nin, “Mar”.
^ Ichá nillanmantaj “paykunamanta”.
