Jeremías 28:1-17
-
Jeremiaswan llulla profeta Hananiaswan (1-17)
28 Chay watallapitaj Gabaonmanta+ Azurpa wawan profeta Hananiasqa noqawan parlarqa. Chayqa karqa Judamanta rey Sedequías+ kamachiyta qallarishajtin, tawa kaj watapi, phishqa kaj killapi. Chaypacha Hananiasqa Jehová Diospa wasinpi, sacerdotespa ñaupaqenpi, tukuy runaspa ñaupaqenpiwan niwarqa:
2 “Angelesta kamachej Israelpa Diosnin Jehovaqa kayta nin: ‘Babiloniamanta reypa yugonta pʼakisaj.+
3 Iskay watasmantawan kay lugarman kutichimusaj Jehová Diospa wasinpi karqa chay tukuy imasta, mayqenkunatachus Babiloniamanta rey Nabucodonosor kaymanta orqhospa Babiloniaman apakaporqa chaykunata’,+ nispa”.
4 “Jehová Diosqa nin: ‘Noqaqa watejmanta kutichimusaj Jehoiaquimpa+ wawan Jeconiasta,+ pichus Judamanta rey chayta, jinallataj Judamanta Babiloniaman presos apasqa karqanku chaykunatapis.+ Noqaqa Babiloniamanta reypa yugonta pʼakisaj’, nispa”.
5 Chantá profeta Jeremiasqa profeta Hananiasman kuticherqa, sacerdotespa ñaupaqenkupi, chantá Jehová Diospa wasinpi sayasqa kasharqanku chay tukuy runaspa ñaupaqenkupiwan.
6 Profeta Jeremiasqa nerqa: “Amén.* Jehová Dios chayta ruwachun. Jehová Diosqa chay willasqaykita juntʼachun. Pay Babiloniamanta kutichimuchun Jehová Diospa wasinmanta karqa chay imasta, jinallataj tukuy presos apasqa kajkunatapis.
7 Jinapis, ama jina kaspa uyariway ari imatachus qanman nisqayki chayta, jinallataj tukuy runaspis chayta uyarichunku.
8 Noqanchejmanta aswan ñaupajtaña, ñaupa profetas willarqanku guerras kananta, ñakʼariykuna kananta, wañuchej onqoykuna kananta ashkha nacionespi, ashkha atiyniyoj gobiernospipis.
9 Sichus uj profeta allin kausay kananta willan chayqa, chay profetaj willasqan juntʼakojtillan yachakonqa Jehová Diospuni payta kachamusqanta”, nispa.
10 Chayta nisqantawan profeta Hananiasqa profeta Jeremiaspa kunkanmanta yugota phaskaraytawan pʼakirparerqa.+
11 Chantá Hananiasqa tukuy runaspa ñaupaqenkupi kayta nerqa: “Jehová Diosqa kayta nin: ‘Iskay watasmantawan kay yugota jinallataj pʼakirparisaj Babiloniamanta rey Nabucodonosorpa yugonta. Chay yugotaqa tukuy nacionespa kunkankumanta phaskarasaj’, nispa”.+ Chantá profeta Jeremiasqa riporqa.
12 Profeta Hananías ajinata profeta Jeremiaspa kunkanpi kasharqa chay yugota pʼakisqanmanta qhepata, Jehová Diosqa Jeremiasman nerqa:
13 “Rispa Hananiasman kayta nimuy: ‘Jehová Diosqa kayta nin: “Qanqa kʼullumanta yugota pʼakerqanki,+ kunantaj fierromanta yugota ruwanki”, nispa.
14 Kaytamin nin angelesta kamachej Israelpa Diosnin Jehovaqa: “Tukuy kay nacionespa kunkankuman fierromanta yugota wataykusaj, Babiloniamanta rey Nabucodonosorta sirvinankupaj. Tukuy kay naciones payta sirvenqanku.+ Campomanta monte animalestapis payman qopusaj”,+ nispa’”.
15 Chantá profeta Jeremiasqa profeta Hananiasman+ nerqa: “Hananías, ama jina kaspa uyariway. Qantaqa mana Jehová Dioschu kachamusorqa. Qanqa llullakuspa kay llajtamanta runasta creechishanki.+
16 Chayrayku Jehová Diosqa kayta nisunki: ‘Qantaqa kay jallpʼa patamanta chinkarpachisqayki. Kay wata qanqa wañunki, imaraykuchus parlasqaykiwan runasta Jehová Diospa contranpi oqharichinki’,+ nispa”.
17 Profeta Hananiastaj chay wata wañorqa, qanchis kaj killapi.
Sutʼinchaykunasnin
^ Chayri “Ajina kachun”.
