Jeremías 32:1-44
32 Jehová Diosqa Jeremiaswan parlarqa, rey Sedequías Judapi chunka watastaña kamachishajtin, Babiloniamanta rey Nabucodonosortaj*+ 18 watastaña kamachishajtin.
2 Chaypacha Babiloniamanta reypa soldadosnenqa, Jerusalén llajtata muyuykorqanku. Chaypachallataj profeta Jeremiasqa preso kasharqa Guardiaspa Pationkupi,+ Judamanta reypa kamachina wasinpi.
3 Judamanta rey Sedequiasqa Jeremiasta presocharqa+ kayta nispa: “¿Imajtintaj chay imasta willankiri? Qanqa nishanki: ‘Jehová Diosqa kayta nin: “Kay llajtataqa Babiloniamanta reypa makinman jaywaykusaj, paytaj japʼikaponqa.+
4 Judamanta rey Sedequiasqa mana ayqenqachu caldeospa makinkumanta. Payqa Babiloniamanta reypa makinman jaywasqapuni kanqa. Sedequiasqa paywan uyapura parlanqa, ñawisninta qhawaspa”,+ nispa’.
5 Jehová Diosqa nin: ‘Babiloniamanta reyqa Sedequiasta Babiloniaman apakaponqa, Sedequiastaj chaypi qhepakonqa paymanta yuyarikunaykama. Qankuna caldeoswan maqanakojtiykichejpis, manapuni atipankichejchu’,+ nispa”.
6 Jeremiastaj nerqa: “Jehová Diosqa kayta niwarqa:
7 ‘Tioyki Salumpa wawan Hanamel jamuspa nisonqa: “Anatotpi+ jallpʼayta rantikapuway. Qan aswan qaylla familiay kanki rantikapunawaykipaj”,+ nispa’”.
8 Jehová Dios niwasqanman jinapuni, tioypa wawan Hanamelqa Guardiaspa Pationkuman jamuspa niwarqa: “Ama jina kaspa Anatotpi jallpʼayta rantikapuway, mayqenchus Benjamín jallpʼapi kashan chayta. Aswan qaylla familiay kasqaykirayku, qan rantikapuwayta atinki. Rantikapuway ari”, nispa. Chaypi yacharqani Jehová Dios niwasqanman jinapuni chay kasqanta.
9 Ajinapi tioypa wawan Hanamelmanta Anatotpi jallpʼanta rantikaporqani. Paymanqa pesarqani qanchis siclos* qolqeta,+ chantá jaywarqani chunka qolqestawan.*
10 Chaytataj uj documentopi qhelqaykorqani,+ sellaykuytawantaj iskay testigosta wajyacherqani.+ Chantá balanzapi qolqeta pesaporqani.
11 Chaymantataj leyman jina, kamachiykunaman jinataj sellasqa documentota, chay mana sellasqa documentotawan japʼispa,
12 Neriaspa+ wawan Barucman+ jaywarqani, Mahseyaj allchhinman. Chay rantisqaymanta documentotaqa jaywarqani tioypa wawan Hanamelpa rikunanta, chay documentota firmarqanku chay testigospa rikunankuta, chantá Guardiaspa Pationkupi+ tiyasqa kasharqanku chay judiospa rikunankuta.
13 Chaymantataj paykunaj ñaupaqenkupi Baructa kamacherqani:
14 “Angelesta kamachej Israelpa Diosnin Jehovaqa kayta nin: ‘Kay sellasqa documentota, kay mana sellasqa documentotawan uj yurupi jallchʼamuy, chaypi unayta kakunanpaj’, nispa.
15 Angelesta kamachej Israelpa Diosnin Jehovaqa kayta nin: ‘Kay nacionpeqa watejmanta rantikonqanku wasista, jallpʼasta, uva huertasta ima’,+ nispa”.
16 Chay rantikusqaymanta documentosta Neriaspa wawan Barucman jaywaytawan, Jehová Diosmanta mañakorqani:
17 “Tukuyta Kamachej Señor Jehová Diosníy, qanmin jatun atiyniykiwan, kallpayoj makiykiwan ruwarqanki kay jallpʼata, jinallataj cielotapis.+ Qanpajqa mana imapis kanchu mana atikojqa.
18 Qanqa may chhika runasmanta khuyakunki. Jinapis tataspa juchasninkumantaqa wawasninkuta pagachinki.+ Qanmin kanki cheqa Diosqa,* qanmin kanki may Jatun Dios, Atiyniyoj Dios. Qanpa sutiykeqa angelesta kamachej Jehová.
19 Qanqa sumaj yuyaychaj Dios kanki, tukuy imatapis jatun atiyniykiwan ruwanki.+ Ñawisniykeqa runaspa tukuy ima ruwasqankuta qhawamushan,+ sapa ujman qopunaykipaj kausasqankuman jina, ruwasqankuman jinataj.+
20 Qanqa Egiptopi ruwarqanki milagrosta, señalesta ima. Chaytataj kay tiempo runaspis yachanku. Ajinamanta sutiykeqa may rejsisqa karqa Israelpi, jinallataj runas ukhupipis,+ imaynachus kunan kashan ajina.
21 Qanmin Israel llajtaykita Egiptomanta orqhomorqanki atiyniyoj makiykiwan, kallpayoj makiykiwan, mancharina imasta ruwaspa, señaleswan, milagroswan ima.+
22 ”Tiemponmantaj kay jallpʼata paykunaman qorqanki, maypichus lechewan miskʼiwan jinantin tiyan chayta.+ Chaytaqa ñaupa tatasninkuman juraspa qonaykita nerqanki.+
23 Paykunaqa kay jallpʼaman yaykumuspa kaypi tiyakorqanku. Jinapis nisqaykita mana kasusorqankuchu, nitaj qosqayki leytapis juntʼarqankuchu. Imatachus kamachisqaykitaqa manapuni kasusorqankuchu. Chayrayku qanqa kay ñakʼariyta paykunaman apachimorqanki.+
24 Caldeosqa jamuspa jallpʼa lomasta ruwanku kay llajtata japʼikapunankupaj.+ Paykunaqa kay llajtawan maqanakoj jamunku, kay llajtamanta runastaj paykunaj makinkuman urmanqanku, kay llajtapi maqanakuy,*+ yarqhay, wañuchej onqoy+ ima kasqanrayku. Qan rikunki jina, tukuy ima nisqayki juntʼakun.
25 Tukuyta Kamachej Señor Jehová Diosníy, qanqa niwarqanki: ‘Jallpʼata qolqewan rantikuy, testigostataj wajyachikuy’, nispa. Chayta niwarqanki kay llajta caldeospa makinkuman urmananpuni kashajtinpis”, nispa.
26 Chayllapi Jehová Diosqa Jeremiasman kayta nerqa:
27 “Noqamin Jehová kani, tukuy runaspa Diosnin. ¿Kanmanchu imapis mana ruwayta atinaypaj jinaqa?
28 Chayrayku Jehová Diosqa nin: ‘Kay llajtata jaywaykusaj caldeospa makinkuman, Babiloniamanta rey Nabucodonosorpa* makinman ima. Paymin kay llajtata japʼikaponqa.+
29 Kay llajtawan maqanakushanku chay caldeosqa, yaykumuspa kay llajtata ninawan japʼiykuchenqanku.+ Paykunaqa kay llajtatawan khuska ruphaykuchenqanku Baalta yupaychana wasista. Runasqa noqata phiñachinawankupaj chay wasispa terrazanpi* Baalman uywa wañuchisqasta jaywaj kanku, waj diosesmanpis vino ofrendasta jaywaj kanku’,+ nispa.
30 ”Jehová Dios nillantaj: ‘Israelmanta, Judamantawan runasqa, joven kasqankumantapacha qhawayniypi sajra imasllata ruwanku.+ Israel llajtaqa ruwasqasninwan phiñachishallawanpuni.
31 Kay llajtaqa ruwasqa kasqanmantapacha kunankama rabiachiwan, phiñachiwantaj.+ Chayrayku kay llajtaqa ñaupaqeymanta chinkachisqa kanan tiyan.+
32 Chayta ruwasaj Israelmantawan Judamantawan runas noqata phiñachinawankupaj sajra imasta ruwasqankurayku. Manataj paykunallachu sajra imasta ruwarqanku, manaqa reyesninkupis,+ kuraj kamachejkunasninkupis,+ sacerdotesninkupis, profetasninkupis,+ Judamanta runaspis, Jerusalenpi tiyakojkunapis.
33 Paykunaqa uyankuta rikuchinawankumanta nisqaqa, wasankuta rikuchiwarqanku.+ Noqaqa kutin kutita* paykunaman yachachiyta munarqani, jinapis ni mayqenninku uyariyta munawarqankuchu, nillataj kʼamisqaytapis japʼikorqankuchu.+
34 Paykunaqa sutiywan sutichasqa kashan chay wasiyman, millay santosninkuta churaykunku chʼichichanankupaj.+
35 Chantapis paykunaqa Hinón wayqʼopi*+ Baalpaj pata lugaresta ruwarqanku. Chaykunapitaj qhari wawasninkuta, warmi wawasninkuta ninapi ruphacherqanku* Mólek nisqa diospaj.+ Noqaqa manapuni chayta kamacherqanichu,+ nitaj yuyallarqanipischu chay millay imasta ruwanankuta, ajinamantataj Judata juchaman urmachinankuta’, nispa.
36 ”Qankunaqa nishankichej kay llajta Babiloniamanta reypa makinman jaywasqa kananta, kaypi maqanakuy,* yarqhay, wañuchej onqoy ima kasqanrayku. Israelpa Diosnin Jehovatajrí kayta nin:
37 ‘Noqaqa phiñakuspa, rabiakuspa, kʼajajta phiñakuspa paykunata chʼeqeracherqani.* Kunanqa noqallataj chay jallpʼasmanta paykunata tantamusaj.+ Noqaqa watejmanta paykunata kay lugarman kutichimusaj, ni imata manchachikuspa kaypi tiyakunankupaj.+
38 Paykunaqa llajtay kanqanku, noqataj Diosninku kasaj.+
39 Noqaqa sonqonkuta cambiasaj,+ kausayninkutapis, ajinamanta wiñaypaj manchachikunawankupaj. Chaytaqa ruwasaj paykunaj allinninkupaj, jinallataj jamoj wawasninkoj allinninkupajpis.+
40 Paykunawanqa wiñaypaj uj tratota ruwasaj.+ Paykunapajqa allin imasta ruwapullasajpuni.+ Paykuna noqata manchachikunawankupajqa sonqonkuman manchachikuyta churasaj, noqamanta ama karunchakunankupaj.+
41 Mayta kusikusaj paykunapaj allin imasta ruwaspa.+ Paykunataqa kay jallpʼapi sumajta sayachisaj+ tukuy sonqoywan, tukuy kallpaywantaj’, nispa”.
42 “Kaytamin Jehová Diosqa nin: ‘Imaynatachus kay llajtaman kay jatun ñakʼariyta apachimorqani, ajinallatataj allin imasta apachimusaj nishani chaytapis tukuyninta apachimusaj.+
43 Qankunaqa kunan nishankichej: “Kay jallpʼaqa chʼinpacha, ni runaspis, ni animalespis kankuchu, caldeospa makinkumantaj jaywasqa karqa”, nispa. Jinapis kay jallpʼapeqa watejmanta jallpʼasta rantikunkichej’,+ nispa.
44 ”Jehová Diosqa nin: ‘Runasqa jallpʼasta qolqewan rantikonqanku, chayta documentospi qhelqachenqanku, rantikusqankumanta documentosta sellaykonqanku, testigostapis wajyachenqanku. Tukuy chayta ruwanqanku Benjamín jallpʼapi,+ Jerusalén llajtaj muyuyninpi, Judá llajtaspi,+ orqospi kaj llajtaspi, ura pampaspi kaj llajtaspi,+ sur lado* llajtaspi ima. Imaraykuchus noqaqa presos apasqa kajkunata watejmanta kutichimusaj’,+ nispa”.
Sutʼinchaykunasnin
^ Hebreo parlaypeqa nin, “Nabucodorosor”. Kay suteqa ajinatapis escribikullantaj.
^ Uj sicloqa pesarqa 11,4 gramos (0,367 onzas troy). Yanapa B14 nisqata leeriy.
^ Chay qolqesqa qolqe metalmanta ruwasqa karqa.
^ Glosariopi cheqa Dios nisqata leeriy.
^ Hebreo parlaypeqa nin, “espada”.
^ Hebreo parlaypeqa nin, “Nabucodorosor”. Kay suteqa ajinatapis escribikullantaj.
^ Chayri “chay wasi pataspi”.
^ Hebreo parlaypeqa nin, “sutʼiyaymanta jatarikuspa”.
^ Hebreo parlaypeqa nin, “Hinonpa wawanpa wayqʼonpi”. Glosariopi Hinón wayqʼo nisqata leeriy.
^ Chayri “qhari wawasninkuta, warmi wawasninkuta nina ukhunta pasacherqanku”.
^ Hebreo parlaypeqa nin, “espada”.
^ Chʼeqerachiy: waj lugarespi ninku tʼaqarachiy.
^ Chayri “ura lado”.
