Jeremías 33:1-26
33 Jeremías Guardiaspa Pationkupi+ presollapuni kashajtin, Jehová Diosqa watejmanta paywan parlarqa:
2 “Jehová Diosmin kay jallpʼata ruwarqa, rikhuricherqa, allintataj sayacherqa, paypa sutenqa Jehová. Jehová Diosmin kayta nin:
3 ‘Wajyakamuway, noqataj kutichimusqayki. Willasqaykitaj jatuchaj imasta, mana entiendey atinasta, mana yachasqayki imasta’,+ nispa”.
4 “Israelpa Diosnin Jehovaqa kayta nin, kay llajtapi wasismanta, Judamanta reyespa wasisninkumanta, mayqenkunachus phirisqa kashanku llajtaman yaykunapaj jallpʼa lomaswan espadaswan ima, chaykunamanta,+
5 caldeoswan maqanakoj jamojkunamanta, wañusqa cuerposninkuwan kay wasista juntʼachejkunamanta, pikunatachus rabiaypi, kʼajaj phiñakuyniypi wañuracherqani chaykunamanta, sajra ruwasqasninkuwan phiñachiwaspa, kay llajtata chejnichiwarqanku chaykunamanta:
6 ‘Noqaqa jampiykusaj, sanoyachisajtaj.+ Paykunamanqa sanoyachispa allin kausayta qosaj, ni imamanta llakikuspa kausakunankupaj.+
7 Judamanta, Israelmantawan presos apasqa kajkunata kutichimusaj,+ paykunataqa watejmanta sayarichisaj qallariypi jina.+
8 Noqaqa perdonasaj tukuy juchasninkuta, jinallataj contraypi juchallikusqankutapis.+ Ajinamanta llimphus kanankupaj.+
9 Kay llajtaj sutenqa kusichiwanqa. Kay llajtaqa jallpʼantinmanta tukuy nacionesman rikuchenqa, ima allin imastachus llajtayrayku ruwasqayta.+ Runastaj alabawanqanku, jatunchawanqankutaj. Nacionesqa manchariywan kharkatitenqanku+ kay llajtaman allin imasta, allin kausaytawan qosqaymanta’, nispa”.+
10 “Jehová Diosqa nin: ‘Qankunaqa ninkichej kay lugarqa chʼinpacha kasqanta, mana runasniyoj, nitaj uywasniyoj kasqanta. Nillankichejtaj Judá llajtas, Jerusalén callespis chʼinpacha kasqankuta, ni uj runayoj kasqankuta, nitaj pipis chaypi tiyakusqankuta, ni uywaspis chaypi kasqankuta. Ajinapis kaypeqa watejmanta uyarikonqa
11 runaspa asirisqanku, kusiywan qhaparisqanku,+ novioj parlasqan, noviaj parlasqanpis. Uyarikullanqataj runaspa kayta nisqanku: “Angelesta kamachej Jehová Diosman graciasta qoychej, Jehová kʼacha kasqanrayku.+ Munakuynenqa wiñaypaj kallanqapuni”,+ nispa’.
”Jehová Diosqa nillantaj: ‘Paykunaqa Jehovaj wasinman apanqanku agradecekuna ofrendasta.+ Noqamin kay jallpʼamanta presos apasqa kajkunata kutichimusaj, paykunataj kaypi kausakonqanku ñaupajta jina’, nispa”.
12 “Angelesta kamachej Jehovaqa kayta nin: ‘Kay chʼin lugarpi, kay mana runasniyoj, nitaj uywasniyoj lugarpi, tukuy llajtasninpipis watejmanta pastos wiñanqa, ovejeros chayman ovejasninkuta qhatinankupaj’,+ nispa.
13 ”Jehová Diosqa nillantaj: ‘Ovejerosqa watejmanta ovejasninkuta yupanqanku orqospi kaj llajtaspi, ura pampaspi kaj llajtaspi, sur lado* llajtaspi, Benjamín jallpʼapi, Jerusalén llajtaj muyuyninpi,+ jinallataj Judá llajtaspipis’,+ nispa”.
14 “Jehová Diosqa nin: ‘Pʼunchaykuna qayllamushan, chaypacha noqaqa juntʼasaj imastachus Israel nacionman, Judá nacionmanpis nisqayta.+
15 Noqaqa chay tiempopi Davidpaj uj mirayta* rikhurichisaj, chay miraytaj cheqan kanqa.+ Paymin kay jallpʼapi justiciata ruwanqa, cheqan kajman jina.+
16 Pay kamachishajtenqa Judá salvasqa kanqa,+ Jerusalentaj mana manchachikuspa tiyakonqa.+ Paytaqa kay sutiwan rejsenqanku: Jehovamin Justicianchejqa’,+ nispa”.
17 “Kaytamin Jehová Diosqa nin: ‘Davidpa miraynenqa kanqapuni, Israelpa kamachina tiyananpi tiyaykukunanpaj.+
18 Levitasmanta* sacerdotesqa ñaupaqeypi kanqankupuni, qʼolachina* ofrendasta jaywanawankupaj, chʼaki mikhuy ofrendasta ruphachipunawankupaj, uywa wañuchisqasta jaywanawankupaj ima’, nispa”.
19 Jehová Diosqa watejmanta Jeremiasman parlamorqa:
20 “Jehová Diosqa kayta nin: ‘Qankunachus pʼunchaywan, tutawan trato ruwasqayta pʼakiwajchej, ajinamantataj mana horanpichu sutʼiyamunman, nitaj horanpichu laqhayamunman chayqa,+
21 chaypacharaj kamachiy Davidwan trato ruwasqayta pʼakiyman.+ Ajinamantataj kamachina tiyananpeqa manaña wawanchu rey jina tiyaykukunman.+ Chaypachallataj levitasmanta kamachisniy sacerdoteswan trato ruwasqaytapis pʼakiyman.+
22 Imaynatachus cielopi kaj imasta mana yupayta atikunchu, nillataj mar qochapi tʼiyupis yupayta atikunchu, ajinallatataj kamachiy Davidpa mirayninta, jinallataj sirvishawanku chay levitaspa mirayninkutapis mirachisaj, mana yupay atinata’, nispa”.
23 Jehová Diosqa watejmanta Jeremiasman nillarqataj:
24 “¿Reparankichu imatachus runas nishasqankuta? Paykunaqa nishanku: ‘Jehová Diosqa qhesachanqa ajllakorqa chay iskay familiasta’, nispa. Chayrayku paykunaqa llajtaymanta kajkunata mana respetankuchu, nitaj nacionta jinachu qhawanku.
25 ”Jehová Diosqa kayta nin: ‘Noqaqa pʼunchaywan tutawan uj tratota ruwarqani.+ Chantá cielopaj, jallpʼapajpis leyesta churarqani.+
26 Imaynatachus chayta ruwarqani, ajinallatataj ni jaykʼaj qhesachasajchu Jacobpa mirayninta, nitaj kamachiy Davidpa miraynintapis. Davidpa mirayninmantaqa reyesta ajllallasajpuni, Abrahanpa mirayninta, Isaacpa mirayninta, Jacobpa mirayninta kamachinankupaj. Noqaqa paykunaj mirayninkumanta presos apasqa kajkunata kutichimusaj,+ paykunamantataj khuyakusaj’,+ nispa”.
Sutʼinchaykunasnin
^ Chayri “ura lado”.
^ Hebreo parlaypeqa nin, “uj ramitata”.
^ Chayri “ruphachina”.
