Jeremías 36:1-32
36 Josiaspa wawan Jehoiaquim+ tawa watastaña Judapi rey kashajtin, Jehová Diosqa Jeremiasman nerqa:
2 “Uj kʼuyuna libropi* qhelqay imastachus noqa nerqayki chayta Israelpa contranta, Judaj contranta,+ tukuy nacionespa contranta ima.+ Chaypi qhelqay Josiaspa tiemponmantapacha kunankama imastachus nerqayki chayta.+
3 Judá nacionmanta kajkunaqa, ima ñakʼariytachus apachimunayta uyarispa, ichapis sajra ñanninkuta saqenkuman, ajinamantataj noqaqa pantasqasninkuta, juchasninkutapis perdonayman”,+ nispa.
4 Chaymanta Jeremiasqa Neriaspa wawan Baructa+ wajyarqa, paymantaj dictarqa Jehová Diospa tukuy nisqasninta. Baructaj chay dictasqanta kʼuyuna libropi qhelqarqa.+
5 Chantá Jeremiasqa Baructa kamacherqa: “Noqataqa ama Jehová Diospa wasinman yaykunkichu niwanku.
6 Chayrayku qan yaykunki. Chaypitaj Jehová Diospa nisqasninta jatunmanta leenki, kay kʼuyuna libromanta, mayqentachus noqa dictarqayki chaymanta. Kay kʼuyuna librotaqa Jehová Diospa wasinpi, ayuno pʼunchaypi leenki, tukuy runaspa uyarinankuta. Chay día leejtiykeqa, Judaj llajtasninmanta jamoj tukuy runas uyarisonqanku.
7 Ichapis ajinamanta paykunaqa sajra ñanninkuta saqenkuman, mañakusqankutataj Jehová Dios uyarinman. Imaraykuchus Jehová Diosqa kay nacionmanta runaspaj maytapuni phiñakun, rabiakuntaj”, nispa.
8 Neriaspa wawan Barucqa profeta Jeremiaspa kamachisqanman jina ruwarqa. Payqa Jehová Diospa wasinpi jatunmanta leerqa Jehová Diospa palabrasninta, mayqenkunachus kʼuyuna libropi qhelqasqa kasharqanku chaykunata.+
9 Josiaspa wawan Jehoiaquim+ phishqa watastaña Judapi rey kasharqa, jisqʼon kaj killañataj karqa. Chaypacha Jerusalenmanta tukuy runas, jinallataj Judaj llajtasninmanta Jerusalenman jamoj runaspis, Jehová Diospa ñaupaqenpi ayunanankupaj kamachisqa karqanku.+
10 Chantá Barucqa Jehová Diospa wasinpi jatunmanta leerqa Jeremiaspa palabrasninta, mayqenchus kʼuyuna libropi qhelqasqa kasharqa chayta. Chaytaqa leerqa copiayta yachaj* Safanpa+ wawan Guemariaspa+ cuartonpi,* tukuy runaspa uyarinankuta. Chay cuartoqa kasharqa pata patiopi, Jehová Diospa wasinpa mosoj punkun qayllapi.+
11 Guemariaspa wawan Micayaqa, nisunman Safanpa allchhenqa, Jehová Diospa palabrasninta uyarerqa, mayqenchus kʼuyuna libropi qhelqasqa kasharqa chayta. Chayta uyariytawantaj,
12 Micayaqa reypa wasinman* uraykorqa, secretarioj cuartonman. Chaypitaj tukuy kuraj kamachejkuna* tiyasqa kasharqanku: secretario Elisamá,+ Semayaj wawan Delayá, Acborpa+ wawan Elnatán,+ Safanpa wawan Guemarías, Hananiaspa wawan Sedequías, jinallataj tukuy waj kuraj kamachejkunapis.
13 Micayaqa paykunaman willarqa, imatachus Baruc kʼuyuna libromanta tukuy runaspaj leerqa chayta.
14 Chantá tukuy kuraj kamachejkunaqa, Jehudita Barucman kacharqanku. Jehudiqa Netaniaspa wawan karqa, Netaniastaj Selemiaspa wawan karqa, Selemiastaj Cusijpa wawan karqa. Jehuditaqa Barucman kacharqanku kayta nimunanpaj: “Tukuy runaspaj leerqanki chay kʼuyuna librota apamuy”, nispa. Ajinapi Neriaspa wawan Barucqa kʼuyuna librota apariykukuspa, paykuna kasharqanku chayman rerqa.
15 Paykunataj nerqanku: “Ama jina kaspa tiyarikuy, noqaykupajpis chay kʼuyuna libromanta leeripuwayku”, nispa. Chantá Barucqa paykunapaj leeporqa.
16 Leesqanta uyariytawantaj, kurajkunaqa mancharisqas qhawarinakorqanku. Barucmantaj nerqanku: “Kay kʼuyuna libropi nisqanta reyman willananchejpuni tiyan”, nispa.
17 Chantá Baructa taporqanku: “Ama jina kaspa willariwayku, ¿maymantataj chay palabrasta orqhorqankiri? ¿Jeremiaschu dictasorqa?”, nispa.
18 Baructaj kuticherqa: “Arí, Jeremías dictawarqa. Noqataj chayta kay kʼuyuna libropi tintawan qhelqaykorqani”, nispa.
19 Kuraj kamachejkunataj Baructa nerqanku: “Qanwan Jeremiaswan pakakamuychej, ama pipis yachachunchu maypichus kashasqaykichejta”,+ nispa.
20 Chantá chay kurajkunaqa, secretario Elisamaj cuartonpi chay kʼuyuna librota jallchʼarqanku. Chaymantataj reywan patiopi parlaj rerqanku, imatachus uyarisqankutataj tukuyninta willarqanku.
21 Chantá reyqa Jehudita+ kamacherqa chay kʼuyuna librota apamunanta. Jehuditaj secretario Elisamaj cuartonmanta kʼuyuna librota apamuspa, reypa uyarinanta leerqa, jinallataj reypa ladonpi sayasharqanku chay tukuy kuraj kamachejkunaj uyarinankuta.
22 Jisqʼon kaj killa karqa. Reytaj chiri tiempopaj ruwakorqa chay wasipi tiyasqa kasharqa, nina kʼajaj ñaupaqenpi qʼoñikuspa.
23 Jehudí kinsa chayri tawa tʼaqasta kʼuyuna libromanta leesqantawan, reyqa secretarioj cuchillonwan chay leesqan parteta khuchuspa ninaman wijchʼuykorqa. Ajinallatapuni ruwaspa tukuynin kʼuyuna librota ninapi ruphaykucherqa.
24 Ni reypis, ni reypa kamachisninpis chay kʼuyuna libromanta leekusqanta uyarispa mancharikorqankuchu, nitaj ropasninkutapis llikʼirakorqankuchu.
25 Chaywanpis Elnatanwan,+ Delayawan,+ Guemariaswanqa+ reyta mayta rogakuspa nerqanku, ama chay kʼuyuna librota ruphaykuchinanta. Reytaj mana paykunata kasorqachu.
26 Astawanpis payqa, reypa wawan Jerahmeelta, Azrielpa wawan Serayata, Abdeelpa wawan Selemiastawan kamacherqa japʼimunankuta, secretario Baructa, jinallataj profeta Jeremiastapis. Jehová Diostajrí Baructawan Jeremiastawan pakaykorqa.+
27 Jeremías dictaspa Barucwan qhelqacherqa chay kʼuyuna librota rey ruphaykuchisqantawan, Jehová Diosqa watejmanta Jeremiasman nerqa:+
28 “Judamanta rey Jehoiaquim ruphaykuchin chay kʼuyuna libropi qhelqasqa kasharqa chayta waj kʼuyuna libropi qhelqay.+
29 Judamanta rey Jehoiaquimpa contranpitaj kayta ninki: ‘Jehová Diosqa kayta nin: “Qanqa kʼuyuna librota ruphaykuchispa nerqanki: ‘¿Ima nispataj kay kʼuyuna libropi qhelqarqanki Babiloniamanta rey jamunanta, kay nacionta chinkachinanta, ni uj runayojta, nitaj uywasniyojta saqenantari?’,+ nispa.
30 Chayrayku Jehová Diosqa kayta nin Judamanta rey Jehoiaquimpa contranpi: ‘Rey Jehoiaquimpataqa ni mayqen wawan Davidpa kamachina tiyananpi tiyaykukonqachu.+ Wañusqa cuerponqa pʼunchayta ruphaypi wijchʼurayanqa, tutantaj chiripi.+
31 Noqaqa paykunaj pantasqankumanta cuentata mañasaj, paymanta, mirayninmanta, kamachisninmantapis. Chantá ima ñakʼariytachus apachimunayta nerqani, chayta apachimusaj paykunaman, Jerusalenpi tiyakojkunaman, Judamanta runasmanpis. Chay ñakʼariyta apachimusaj+ mana kasuwayta munasqankurayku’,+ nispa”’”.
32 Chantá Jeremiasqa waj kʼuyuna librota apamuytawan, Neriaspa wawan secretario Barucman jaywarqa.+ Baructaj chay kʼuyuna libropi qhelqarqa Jeremiaspa dictasqanta. Chaypitaj qhelqarqa ima palabraschus ñaupaj kaj kʼuyuna libropi qhelqasqa kasharqa chay tukuyninta, mayqentachus Judamanta rey Jehoiaquim ruphaykucherqa chay kikinta.+ Chay mosoj kʼuyuna libromanqa Diospa waj ashkha palabrasnintawan yapakorqa.
Sutʼinchaykunasnin
^ Glosariopi kʼuyuna libro nisqata leeriy.
^ Chayri “qhelqeri”.
^ Chayri “comedorninpi”.
^ Chayri “reypa wasinmanta autoridades”.
^ Chayri “kamachina wasinman”.
