Jeremías 38:1-28
38 Matanpa wawan Sefatías, Pasjurpa wawan Guedalías, Selemiaspa wawan Jucal,+ Malkiyaj wawan Pasjur+ ima, Jeremiaspa nisqanta uyarerqanku. Jeremiasqa tukuy runasman kayta nisharqa:
2 “Jehová Diosqa kayta nin: ‘Pichus kay llajtapi qhepakojqa espadawan wañuchisqa kanqa, chantá yarqhaywan, wañuchej onqoywan ima.+ Jinapis caldeosman jaywaykukojqa, kausallanqapuni. Payqa kausayninta salvanqa, kausallanqapunitaj’,+ nispa.
3 Jehová Diosqa kayta nin: ‘Kay llajtaqa Babiloniamanta reypa soldadosninman jaywaykusqa kanqa. Babiloniamanta reyqa kay llajtata japʼikaponqa’,+ nispa”.
4 Kuraj kamachejkunataj rey Sedequiasman nerqanku: “Reyníy, ama jina kaspa, kay runata wañuchinankuta niy.+ Kay runaqa chay parlasqanwan kay llajtapi puchoj soldadosta manchachishan, jinallataj kay llajtamanta runastapis. Kay runaqa mana munanchu kay llajtaj allinninta, manachayqa kay llajta llakiypi kanallanta munan”, nispa.
5 Rey Sedequiastaj nerqa: “Jeremiasqa makiykichejpi kashan, reyqa mana imatapis ruwayta atinmanchu qankunamanta jarkʼakunanpajqa”, nispa.
6 Chayrayku paykunaqa Jeremiasta japʼispa, reypa wawan Malkiyaj estanquenman wijchʼuykamorqanku. Chay estanqueqa Guardiaspa Pationkupi+ kasharqa. Jeremiastaqa waskhaswan uraykucherqanku. Chay estanquepeqa mana yaku karqachu, tʼurulla karqa. Chayrayku Jeremiasqa tʼuruman chinkaykuyta qallarerqa.
7 Etiopiamanta Ébed-Melecqa,+ uyarerqa Jeremiasta estanqueman wijchʼuykusqankuta. Payqa reypa wasinpi eunuco* karqa. Chaypacha reyqa Benjamín Punkupi+ tiyasqa kasharqa.
8 Ébed-Melectaj reypa wasinmanta llojsimuspa rey Sedequiasta nerqa:
9 “Señor reyníy, chay runas imatachus profeta Jeremiasta ruwasqankoqa mana allinchu. Paykunaqa estanque ukhuman wijchʼuykunku, chaypi payqa yarqhaymanta wañonqa, imaraykuchus kay llajtapeqa manaña tʼanta kanchu”,+ nispa.
10 Chantá reyqa, Etiopiamanta Ébed-Melecta kayta kamacherqa: “Kaymanta 30 runasta pusariykukuspa, profeta Jeremiasta chay estanquemanta orqhomuy niraj wañushajtin”, nispa.
11 Ajinata Ébed-Melecqa 30 runasta pusariykukuspa reypa wasinman yaykorqa. Chantá paykunaqa valorniyoj imasta jallchʼanku, chay cuarto+ uramanta orqhomorqanku thanta traposta, llikʼisqa thanta telasta ima. Chaytataj Jeremiasta orqhomunankupaj waskhaswan estanque ukhuman kachaykorqanku.
12 Etiopiamanta Ébed-Melectaj Jeremiasta nerqa: “Ama jina kaspa chay thanta traposta, chay llikʼisqa telastawan wallakʼuykiman churaykukuy waskha mana nanachisunanpaj”, nispa. Jeremiastaj ajinata ruwarqa.
13 Chantá paykunaqa chay waskhawan aysaspa Jeremiasta estanquemanta orqhomorqanku. Jeremiastaj Guardiaspa Pationkupi qhepakorqa.+
14 Chantá rey Sedequiasqa profeta Jeremiasta pusachimorqa Jehová Diospa wasinpi kashan chay kinsa kaj yaykuna punkuman. Chaypitaj reyqa Jeremiasman nerqa: “Ujta tapusqayki, amapuni imatapis pakawankichu”, nispa.
15 Jeremiastaj Sedequiasman nerqa: “Sutʼita willasqayki chayqa, qanqa wañuchiwanki. Yuyaychasqayki chaytaj, mana uyarillawankipischu”, nispa.
16 Chantá Sedequiasqa pakayllapi Jeremiasman juraspa nerqa: “Kausaj Jehová Diospa sutinpi jurayki, pichus kay kausayta qowanchej chaypa sutinpi. Noqaqa manapuni wañuchisqaykichu, nitaj wañuchisuyta munanku chay runaspa makinkumanpis jaywaykusqaykichu”, nispa.
17 Jeremiastaj Sedequiasman nerqa: “Angelesta kamachej Israelpa Diosnin Jehovaqa kayta nin: ‘Babiloniamanta reypa kuraj kamachisninman jaywaykukunki chayqa, kausallankipuni, kay llajtapis mana ninawan ruphaykuchisqachu kanqa. Qanpis familiaykipis* mana wañunkichejchu.+
18 Manachus Babiloniamanta reypa kuraj kamachisninpa makinkuman jaywaykukunki chayqa, kay llajtaqa caldeospa makinkuman jaywaykusqa kanqa. Paykunataj kay llajtata ninawan ruphaykuchenqanku,+ qanpis manapuni paykunaj makinkumanta ayqenkichu’,+ nispa”.
19 Rey Sedequiastaj Jeremiasman nerqa: “Caldeos ladoman pasapoj judiosta manchachikuni. Paykunachus caldeospa makinkuman jaywaykuwanqanku chayqa, caldeosqa mana khuyakuwanqankuchu”, nispa.
20 Chantá Jeremiasqa reyman nerqa: “Mana caldeospa makinkuman jaywasqachu kanki. Ama jina kaspa Jehová Diospa nisqanta kasuy, imatachus ruwanaykita niyki chaytapis ruway. Chayta ruwajtiykeqa allin risonqa, kausallankipunitaj.
21 Manachus jaywaykukunki chayqa, Jehová Diosqa willawanña imachus pasananta:
22 Judamanta reypa wasinpi puchoj tukuy warmista orqhomuspa apanqanku Babiloniamanta reypa kuraj kamachisninman.+ Chay warmistaj kayta nispa renqanku:
‘Atienekusqayki runasqa wasanchasunku, atipasunkutaj.+
Chakisniykita tʼuru ukhuman chinkaykuchinku.
Kunantaj kutirikuspa ripunku’, nispa.
23 Tukuy warmisniykita, wawasniykita ima caldeosman jaywaykonqanku, qanpis manapuni paykunaj makinkumanta ayqeyta atinkichu. Babiloniamanta reyqa japʼisonqapuni.+ Kay llajtatapis juchaykirayku ninawan ruphaykuchenqanku”,+ nispa.
24 Chantá Sedequiasqa Jeremiasman nerqa: “Kaytaqa amapuni pimanpis willankichu, ama wañuchisqa kanaykipaj.
25 Ichapis kay llajtamanta kuraj kamachejkunaqa, parlasqanchejta yachaytawan jamuspa nisunkuman, ‘ama jina kaspa, willariwayku imatachus reyman nisqaykita, ama ni imata pakawaykuchu, mana wañuchisqaykuchu.+ ¿Imatataj nisorqa reyri?’ nispa.
26 Chayta nisojtinkoqa qan ninki ‘reymanta mañakusharqani amaña Jehonatanpa wasinman watejmanta kutichinawanta, ama chaypi wañunaypaj’,+ nispa”.
27 Chay qhepata tukuy kuraj kamachejkunaqa Jeremiasta tapoj jamorqanku. Jeremiastaj rey kamachisqanman jina paykunaman kuticherqa. Chayrayku paykunaqa manaña imatapis taporqankuñachu, imaraykuchus ni mayqenninku uyarisqankuchu imatachus reywan Jeremiaswan parlasqankuta.
28 Jeremiasqa Guardiaspa Pationkupi kakorqa Jerusalén llajtata japʼikapunanku pʼunchaykama.+ Payqa chayllapipuni kakorqa Jerusalén llajtata japʼikapojtinkupis.+
Sutʼinchaykunasnin
^ Chayri “reypa kamachina wasinpi autoridad”.
^ Hebreo parlaypeqa nin, “wasiykipis”.
