Jeremías 40:1-16
40 Guardiaspa kamachejninku Nebuzaradanqa, Jeremiasta kachariytawan Ramá llajtamanta ripojta saqerqa, chay qhepatataj Jehová Diosqa Jeremiaswan parlarqa. Nebuzaradanqa+ Jeremiasta Ramá+ llajtaman cadenaswan wataykuspa apasqa, chaypi Jeremiasqa karqa Jerusalenmantawan Judamantawan presoswan khuska, pikunatachus Babiloniaman presosta apananku karqa, chaykunawan khuska.
2 Chantá guardiaspa kamachejninkoqa Jeremiasta waj ladoman pusaspa nerqa: “Jehová Diosniykeqa nerqaña kay ñakʼariy kay lugarman chayamunanta.
3 Jehová Diosqa nisqanman jinapuni kay ñakʼariyta apachimun. Chaytaqa apachimun Jehová Diospa contranta juchallikusqaykichejrayku, nisqanta mana kasusqaykichejrayku. Chayrayku kay tukuy imas qhatirishasunkichej.+
4 Kunan kay cadenasta makisniykimanta orqhoshayki. Noqawan Babiloniaman riyta munanki chayqa, jaku, noqa qhawasqayki. Mana noqawan riyta munanki chaytaj, quedakullay. Kunanqa kay nacionnintin qanpaj kashan, maypichá tiyakuyta munanki chayman rillay”,+ nispa.
5 Jeremiasqa manaraj ripusqachu Nebuzaradán kayta nishajtin: “Ahicampa+ wawan Guedaliasman+ kutipuy, Safanpa+ allchhinpaman. Paytaqa Babiloniamanta rey churan Judá llajtasta kamachinanpaj. Chaypitaj paywan quedakuy, chay llajtamanta runaswan khuska. Manachayrí maymanchus riyta munanki chayman ripuy”, nispa.
Guardiaspa kamachejninkoqa Jeremiasman jaywarqa qoqawita, uj regalotawan. Chantataj ripojta saqerqa.
6 Ajinapi Jeremiasqa Mizpaman+ tiyakoj riporqa, maypichus Ahicampa wawan Guedalías kasharqa chayman. Chaypitaj Guedaliaswan tiyakorqa, nacionpi puchoj runaswan khuska.
7 Chaymanta qhepata, soldadospa capitanesninkoqa, campopi soldadosninkuwan kasharqanku. Chaypitaj paykunaqa uyarerqanku, Babiloniamanta reyqa Ahicampa wawan Guedaliasta nacionta kamachinanpaj churasqanta. Paypa kamachiyninmantaj churasqanta wajcha runasta, pikunatachus mana presosta Babiloniaman apasqankuchu chaykunata, qharista, warmista, wawasta ima.+
8 Chantá chay soldadosta kamachejkunaqa Mizpaman+ rerqanku, Guedaliaswan parlaj. Paykunaqa karqanku Netaniaspa wawan Ismael,+ Careahjpa wawasnin Johanán,+ Jonatán ima, chantá Tanhumetpa wawan Seraya, netofatita Efaijpa wawasnin, maacatitaj wawan Jezanías+ ima. Paykunawan khuskataj kasharqanku tukuynin soldadosninku.
9 Chantá Ahicampa wawan Guedaliasqa, nisunman Safanpa allchhenqa, chay soldadosta kamachejkunaman, soldadosninkumanpis juraspa nerqa: “Ama manchachikuychejchu caldeosta sirviyta. Kay jallpʼaspi tiyakuspa Babiloniaj reyninta sirviychej, allintaj risonqachej.+
10 Noqaqa kay Mizpapi qhepakusaj, caldeos jamojtinku sutiykichejpi parlanaypaj. Qankunataj vinota, poqoykunata, aceiteta ima tantaykuspa yuruspi jallchʼankichej, tiyakunkichejtaj may llajtaspichus karqankichej chaypi”,+ nispa.
11 Moabpi, Ammonpi, Edompi, waj nacionespi tiyakoj judiospis, uyarillasqankutaj Babiloniamanta reyqa wakin runasta Judapi qhepakunankuta saqesqanta. Chantá uyarillasqankutaj chay puchoj runasta kamachinanpaj Ahicampa wawan Guedaliasta churasqanta, nisunman Safanpa allchhinta.
12 Ajinapi tukuy judíos kutinpuyta qallarerqanku, maymanchus chʼeqerachisqa* karqanku chaymanta. Paykunaqa Judá jallpʼaman kutimorqanku, Mizpaman, maypichus Guedalías kasharqa chayman. Kutimuspataj paykunaqa oqharerqanku ashkha vinota, ashkha poqoykunatawan.
13 Careahjpa wawan Johanán, chantá campopi kasharqanku chay soldadospa capitanesninkupis, Mizpaman jamorqanku Guedaliaswan parlaj.
14 Paykunaqa nerqanku: “¿Manachu yachanki ammonitaspa+ reyninku Baalisqa Netaniaspa wawan Ismaelta wañuchisunanpaj kachamusqanta?”,+ nispa. Ahicampa wawan Guedaliastaj mana paykunata creerqachu.
15 Chantá Careahjpa wawan Johananqa, Mizpapi kashaspa pakayllamanta Guedaliasman nerqa: “Noqa wañuchimusaj Netaniaspa wawan Ismaelta. Mana pipis chayta yachanqachu. ¿Imajtintaj saqellayman kasqa pay wañuchisunantari? ¿Imajtintaj saqellayman qanman jamunku chay judíos chʼeqerachisqa kanankutari? ¿Imajtintaj qhawakullayman kasqa Judamanta puchojkuna chinkanankutari?”, nispa.
16 Ahicampa wawan Guedaliastaj,+ Careahjpa wawan Johananta nerqa: “Ama wañuchimuychu. Qanqa llullasta Ismaelmanta parlashawanki”, nispa.
Sutʼinchaykunasnin
^ Chʼeqerachiy: waj lugarespi ninku tʼaqarachiy.
