Jeremías 42:1-22
42 Chantá soldadospa tukuy capitanesninku, Careahjpa wawan Johanán,+ Hosayaj wawan Jezanías, tukuy runas ima, wajchaspis qhapajkunapis, qayllaykorqanku
2 profeta Jeremiasman, nerqankutaj: “Ama jina kaspa, mañakusqaykuta uyariwayku ari. Jehová Diosniykimanta mañaripuwayku noqaykupaj, kay tukuy puchojkunapajwan. Qhawariy, chay chhika kasqaykumanta kayllaña puchuyku.+
3 Jehová Diosniyki niwachuyku may ñantachus rinaykuta, imatachus ruwanaykutapis”, nispa.
4 Profeta Jeremiastaj nerqa: “Ya. Jehová Diosniykichejmanta mañapusqaykichej, qankuna niwasqaykichejman jina. Chantá imatachus Jehová Dios qankunamanta niwasqanta tukuysitunta willasqaykichej. Ni imata pakasqaykichejchu”, nispa.
5 Paykunataj Jeremiasta nerqanku: “Jehová Diosqa atienekunapaj jina cheqa testigo kachun. Pay noqaykoj contraykupi testigo kachun, sichus mana ruwasqaykuchu* imatachus Jehová Dios qannejta willawasqayku chayta chayqa.
6 Noqaykoqa Jehová Diosniykoj nisqanta kasukusqayku, allinpis kachun chayri manapis. Chayrayku payman kachashayku. Jehová Diosniykoj nisqanta kasukojtiykoqa allin riwasqayku”, nispa.
7 Chaymanta chunka diasninman Jehová Diosqa Jeremiaswan parlarqa.
8 Chayrayku Jeremiasqa wajyacherqa Careahjpa wawan Johananta, soldadospa tukuy capitanesninkutawan, pikunachus Johananwan kasharqanku chaykunata, chantá wajyacherqa tukuy runastawan, wajchastapis qhapajkunatapis.+
9 Chantá Jeremiasqa paykunaman nerqa: “Qankunaqa Israelpa Diosnin Jehovaman kachawarqankichej sutiykichejpi mañakunaypaj, paytaj kayta nin:
10 ‘Sichus qankuna kay nacionpi qhepakunkichej chayqa, noqa sayarichisqaykichej, nitaj urmachisqaykichejchu, noqa plantasqaykichej, nitaj tʼirasqaykichejchu. Noqaqa ñakʼariyta qankunaman apachimusqaymanta pesachikusaj.*+
11 Ama manchachikuychejchu Babiloniamanta reyta, pitachus manchachikushankichej chayta’,+ nispa.
”Jehová Diosqa nillantaj: ‘Ama payta manchachikuychejchu. Imaraykuchus noqa qankunawan kashani salvasunaykichejpaj, paypa makinmantataj kacharichisunaykichejpaj.
12 Noqa qankunata khuyakusqaykichej,+ paypis qankunamanta khuyakullanqataj, nacionniykichejmantaj kutichisonqachej.
13 ”’Ichapis niwajchej: “Mana kay nacionpeqa qhepakusqaykuchu”, nispa. Jehová Diospa nisqanta mana kasuspataj,
14 ichapis niwajchej: “Mana qhepakusqaykuchu, astawanpis Egipto jallpʼaman ripusqayku.+ Chaypeqa mana guerrata rikusqaykuchu, mana pututoj waqasqanta uyarisqaykuchu, nitaj yarqhaymantapis wañusqaykuchu. Jaqaypi tiyakamusqayku”, nispa.
15 Qankuna Judamanta puchojkuna, sichus chayta ninkichej chayqa, uyariychej Jehová Diospa nisqanta. Angelesta kamachej Israelpa Diosnin Jehovaqa kayta nin: “Sichus Egiptoman riytapuni munankichej chayqa, sitajchus chayman tiyakoj* ripunkichejpuni chayqa,
16 mayta manchachikushankichej chay espadaqa Egipto jallpʼapi taripasonqachej. Manchachikushankichej chay yarqhaypis Egiptokama qhatiykusonqachej, chaypitaj wañunkichej.+
17 Egiptoman tiyakoj riytapuni munashanku chaykunaqa, tukuyninku espadawan wañuchisqa kanqanku, manachayri yarqhaywan, wañuchej onqoywan. Ni mayqenninku salvakonqankuchu, nitaj ayqenqankuchu, ima ñakʼariytachus paykunaman apachimusaj chaymanta”, nispa’.
18 ”Kaytamin angelesta kamachej Israelpa Diosnin Jehovaqa nin: ‘Imaynatachus rabiakuyniy, kʼajaj phiñakuyniypis Jerusalenpi tiyakojkunaman jamorqa,+ ajinallatataj kʼajaj phiñakuyneyqa pataykichejman jamonqa, sichus Egiptoman rinkichej chayqa. Qankunaqa mancharinaman tukunkichej. Runasqa qankunata maldecisonqachej, pisipaj qhawasonqachej, insultasonqachej,+ niñataj ujtawanpis kay jallpʼata rikunkichejñachu’, nispa.
19 ”Judamanta puchoj runas, Jehová Diosqa qankunaj contraykichejta parlanña. Ama Egiptoman riychejchu. Noqaqa sutʼinta willashaykichej,
20 juchallikunkichej chayqa, wañunkichej. Qankunallataj Jehová Diosniykichejman kachawarqankichej kayta nispa: ‘Jehová Diosniykumanta mañaripuwayku, niwaykutaj imatachus Jehová Diosniyku nisqanta. Noqaykutaj chay nisqanta ruwasqayku’,+ nispa.
21 Kunantaj noqaqa chayta willaykichejña. Qankunatajrí Jehová Diosniykichejpa nisqanta mana kasunkichejchu, nitaj imatachus qankunaman ninayta kamachiwarqa chaytapis ruwankichejchu.+
22 Chayrayku kayta yachaychej, maymanchus tiyakoj ripuyta munashankichej chaypeqa, espadawan wañuchisqa kankichej, manachayrí yarqhaywan, wañuchej onqoywan”,+ nispa.
Sutʼinchaykunasnin
^ Ruwasqaykuchu: waj lugarespi ninku ruwasajkuchu.
^ Chayri “sonqoyta nanachikusaj”.
^ Chayri “uj tiempota tiyakoj”.
