Jeremías 43:1-13
43 Jeremiasqa imatachus Jehová Diosninku nisqanta paykunaman willarqa. Payqa imatachus Jehová Diosninku willananta kamachisqanta tukuysitunta paykunaman willarqa. Willayta tukusqantawantaj,
2 Hosayaj wawan Azarías, Careahjpa wawan Johanán,+ tukuy wapuykachaj runas ima Jeremiasta nerqanku: “Chay niwasqaykoqa mana jinachu. Mana Jehová Diosniykuchu kachamusunki ninawaykupaj: ‘Ama Egiptoman tiyakoj ripuychejchu’, nispa.
3 Qantaqa Neriaspa wawan Baruc+ contraykupi churashasunki, ajinamanta caldeospa makinkuman urmanaykupaj, wañuchisqa kanaykupaj chayri Babiloniaman presos apasqa kanaykupaj”,+ nispa.
4 Ajinapi Careahjpa wawan Johanán, soldadosta tukuy kamachejkuna, jinallataj tukuy runaspis, Jehová Diospa nisqanta mana kasorqankuchu, manataj Judá jallpʼapi qhepakorqankuchu.
5 Astawanpis Careahjpa wawan Johananwan, soldadospa tukuy capitanesninkuwanqa, Judapi puchoj runasta apakaporqanku. Chay runasqa watejmanta Judapi tiyakunankupaj Judá jallpʼaman kutimusqanku, may nacionesmanchus chʼeqerachisqa* karqanku chaykunamanta.+
6 Johananwan soldadosta kamachejkunawanqa, Judamanta apakaporqanku qharista, warmista, wawasta, reypa tukuy warmi wawasninta, jinallataj tukuy pikunatachus guardiaspa kamachejninku Nebuzaradán,+ Guedaliaspa mandonman churarqa chaykunatapis.+ Chay Guedaliasqa karqa Ahicampa+ wawan, Safanpa+ allchhintaj. Chantá apakapullarqankutaj profeta Jeremiasta, Neriaspa wawan Baructa ima.
7 Paykunaqa Jehová Diospa nisqanta mana kasukuspa Egipto jallpʼaman yaykorqanku, Tahpanhesmantaj chayarqanku.+
8 Tahpanhespi kashajtinkutaj, Jehová Diosqa Jeremiasman nerqa:
9 “Tahpanhespi faraonpa* wasi punkunman jatuchaj rumista apay. Chaytataj mezclawan tapaykuy ladrillosniyoj kashan chay pampapi. Chaytaqa ruwamuy judiospa rikunankuta.
10 Chantá paykunaman ninki: ‘Angelesta kamachej Israelpa Diosnin Jehovaqa kayta nin: “Babiloniamanta rey Nabucodonosorta* wajyachisaj. Paypa kamachina tiyananta churasaj maypichus rumista tapaykuni, chay pataman. Kamachiy Nabucodonosorqa+ chay rumis patapi toldo wasinta* sayachenqa.+
11 Payqa jamuspa Egipto jallpʼamanta kajkunawan maqanakonqa.+ Chaypachataj wakenqa wañuchej onqoywan wañonqanku, wakintaj presos apasqa kanqanku, wakintajrí espadawan wañuchisqa kanqanku.+
12 Noqaqa Egiptomanta diosespa templosninkuta ninawan japʼiykuchisaj.+ Rey Nabucodonosortaj chaykunata ruphaykuchenqa, presostataj apakaponqa. Imaynatachus uj ovejeroqa imata jinalla ropanta churaykukun, ajinallataj rey Nabucodonosorqa imata jinalla Egipto jallpʼata japʼikaponqa, ni iman imanasqataj* riponqa.
13 Chantapis payqa Egipto jallpʼamanta Bet-Semespi* kaj pilaresta tʼunaranqa, Egiptomanta diosespa templosninkutapis ruphaykuchenqa”, nispa’”.
Sutʼinchaykunasnin
^ Chʼeqerachiy: waj lugarespi ninku tʼaqarachiy.
^ Faraonqa mana sutichu, manaqa Egiptomanta reyesta faraón nej kanku.
^ Hebreo parlaypeqa nin, “Nabucodorosor”. Kay suteqa ajinatapis escribikullantaj.
^ Chayri “carpa wasinta”.
^ Hebreo parlaypeqa nin, “sonqo tiyasqataj”
^ Chayri “Inti Wasipi (Templopi)”. Inti Wasi nispaqa Heliópolis nisqamanta parlashan.
