Jeremías 44:1-30
44 Egipto jallpʼapi tiyakoj tukuy judiosmanta,+ Migdolpi+ tiyakojkunamanta, Tahpanhespi+ tiyakojkunamanta, Nofpi+ tiyakojkunamanta, jinallataj Patrós+ jallpʼapi tiyakojkunamantapis Jeremías nerqa:
2 “Angelesta kamachej Israelpa Diosnin Jehovaqa kayta nin: ‘Qankuna rikorqankichej ima ñakʼariytachus Jerusalenman apachimusqayta,+ jinallataj Judá llajtasmanpis. Kunanqa chay llajtas thuñisqas kashanku, mana runayojtaj.+
3 Paykunataqa chay imas qhatirerqa sajra imasta ruwaspa phiñachiwasqankurayku. Paykunaqa phiñachiwarqanku uywa wañuchisqasta waj diosesman jaywaspa,+ paykunata sirvispa ima. Chay diosestaqa ni qankunapis rejserqankichejchu, nitaj ñaupa tatasniykichejpis.+
4 Noqaqa tukuy profetasniyta kutin kutita* kacharqani paykunaman kayta ninankupaj: “Ama jina kaspa, ama ruwaychejchu chay chejnisqay millay imasta”,+ nispa.
5 Paykunatajrí mana uyarikorqankuchu, nitaj kasukorqankuchu, astawanpis sajra imasta ruwallarqankupuni. Paykunaqa waj diosesman uywa wañuchisqasta jaywallarqankupuni.+
6 Chayrayku rabiayta, kʼajaj phiñakuyniytawan apachimorqani. Chay apachimusqaytaj Judá llajtasta, Jerusalén callestawan ruphaykorqa. Chayrayku chay llajtasqa chʼinpacha, thuñisqataj kashanku kunan pʼunchaykama’,+ nispa.
7 ”Angelesta kamachej Israelpa Diosnin Jehovaqa kayta nin: ‘¿Imajtintaj qankunallataj chay jina jatun ñakʼariyta maskʼakunkichejri? Qankunaj juchaykichejrayku wañunku Judamanta tukuy qharis, warmis, wawas, uña wawas ima, mana ujllapis puchunkuchu.
8 ¿Imajtintaj ruwasqasniykichejwan phiñachiwankichejri? Qankunaqa Egipto jallpʼaman tiyakoj ripuspa, chaypi uywa wañuchisqasta waj diosesman jaywashankichej. Chayrayku qankunaqa wañunkichej, chantapis kay jallpʼapi kaj tukuy nacionesmanta runasqa qankunata maldecisonqachej, insultasonqachejtaj.+
9 Qankunaj ñaupa tatasniykichej, Judamanta reyes,+ paykunaj warmisninku,+ qankuna, warmisniykichejpis sajra imasta ruwarqankichej+ Judá jallpʼapi, Jerusalén callespipis. Kunanqa, ¿chay sajra imasta ruwasqaykichejta qonqapunkichejñachu?
10 Kunankama qankunaqa mana sonqoykichejta llampʼuyachinkichejchu, nitaj noqata manchachikuwankichejchu.+ Noqaqa qankunapaj, jinallataj ñaupa tatasniykichejpajpis churarqani leyesta, kamachiykunata ima. Qankunatajrí mana chaykunata juntʼarqankichejchu’,+ nispa.
11 ”Chayrayku angelesta kamachej Israelpa Diosnin Jehovaqa kayta nin: ‘Noqaqa niniña qankunaman ñakʼariyta apachimunayta, tukuy Judatataj chinkachinayta.
12 Judamanta puchojkunataqa, nisunman Egipto jallpʼaman tiyakoj riytapuni munarqanku chaykunataqa japʼisaj. Paykunaqa tukuyninku Egipto jallpʼapi wañonqanku espadawan chayri yarqhaywan.+ Tukuyninku espadawan chayri yarqhaywan wañuchisqa kanqanku, wajchapis qhapajpis kachunku. Paykunaqa mancharinaman tukonqanku. Runasqa paykunata maldicenqanku, pisipaj qhawanqanku, insultanqankutaj.+
13 Pikunachus Egipto jallpʼapi tiyakushanku chaykunataqa castigasaj, imaynatachus Jerusalenta castigarqani espadawan, yarqhaywan, wañuchej onqoywan ima ajinata.+
14 Judamanta puchoj runasqa, pikunachus Egipto jallpʼaman tiyakoj jamorqanku chaykunaqa, mana ayqenqankuchu, nitaj salvakonqankuchu. Paykunaqa Judá jallpʼaman kutiyta munaspapis, mana kutiyta atenqankuchu. Pisi runaslla Egiptomanta ayqekonqanku’, nispa”.
15 Chaypeqa tantasqa kasharqanku ashkha qharis, warmisninkuwan khuska. Qharisqa yacharqanku warmisninku waj diosesman uywa wañuchisqasta jaywasqankuta. Chantá chay qharispis, chaypi sayasharqanku chay warmisninkupis, jinallataj Egiptomanta Patrospi+ tiyakoj runaspis,+ Jeremiasman nerqanku:
16 “Jehová Diospa sutinpi imatachus niwasqaykutaqa mana kasusqaykuchu.
17 Kasunaykumantaqa imatachus nisqaykuta tukuysitunta ruwasqayku: Cielomanta Reinaman* jaywasqayku uywa wañuchisqasta, vino ofrendastapis,+ imaynatachus ruwarqaykuña ajinata, chantá imaynatachus ñaupa tatasniyku, reyesniyku, kuraj kamachejkunasniyku ruwarqanku ajinata. Chaytaqa ruwarqayku Judá llajtaspi, Jerusalén callespi, maypachachus tʼantawan sajsasqa kasharqayku, tukuy ima patapitaj tiyakorqayku, ni ima ñakʼariyta rikuspa chaypacha.
18 Cielomanta Reinaman manaña uywa wañuchisqasta, nitaj vino ofrendastapis jaywasqaykumantapacha, tukuy ima pisiwayku, llajta masisniykupis espadawan yarqhaywan wañuranku”, nispa.
19 Warmispis nillarqankutaj: “Noqaykoqa Cielomanta Reinaman uywa wañuchisqasta, vino ofrendasta jaywarqayku. Chantapis jaywanapaj tʼantasta ruwarqayku chay diosaman rijchʼakojta, vino ofrendastapis payman jaywarqayku. Chay imastaqa qosasniykoj yachananta ruwarqayku”, nispa.
20 Chantá Jeremiasqa tukuy runasman kayta nerqa, qharisman, warmisninkuman, paywan parlasharqanku chay tukuy runasmanpis:
21 “Qankunaqa Judá llajtaspi, Jerusalén callespipis+ uywa wañuchisqasta waj diosesman jaywarqankichej. Ajinallatataj ruwarqanku ñaupa tatasniykichej, reyesniykichej, kuraj kamachejkunasniykichej, kay jallpʼamanta runaspis. Jehová Diosqa chayta mana qonqapunchu, payqa yuyarikullanpuni.
22 Jehová Diosqa niña aguantarqachu chay sajra ruwasqaykichejta, nitaj chay millay imasta ruwasqaykichejtapis. Chayrayku jallpʼaykichejqa chʼin lugarman tukorqa, mancharinaman, runaspa maldecinankuman. Kunantaj jallpʼaykichejqa ni uj runayoj kashan.+
23 Qankunaqa waj diosesman uywa wañuchisqasta jaywarqankichej, Jehová Diospa contrantataj juchallikorqankichej Jehová Diospa nisqanta mana kasukuspa, leyesninta, kamachiykunasninta, yuyarichisqasnintapis mana juntʼaspa. Chayrayku kay ñakʼariy chayamusunkichej, chaytataj kunan rikushankichej”,+ nispa.
24 Jeremiasqa tukuy runasman, tukuy warmismanpis nillarqapuni: “Qankuna Judamanta runas, kay Egipto jallpʼapi tiyakojkuna, tukuyniykichej Jehová Diospa nisqanta uyariychej.
25 Angelesta kamachej Israelpa Diosnin Jehovaqa kayta nin: ‘Qankunapis, warmisniykichejpis imatachus chay simiykichejwan parlasqaykichejtaqa, makisniykichejwanña ruwankichej. Qankunaqa nerqankichej: “Noqaykoqa imatachus ruwasaj nisqaykuta ruwasqaykupuni. Cielomanta Reinamanqa uywa wañuchisqasta, vino ofrendastapis jaywasqaykupuni”,+ nispa. Qankuna warmis, kunanqa imatachus ruwasaj nisqaykichejtaqa ruwankichejpuni, parlasqaykichejtaqa juntʼankichejpuni’, nispa.
26 ”Chayrayku Judamanta runas, tukuy pikunachus kay Egipto jallpʼapi tiyakunkichej chaykuna, uyariychej Jehová Diospa nisqanta: ‘Jehová Diosqa nin: “Jatunpaj qhawasqa sutiyrayku jurani: Tukuynin Egipto jallpʼapi Judamanta ni mayqen runapis sutiyta oqharenqachu+ kayta nispa jurananpaj: ‘Kausaj Jehová Diospa sutinpi jurani, paymin Tukuyta Kamachej Señorqa’,+ nispa.
27 Noqaqa paykunata qhawamushallani, paykunaman ñakʼariyta, mana allin imastawan apachimunaypaj.+ Kay Egipto jallpʼapi Judamanta tiyakoj runasqa, tukuyninku wañonqanku espadawan yarqhaywan ima, mana ujpis puchonqachu.+
28 Uj chhika runaslla espadamanta ayqenqanku. Paykunalla Egipto jallpʼamanta Judá jallpʼaman kutenqanku.+ Egipto jallpʼaman tiyakoj jamorqanku chay puchoj judiosqa, chaypacharaj yachanqanku pejpa nisqasninchus juntʼakusqanta, noqaj nisqasniychus chayri paykunaj nisqasninkuchus”, nispa’”.
29 “Jehová Diosqa nillantaj: ‘Qankunataqa kay lugarpi castigasqaykichej. Chayta yachanaykichejpajtaj uj señalta qosqaykichej. Ajinamanta yachankichej ima ñakʼariytachus apachimunayta nerqani chayta apachimunaytapuni.
30 Jehová Diosqa kayta nin: “Egiptomanta rey faraón* Hofrata enemigosninpa makisninkuman jaywaykusaj, pikunachus payta wañuchiyta munanku chaykunaj makisninkuman. Paytaqa jaywaykusaj, imaynatachus Judamanta rey Sedequiasta Babiloniamanta rey Nabucodonosorpa* makisninman jaywaykorqani ajinata. Rey Nabucodonosorqa Sedequiaspa enemigon karqa, paytataj wañuchiyta munarqa”,+ nispa’”.
Sutʼinchaykunasnin
^ Hebreo parlaypeqa nin, “sutʼiyaymanta jatarikuspa”.
^ Cielomanta Reina nispaqa parlashan Diosta wasanchaj israelitas yupaychaj kanku chay diosamanta. Ichá nillanmantaj warmista onqoj rikhurinankupaj yanapaj diosa.
^ Faraonqa mana sutichu, manaqa Egiptomanta reyesta faraón nej kanku.
^ Hebreo parlaypeqa nin, “Nabucodorosor”. Kay suteqa ajinatapis escribikullantaj.
