Jeremías 50:1-46
50 Jehová Diosqa kayta willacherqa profeta Jeremiaswan, caldeospa jallpʼanku Babiloniamanta:+
2 “Naciones ukhupi parlamuychej, willamuychejtaj.
Uj señalta* churamuychej, willamuychejtaj.
Ama ni imata pakaychejchu.
Kayta nimuychej: ‘Babiloniata atipaykunku.+
Belqa pʼenqaypi rikhurin.+
Merodacqa sinchʼi mancharisqa kashan.
Santosninkupis pʼenqaypi rikhurichisqa kanku.
Millay santosninkoqa* sinchʼi mancharisqa kashanku’, nispa.
3 Ajinata willamuychej norte ladomanta* uj nación Babiloniawan maqanakunanpaj jamusqanrayku.+
Chay nacionqa Babilonia jallpʼata mancharinaman tukuchin,nitaj pipis chaypi tiyakunñachu.
Runaspis animalespis ayqekunku.
Tukuyninku ripunku”, nispa.
4 Jehová Diosqa nin: “Chay pʼunchaykunapi, chay tiempopi, Israel nacionwan Judá nacionwanqa khuska jamonqanku.+ Paykunaqa waqan waqan purenqanku,+ Jehová Diosninkutataj khuska maskʼanqanku.+
5 Paykunaqa Sion lado qhawarisqa tapurikonqanku mayqen ñanchus Sionman risqanta,+ nenqankutaj: ‘Jamuychej, Jehová Dioswan wiñaypaj uj tratota ruwana, mana qonqasqa kananpaj’,+ nispa.
6 Llajtaymanta kajkunaqa chinkasqa ovejasman rijchʼakunku.+ Paykunataqa michejkunallankutaj chinkaracherqanku.+ Paykunataqa orqosman qhaterqanku, orqospi, lomaspi kayman jaqayman puricherqanku. Ajinapi paykunaqa samarikunanku lugarmanta qonqaporqanku.
7 Pillapis paykunata tarispaqa mikhukapullaj.+ Enemigosnenqa nej kanku: ‘Noqaykoqa mana juchayojchu kayku, imaraykuchus paykuna Jehová Diospa contranta juchallerqanku, jinallataj justicia wasej contranta, ñaupa tatasninkoj suyakusqankoj contranta, nisunman Jehovaj contranta’, nispa”.
8 “Babiloniamanta ayqekuychej.
Caldeospa jallpʼankumanta llosipuychej.+
Tropa uywasmanta punteros jina kaychej.
9 Noqaqa norte ladomanta jatuchaj nacionesta wajyachispa,+Babiloniaj contranta kachaykushani.
Paykunaqa maqanakunankupaj wakichisqa jamonqanku.
Babiloniaj contranta sayaykonqanku, Babiloniataj atipasqa kanqa.
Flechasninkoqa soldadospa flechasnin jinapuni,tatasta mana wawasniyojta saqen.+
Flechaspaqa cheqanta japʼichinku.
10 Caldea llajtaqa saqueasqa kanqa.+
Chay saqueajkunaqa sumaj kusisqa kanqanku”,+ nispa nin Jehová Diosqa.
11 “Qankunaqa mayta kusikorqankichej,+ fiestatapuni ruwarqankichej,noqaj herenciayta saqueashajtinku.+
Qankunaqa imaynatachus malta waka pasto patapi phinkiykacharin, ajinata phinkiykacharerqankichej.
Caballos jina qhaparerqankichej.
12 Mamaykichejqa pʼenqaypi rikhurin.+
Qankunata nacechikoj mamaykichejqa sonqo pʼakisqa kashan.
Qhawaychej, payqa naciones ukhupi aswan mana kasu ruwana,mana yakuyoj chʼin jallpʼa jina, tʼajra jallpʼa jinataj.+
13 Jehová Diospa phiñakuyninrayku Babiloniaqa ni uj runayoj qhepakonqa.+
Chʼinpacha qhepakonqa.+
Tukuy pikunachus Babilonia chaynejta pasajkunaqa, tʼukulla sinchʼi mancharisqa Babiloniata qhawanqanku.
Tukuy chay castigos Babiloniaman jamusqanta rikuspa silbarenqanku.+
14 Tukuy qankuna, pikunachus flechana arcota* matʼirinkichej* chaykuna,Babiloniata tukuy ladosmanta waykhaykuychej maqanakupaj wakichisqa.
Babiloniaman flechasta kachaykuychej, ama michʼakuspa flechasta kachaykuychej.+
Payqa Jehová Diospa contranpi juchallikorqa.+
15 Babiloniaj tukuynin ladosninpi qhapariychej maqanakuman yaykunaykichejpaj.
Payqa manaña kutichikonqachu.
Jehová Dios vengakusqanrayku+pilaresnenqa urmaykunku, perqasninpis thuñisqa kashanku.+
Paymanta vengakuychej.
Imatachus pay ruwarqa chay kikillantataj payta ruwaykuychej.+
16 Babiloniamanta chinkachiychej tarpoj runata,cosecha tiempopi joseta japʼej runatawan.+
Wañuchej espadarayku sapa ujpis llajtanman kutiponqa,sapa ujpis jallpʼanman ayqekonqa.+
17 ”Israelmanta runasqa chʼeqerasqa* ovejas jina kanku.+ Paykunataqa leones chʼeqeracherqanku.+ Ñaupajtaqa Asiriamanta rey paykunata mikhuykorqa,+ chaymantataj Babiloniamanta rey Nabucodonosor* tullusninta kʼutuykorqa.+
18 Chayrayku angelesta kamachej Israelpa Diosnin Jehovaqa kayta nin: ‘Noqaqa cuentata mañasaj Babiloniaj reyninmanta, jinallataj jallpʼanmantapis, imaynatachus Asiriaj reyninmanta cuentata mañarqani ajinata.+
19 Noqaqa Israelta pastosninman kutichimusaj.+ Payqa Carmelopi, Basanpi ima pastota mikhonqa.+ Payqa sajsakunankama mikhonqa Efraín orqospi,+ Galaad+ orqospi ima’, nispa”.
20 Jehová Diosqa nin: “Chay pʼunchaykunapi, chay tiempopi,Israelpa juchanta maskʼanqanku,nitaj ima juchatapis tarenqankuchu,nillataj Judaj juchasnintapis tarenqankuchu,imaraykuchus noqaqa perdonasaj, pikunatachus kausajta saqesaj chaykunata”,+ nispa.
21 Jehová Diosqa nin: “Merataim jallpʼawan maqanakoj wichariy, jinallataj Pecodpi tiyakojkunawanpis.+
Paykunata wañurachimuy, qʼalitunkutataj tukuchimuy”.
“Tukuy ima kamachisusqayta ruwamuy.
22 Nacionnintinpi wañuchinaku maqanakumanta chʼajwa uyarikun.
Manchay jatun llakiypuni uyarikun.
23 Chay jina tʼukunata jallpʼaj combontaqa partirparinku, tʼunarpankutaj.+
Chay jina tʼukunata Babiloniaqa nacionespa ñaupaqenpi mancharinaman tukun.+
24 Babilonia, qanpaj uj trampata churarqani,qantaj mana reparakuspalla chay trampawan japʼichikorqanki.
Qanqa Jehová Diospa contranpi sayaykusqaykirayku,taripachikorqanki, japʼichikorqankitaj.+
25 Jehová Diosqa armasta jallchʼana wasinta kicharin,chay ukhumantataj orqhomun phiñakuyninmanta armasta.+
Angelespa kamachejnin Tukuyta Kamachej Señor Jehová Diosqa, uj imata ruwanan kashancaldeospa jallpʼankupi.
26 Karu lugaresmanta jamuspa Babiloniawan maqanakuychej,+paypa pirwasninta kichariychej.+
Payta montón montonllata ruwaychej, trigotapis montonashawajchej jina.
Chinkasqata chinkachiychej.+
Ama pipis chaypi qhepakuchunchu.
27 Mana khuyarispa tukuynin torillosninta wañurachiychej.+
Paykunaqa ñakʼana* wasiman uraykuchunku.
Ay imanallanqankuchus paykunaqa, chay pʼunchay chayamun,chay cuentata qonanku tiempo chayamun.
28 Babilonia jallpʼamanta runaspa escapasqanku uyarikun,runaspa ayqekusqanku uyarikun.
Paykunaqa Sionman rinku Jehová Dios vengakusqanta willaj,templonmanta vengakusqanta willaj.+
29 Flechana arcosniyoj soldadosta wajyachiychej Babiloniawan maqanakunankupaj.
Wajyachiychej tukuy pikunachus flechana arcosninkuta matʼirinku* chaykunata.+
Babiloniaj muyuyninpi jarakuychej, amataj pitapis ayqekojta saqeychejchu.
Imastachus ruwasqanman jina qopuychej.+
Imastachus pay ruwarqa chay kikillantataj payta ruwaykuychej.+
Imaraykuchus payqa mayta jatunchakorqa Jehová Diospa ñaupaqenpi,Israelmanta Santo Diospa ñaupaqenpi.+
30 Chayrayku jovenesnenqa plazasninpi wañusqa wijchʼukonqanku.+
Chay pʼunchay tukuynin soldadosnin wañuranqanku”,* nispa nin Jehová Diosqa.
31 Angelespa kamachejnin Tukuyta Kamachej Señor Jehová Diosqa nin: “Mana kasukoj wawa,+ qhaway, noqa contraykipi kashani.+
Imaraykuchus cuentata mañasunay pʼunchayqa chayamonqa, chay pʼunchaytaj noqa qanta castigasqayki.
32 Mana kasukoj wawa, qanqa jaytʼakuspa* urmanki,nitaj pipis aysarisonqachu.+
Noqaqa llajtasniykita ninawan japʼiykuchisaj.
Ninaqa muyuyniykipi tukuy ima kajta ruphaykonqa”, nispa.
33 Angelesta kamachej Jehová Diosqa kayta nin:
“Israelmantawan Judamantawan runasqa ñakʼarichisqa kashanku.
Paykunataqa, pikunachus presosta apakaporqanku chaykuna mana kacharinkuchu,+manapuni kachariyta munankuchu.+
34 Jinapis paykunata Kacharichej Diosqa manchay kallpayoj.+
Paypa sutenqa angelesta kamachej Jehová.+
Payqa paykunapaj justiciata ruwaponqa,+nacionnintinpi allinta kausakunankupaj,+chantá Babiloniapi tiyakojkunata qhollpichinanpaj”,+ nispa.
35 Jehová Diosqa nin: “Uj espada jamonqa caldeospa contrankupi,Babiloniapi tiyakojkunaj contrankupi, kuraj kamachejkunasninkoj contrankupi, yachayniyoj runasninkoj contrankupi ima.+
36 Uj espada jamonqa llullakojkunaj* contrankupi, paykunataj sonso runas jina tukuy imata ruwarakonqanku.
Uj espada jamonqa maqanakoj soldadosninpa contrankupi, paykunataj mayta mancharikonqanku.+
37 Uj espada jamonqa caballosninkoj contrankupi, maqanakuna carretasninkoj contrankupi,chaypi tiyakunku chay tukuy laya* runaspa contrankupi ima.
Paykunaqa warmisman jina tukonqanku.+
Uj espada jamonqa Babiloniaj kapuyninpa contranpi, tukuy kapuynintaj saqueasqa kanqa.+
38 Ay yakusninmanta, yakusnenqa chʼakichisqa kanqa.+
Babiloniaqa ruwasqa santoswan juntʼa kashan.+
Chaypi tiyakojkunaqa mancharina imasta mosqoypi jina rikusqankurayku, locos jina tukuy imata ruwashanku.
39 Chayrayku chʼin jallpʼasmanta animalesqa chaypi tiyakonqanku aullaj animaleswan khuska.
Surispis* chaypi tiyakonqanku.+
Runastajrí manaña jaykʼajpis chaypi tiyakonqankuchu.
Wiñaypaj wiñaynintinpaj chʼinpacha kanqa”,+ nispa.
40 Jehová Diosqa nin: “Imaynatachus Diosqa Sodomatawan, Gomorratawan,+ muyuyninpi kaj ranchostawan chinkacherqa,+ ajinallatataj Babiloniatapis chinkachenqa, manataj pi runapis chaypi tiyakonqachu, nitaj pipis chaypi tiyakoj qhepakonqachu.+
41 Qhawaychej, norte ladomantapacha uj nación jamonqa.
Jallpʼaj karu lugaresninmantapacha+uj jatun nación jamonqa, manchay rejsisqa reyestaj+ jamonqanku.
42 Paykunaqa jamushanku flechana arcosniyoj, tʼojsina lanzasniyoj.+
Paykunaqa manchay phiñas kanku, manataj pitapis khuyakonqankuchu.+
Caballosninkupi montasqa jamusqankoqa,mar qochapis qhollchoqeyarishanman jina sonarin.+
Babiloniamanta runas,* paykunaqa qankunaj contraykichejpi uj runa jinalla sayaykunku.+
43 Babiloniamanta reyqa paykuna jamushasqankuta uyariytawan,+mana kallpayoj rikhurin.+
Payqa sinchʼi llakiywan oqharichikun.
Nanaynenqa nacechikoj warmej nanaynin jina.
44 ”Qhawariychej, maypichá ovejas mana manchachikuspa pastota mikhushanku chayman pichá wicharimonqa, imaynatachus uj león Jordán mayu kantupi sachʼas ukhumanta llojsimun ajinata. Jinapis niraj imapi paykunata ayqechisaj. Babiloniapi tiyakojkunata qhawananpajtaj ajllasqa runata churasaj.+ ¿Pitaj noqa jina kanmanri? ¿Pitaj noqaj contraypi sayaykunmanri? ¿Pi ovejerotaj noqaman sayaykuwanmanri?+
45 Chayrayku runas, uyariychej. Jehová Diosqa kayta nin Babiloniaj contranta,+ payqa kayta yuyaychakun caldeospa jallpʼankoj contranta:
Oveja uñastaqa qhatataspa apakaponqanku.
Tiyakushanku chay jallpʼaqa paykunaj juchankurayku chʼin lugarman tukonqa.+
46 Babiloniata atipaykuspa urmaykuchejtinku jallpʼaqa kharkatenqa,naciones ukhupitaj uj qhapariy uyarikonqa”,+ nispa.
Sutʼinchaykunasnin
^ Chayri “Uj poste señalta”.
^ Hebreo parlaypi millay santos palabraqa aka palabraman rijchʼakunman, chay palabratataj oqharikun imamantapis millachikuspa parlanapaj.
^ Chayri “pata ladomanta”.
^ Flechana arco: waj lugarespi ninku camba flecha.
^ Hebreo parlaypeqa nin, “sarunkichej”.
^ Chʼeqeray: waj lugarespi ninku tʼaqaray.
^ Hebreo parlaypeqa nin, “Nabucodorosor”. Kay suteqa ajinatapis escribikullantaj.
^ Ñakʼay: waj lugarespi ninku degollay, wañuchiy.
^ Hebreo parlaypeqa nin, “sarunku”.
^ Hebreo parlaypeqa nin, “chʼinyachisqa kanqanku”.
^ Jaytʼakuy: waj lugarespi ninku tropezakuy.
^ Chayri “llulla profetaspa”.
^ Chayri “tukuy rijchʼaj”.
^ Chayri “Avestrucespis”.
^ Hebreo parlaypeqa nin, “Babiloniaj warmi wawan”.
