Jeremías 6:1-30
6 Benjaminmanta runas,* Jerusalenmanta karupi pakakamuychej.
Tecoapi+ putututa waqachimuychej.+
Bet-Hakerem patapi ninata japʼichimuychej uj señalta jina.
Imajtinchus norte ladomantapacha* uj ñakʼariy jamushan, uj jatun llakiy.+
2 Sionpa warmi wawanqa uj kʼachita warmiman rijchʼakun, manchay lulusqa* warmiman.+
3 Michejkunaqa tropa uywasninkuta qhatimonqanku.
Paypa muyuyninpi toldo wasisninkuta* sayarichenqanku.+
Sapa ujninku tropa uywasninkuta michenqanku.+
4 “Wakichikuychej Jerusalenwan maqanakoj rinaykichejpaj.
Jaku rinachej. Chaupi pʼunchayta maqanakoj yaykusunchej”.
“Imanallasunchus noqanchejqa, inteqa yaykupushanña,
ñapis chʼisiyaykushanña”.
5 “Jakuchej. Chʼisin maqanakoj yaykusunchej.
Sumaj perqasniyoj torresninta phiriykamusunchej”.+
6 Angelesta kamachej Jehová Diosqa kayta nin:
“Sachʼasta kʼutumuychej. Chantá jallpʼa lomasta ruwaychej Jerusalenman yaykunaykichejpaj.+
Chay llajtaqa cuentata qonan tiyan.
Chay llajtapeqa ñakʼariylla tiyan.+
7 Imaynachus estanque ukhupi yakoqa pachan qhasallapuni,ajinallataj kay llajtapipis, sajra ruwaykunaqa pachallanpuni.
Chaypeqa maqanakuylla, ñakʼariylla tiyan.+
Noqaqa rikuni onqoykunallata, castigosllata.
8 Jerusalén, nisusqayta kasukuy. Manachus kasuwanki chayqa, qanmanta millachikuspa karunchakusaj.+
Chʼinpachata rikhurichisqayki, mana ni uj runayojta”,+ nispa.
9 Angelesta kamachej Jehová Diosqa kayta nin:
“Imaynatachus uvasta mana ni uj puchuyojta chajmanku,* ajinallatataj Israelpi puchojkunatapis ni uj puchuyojta chajmanqanku.
Watejmanta uvasta pallay, uvasta pallaj runa jina”, nispa.
10 “¿Pimantaj parlasaj? ¿Pimantaj willasajri?
¿Pitaj uyariwanqari?
Paykunaqa ninrisninkuta tapaykunku, nitaj imatapis uyariyta atinkuchu.+
Paykunaqa Jehová Diospa nisqasninta mana valechinkuchu,+manataj uyarillaytapis munankuchu.
11 Chayrayku Jehová Diospa phiñakuynenqa noqapi juntʼa kashan.
Saykʼusqaña kashani, niña japʼiyta atiniñachu”.+
“Phiñasqa kasqaymantaqa willamuy* callespi kashanku chay wawasman,+tantasqa kashanku chay jovenesmanpis.
Paykunaqa tukuyninku presochasqa kanqanku: qharispis, warmisninkupis,viejituspis, allin viejituspis.+
12 Wasisninkutaqa wajkunaman qoponqanku,jallpʼasninkutawan warmisninkutawan khuska.+
Noqaqa makiyta aysarisaj kay nacionpi tiyakojkunaj contranta”, nispa nin Jehová Diosqa.
13 “Juchʼuypis jatunpis engañaspa gananciata japʼinku.+
Tukuypuni chʼaukiyanku, profetasmantapacha sacerdoteskama.+
14 Paykunaqa llajtaypa nanasqasninta* patallanmanta jampiykuyta munanku:
‘Allin kausay kan. Allin kausay kan’, nispalla.
Chaypajqa mana allin kausay kanchu.+
15 ¿Paykuna pʼenqakunkuchu millay imasta ruwasqankumanta?
Paykunaqa ni imaynata pʼenqakunkuchu.
Imachus pʼenqakuy kasqantapis mana yachankuchu.+
Paykunaqa urmanqanku urmajkunaj chaupinkuman.
Noqa castigajtiy paykunaqa chankaykachaspa* urmanqanku”, nispa nin Jehová Diosqa.
16 Jehová Diosqa kayta nin:
“Crucepi sayaspa qhawariychej.
Tapurikuychej chay ñaupa ñankunamanta.
Tapurikuychej mayqen ñanchus allin kasqanta, chaynintataj puriychej.+
Ajinamanta samarikuyta tarinkichej”, nispa.
Paykunataj ninku: “Mana chay ñantaqa purisqaykuchu”,+ nispa.
17 “Noqa churarqani chay qhawaj guardiasqa*+ nerqanku:
‘Uyariychej pututoj waqasqanta’,+ nispa”.
Paykunataj nerqanku: “Mana uyariyta munaykuchu”,+ nispa.
18 “Chayrayku naciones, uyariychej.
Qankunapis runas,imachus paykunata qhatirinanta yachaychej.
19 Qanpis jallpʼa, uyariy.
Kay nacionman uj jatun ñakʼariyta apachimusaj,+sajra imasta wakichisqankurayku.
Paykunaqa mana nisqayta uyarerqankuchu,leyniytapis* mana valecherqankuchu”.
20 “Sabamanta yuraj inciensota apamojtiykipis,may jina karu nacionmanta sumaj qʼapayniyoj plantata apamojtiykipis, noqapajqa mana valenchu.
Qʼolachina* ofrendasniykichejtapis mana japʼikunichu.
Uywasta qʼolachispa jaywawasqaykichejtapis mana allinpajchu qhawani”.+
21 Chayrayku Jehová Diosqa nin:
“Kunanqa kay nacionmanta runaspaj trancasta churasaj.
Chaypi urmanqankutatas wawasninkuwan khuska.
Tukuy runas, runa masinkuwan khuska urmanqanku.
Tukuyninku wañonqanku”,+ nispa.
22 Jehová Diosqa kayta nin:
“Norte ladopi jallpʼasmanta uj llajta jamonqa.
Uj jatun nación jatarimonqa karu jallpʼasmantapacha.+
23 Paykunaqa flechana arcota,* tʼojsina lanzatawan oqharikonqanku.
Paykunaqa manchay phiñas kanku, mana khuyakusonqankuchu.
Parlasqankoqa mar qocha jina sonarenqa.
Paykunaqa caballospi montasqa jamonqanku.+
Sionpa warmi wawan, paykunaqa qanwan maqanakunankupaj uj wapu soldado jina sayaykonqanku”, nispa.
24 Chay willayta uyarejtiyku,makisniykoqa mana kallpayoj rikhurinku.+
Nanayqa noqaykuman chayamuwayku.
Chay nanayqa nacechikoj warmej nanaynin jinapuni.+
25 Ama campoman llojsiychu.
Ama ñanta puriychu.
Enemigoqa espadayoj kashan.
Tukuynejpi runasqa mancharisqa kashanku.
26 Llajtaypa warmi wawan,qhashqa telawan maytʼuykukuy,+ ushpha patapitaj suntʼiykachay.*
Llakiywan jikʼun jikʼunta waqay, imaynatachus uj kʼata wawanku* wañupojtin tatas waqanku ajinata.+
Imajtinchus chinkachejqa ujllata patanchejpi rikhurenqa.+
27 “Noqa qantaqa* churayki metalta chʼuwachaj runata jina,llajtayta llimphuchanaykipaj.
Qanqa paykunata allinta qhawanayki tiyan, imatachus ruwashasqankutataj sumajta reparanayki tiyan.
28 Tukuyninku manchay kʼullu runas* kanku.+
Wajkunamanta llullasta parlaspa purinku.+
Paykunaqa cobre jina, fierro jinataj kanku.
Tukuyninku millay kausayniyoj kanku.
29 Nina phukuna fuelleqa ruphaykun.
Ninamantaqa plomolla* unuyaspa llojsimun.
Qhasillata tukuy imata ruwan metalta chʼuwachaj runaqa.+
Sajra runasqa manapuni llajtaymanta chinkankuchu.+
30 Runasqa qankunata nisonqachej: ‘Wijchʼusqa qolqe metal’, nispa.
Imaraykuchus Jehová Diosqa qankunata qhesachasorqachej”.+
Sutʼinchaykunasnin
^ Chayri “pata ladomantapacha”.
^ Hebreo parlaypeqa nin, “wawas”.
^ Luluy: waj lugarespi ninku wawachay.
^ Chayri “carpa wasisninkuta”.
^ Chajmay: waj lugarespi ninku pallay, chajmiy.
^ Hebreo parlaypeqa nin, “Jichʼaykamuy”.
^ Chayri “pʼakisqa tullunta”.
^ Chankaykachay: waj lugarespi ninku tharpiykachay, aylinkachay, thamaykachay.
^ Chayri “torremanta qhawajkunaqa”.
^ Chayri “kamachisqaytapis”.
^ Chayri “Ruphachina”.
^ Flechana arco: waj lugarespi ninku camba flecha.
^ Suntʼiy: waj lugarespi ninku qhospay.
^ Chayri “sapan wawanku”.
^ Qantaqa nispaqa Jeremiasmanta parlashan.
^ Chayri “manchay tercos”.
^ Chayri “titilla”.
