Jeremías 9:1-26
9 Umaychus yaku pujyu kanman,ñawisniychus yaku juturi kanman,+tuta pʼunchay waqayman,llajta masisniy wañupusqankurayku.
2 Chʼin lugarllapipis chayakunaypaj wasiy tiyapuwanman.
Chayman ripuyman llajtayta saqerparispa, llajta masisniymanta karunchakuspa.
Paykunaqa tukuyninku qhencha runas kanku.+
Wasanchayman yachasqa runas kanku.
3 Qallunkutaqa flechana arcota jina* matʼirinku.
Tukuy nacionnintinpi llullakuylla juntʼa, nitaj cheqan runaqa kanchu.+
Jehová Diosqa nin: “Sajra imasllata kutin kutita ruwanku,nitaj noqataqa kasuwankuchu”,+ nispa.
4 “Tukuyninku runa masinkumanta sumajta qhawakuchunku,amataj hermanollankupipis confiachunkuchu.
Hermanosninkoqa wasanchajkuna kanku,+runa masisninkupis wajkunamanta llulleriosta parlajkuna kanku.+
5 Tukuyninku runa masinkuta engañanku,nitaj pipis cheqan kajta parlanchu.
Paykunaqa qallunkuta llullakuyman yachaykuchinku.+
Chay chhika sajra imasta ruwasqankupi saykʼusqaña kashanku.
6 Qanqa llulla runas chaupipi tiyakushanki.
Chay runasqa llullas kanku, nitaj rejsiwayta munankuchu”, nispa nin Jehová Diosqa.
7 Chayrayku angelesta kamachej Jehová Diosqa kayta nillantaj:
“Metalta jina unuyachispa paykunata chʼuwachasaj.+
¿Imatawantaj astawan ruwayman llajtaypa warmi wawantari?
8 Qallunkoqa wañuchej flecha jina, llulla imasllata parlan.
Runa masinkumanqa kʼachituta allin kausaymanta parlanku.
Sonqonkupitajrí uj trampata wakichinku”,* nispa.
9 Jehová Diosqa nin: “¿Manachu chay ruwasqankumantaqa cuentata mañanay kanman?”.
“¿Manachu kay jina naciontaqa castiganay kanman?+
10 Llakiywan waqasaj orqosmanta.
Llakiy takiyta takisaj chʼin jallpʼaspi pastosmanta.
Chaykunataqa qʼalata ruphaykuchinku, nitaj pipis chayninta purinñachu,niña uywaspa waqasqankupis chaypi uyarikunñachu.
Pʼisqospis animalespis ayqekunku, qʼalata chinkapunku.+
11 Jerusalén llajtataqa rumi montonman tukuchisaj,+ kʼita alqospa wasinkuman tukuchisaj.+
Judá llajtastapis chʼinman tukuchisaj, ni uj runayojman.+
12 ¿Pitaj may jina yachayniyoj kasqa kayta entiendenanpajri?
¿Pimantaj Jehová Dios kayta willasqa wajkunaman willamunanpajri?
¿Imajtintaj kay jallpʼaqa wañusqa kashanri?
¿Imajtintaj ruphasqa kasqanrayku tʼajra jallpʼa jina kashanri?
¿Imajtintaj mana pipis chayninta purinchuri?”.
13 Jehová Diosllataj kuticherqa: “Chayqa ajina kashan, paykunaj ñaupaqenkuman churasqay leyta* mana valechisqankurayku, nitaj chayta qhatisqankurayku, nitaj nisqaytapis kasukusqankurayku.
14 Astawanpis paykunaqa kʼullukuspa* sonqonkoj munayninta ruwarqanku,+ Baal santostataj yupaycharqanku, tatasninku yachachisqankuman jina.+
15 Chayrayku angelesta kamachej Israelpa Diosnin Jehovaqa kayta nin: ‘Kay runasmanqa ajenjota* mikhuchisaj, venenasqa yakutataj tomachisaj.+
16 Paykunataqa mana rejsisqanku nacionesman apachisaj, mayqenkunatachus mana tatasninkupis rejserqankuchu chaykunaman,+ qhepankutataj uj espadata kachasaj paykunata tukuchisqata tukuchinanpaj’,+ nispa.
17 Angelesta kamachej Jehová Diosqa kayta nin:
‘Allinta reparaychej imachus kashasqanta.
Llakiy takiykunata takej warmista wajyachimuychej,+aswan sumajta yachajkunata wajyachimuychej.
18 Paykunata wajyachimuychej apurayllata jamunankupaj, llakiy takiytataj takipunawanchejpaj.
Ajinamanta ñawisninchej waqaywan juntʼa kananpaj,ñawisninchejmanta waqay yaku jina surumunanpaj.+
19 Sionmantapacha uyarikamun llakiyta waqasqanku:+
“Kay jina llakiyta tukuchiwanchejqa.
Kay jina pʼenqayta ruwawanchejqa.
Noqanchejtaqa nacionninchejmanta orqhowanchej, wasisninchejtapis llimphuta thuñiykunku”,+ nispa.
20 Qankuna warmis, Jehová Diospa palabrasninta uyariychej,ninrisniykichejqa Diospa nisqanta japʼikuchunku.
Kay llakiy takiytaqa warmi wawasniykichejman yachachiychej.
Kay llakiy takiytaqa purajmanta yachachinakuychej.+
21 Wañoyqa ventanasninchejta yaykumun,sumaj perqasniyoj torresninchejman yaykumun.
Wañoyqa yaykumun callesmanta wawasta apakapunanpaj,plazasmanta jovenesta apakapunanpaj’,+ nispa.
22 Kayta niy: ‘Jehová Diosqa kayta nin:
“Wañusqa cuerposqa wanu jina jallpʼa patapi choqarayanqanku.
Imaynatachus ruthoj runaqa gavillasta* sinrullata* saqen, nitaj pipis oqharej kanchu,ajinata choqarayanqanku”,+ nispa’”.
23 Jehová Diosqa kayta nin:
“Yachayniyoj runaqa ama yachayninmanta runaykachachunchu.+
Atiyniyoj runapis ama atiyninmanta runaykachachunchu.
Qhapaj runapis ama qhapaj kasqanmanta runaykachachunchu”.+
24 “Chaywanpis runaykachanan kajtenqa, kaymanta runaykachachun:
Tanteayta yachasqanmanta, noqata rejsiwasqanmanta,+noqa Jehová kasqayta yachasqanmanta. Noqamin kay jallpʼapi munakuyta* rikuchini, justiciata ruwani, cheqan kajman jinataj ruwani.+
Chaykunamin noqamanqa gustawan”,+ nispa nin Jehová Diosqa.
25 Jehová Diosqa nin: “Pʼunchaykuna qayllamushan, chaypachaqa cuentata mañasaj aychallapi circuncidasqa* kajkunamanta.+
26 Cuentata mañasaj Egiptomanta,+ Judamanta,+ Edommanta,+ ammonitasmanta,+ Moabmanta,+ jinallataj tukuy pikunachus patillanku chaynejmanta chujchankuta kʼutukunku, chʼin jallpʼapitaj tiyakunku chaykunamanta.+ Imaraykuchus tukuy chay nacionesqa, jinallataj Israelpa mirayninmanta kajkunapis, mana sonqonkupi circuncidasqachu kanku”,+ nispa.
Sutʼinchaykunasnin
^ Flechana arco: waj lugarespi ninku camba flecha.
^ Hebreo parlaypeqa nin, “wakichikunku pakakuspa suyaykunankupaj”.
^ Chayri “kamachiyta”.
^ Chayri “tercos kaspa”.
^ Chayri “marqʼasta”.
^ Chayri “fila filallata”.
^ Hebreo parlaypeqa niyta munan mana tukukoj munakuy, mana tukukoj kʼacha kay. Glosariopi mana tukukoj munakuy nisqata leeriy.
^ Circunciday niyta munan qharejpa jispʼananpa puntanmanta qaritanta khuchurpariy. Glosariopi circuncisión nisqata leeriy.
