Josué 20:1-9
-
Pakakuna llajtas (1-9)
20 Chantá Jehová Diosqa Josueman nerqa:
2 “Israelitasman niy: ‘Pakakuna llajtasta+ ajllaychej, imaynatachus Moisesnejta nerqaykichej ajinata.
3 Sichus pipis mana munashaspalla chayri mana cuentata qokuspalla* runata wañuchinman chayqa, chayman pakakoj ayqekonqa wañojpa vengakojninmanta.+
4 Pichus runata wañuchejqa chay llajtasmanta+ mayqellanmanpis ayqekuspa, llajta punkupi+ kurajkunaman willakonqa imatachus ruwasqanta. Paykunataj chay llajtaman yaykuchenqanku, rikuchenqankutaj maynejpichus paykuna ukhupi tiyakunanta.
5 Sichus wañojpa vengakojnin chay llajtakama qhatiykunman chayqa, chay llajtamanta kurajkunaqa mana chay pakakoj runata payman jaywaykonqankuchu. Payqa mana cuentata qokuspalla* runa masinta wañucherqa, nitaj chejnikusqanraykuchu.+
6 Chay pakakoj runaqa israelitasmanta juezkuna juzganankukama chay llajtapi kanan tiyan.+ Chantá payqa chay llajtallapipuni tiyakunan tiyan, pichus chaypacha kuraj kaj sacerdote kashanqa chay wañupunankama.+ Chay sacerdote wañupojtinraj wasinman kutiponqa, maymantachus ayqekamorqa chay llajtanman’,+ nispa”.
7 Chantá israelitasqa kay llajtasta Diospaj tʼaqarqanku pakakuna llajtas kanankupaj: Galileapi Quedes+ llajtata, chayqa kashan Neftalí orqospi. Efraín orqospitaj Sichem*+ llajtata ajllarqanku, Judá orqospitaj Quiryat-Arbá+ llajtata ajllarqanku, nisunman Hebronta.
8 Jordán cheqapi Jericó llajtaj inti llojsimuynin ladopeqa ajllarqanku chʼin jallpʼapi Bézer+ llajtata, chayqa kashan Rubén aylloj* jallpʼanpi, pata pampapi. Chantá ajllallarqankutaj Galaadpi Ramot+ llajtata, chayqa kashan Gad aylloj jallpʼanpi. Ajllallarqankutaj Basanpi Golán+ llajtata, chayqa kashan Manasés aylloj+ jallpʼanpi.
9 Chaykuna karqanku pakakunapaj ajllasqa llajtas tukuy israelitaspaj, paykuna ukhupi tiyakoj forasterospajpis. Chaymanqa pakakoj ayqeyta aterqanku mana munashaspalla runata wañuchejkuna.+ Ajinamanta ama wañojpa vengakojnin wañuchinanpaj, manaraj juezkuna juzgashajtinku.+
Sutʼinchaykunasnin
^ Chayri “mana yachaspalla”.
^ Chayri “mana yachaspalla”.
^ Uj aylloqa uj familiamanta miraj ashkha familias kanku.