Números 12:1-16
12 Uj kuti Miriamwan Aaronwanqa Moisespa contranta rimayta qallarerqanku, Cus llajtayoj warmiwan casarakusqanrayku.+
2 Paykunaqa nisharqanku: “¿Jehová Diosqa Moisesllawanchu parlan? ¿Manachu noqaykuwanpis parlallantaj?”,+ nispa. Jehová Diostaj chay nisqankuta uyarisharqa.+
3 Moisesqa aswan llampʼu sonqoyoj+ karqa kay jallpʼa patapi tukuy runasmanta nisqaqa.
4 Chayllapi Jehová Diosqa Moisesman, Aaronman, Miriamman ima nerqa: “Kinsantiykichej riychej tinkukuna toldoman”, nispa. Jinata nejtintaj kinsantinku rerqanku.
5 Jehová Diostaj chhoqo phuyupi uraykamuspa+ chay toldo punkupi sayaykorqa. Chantataj Aarontawan Miriamtawan wajyarqa, paykunataj qayllaykorqanku.
6 Diostaj paykunata nerqa: “Ama jina kaspa imatachus nisqayta uyariwaychej. Sichus qankuna ukhupi Jehová Diospa profetan kanman chayqa, paywanqa uj mosqoypi jina+ rejsichikuyman, mosqoypitaj paywan parlayman.+
7 Kamachiy Moiseswanrí mana jinatachu parlani. Makinman churani tukuy israelita wawasniyta.*+
8 Paywanqa uyapura* parlani,+ sumaj sutʼitataj, mana imata pakaspa. Noqa Jehová Diosqa payman rikhurini. ¿Imaraykutaj kunan kamachiy Moisespa contranta rimayta mana manchachikunkichejchuri?”, nispa.
9 Chantá Jehová Diosqa paykunapaj mayta phiñakuspa riporqa.
10 Phuyupis toldo patamanta oqharikorqa. Miriamtaj lepra onqoyniyoj rikhurerqa, chay lepraqa ritʼi jina yurajpacha karqa.+ Aarón Miriamta qhawarinanpajtaj, Miriamqa lepra onqoywan juntʼaña kasharqa.+
11 Aarontaj chay rato Moisesta nerqa: “Ay wiraqochíy. Ama jina kaspa, ama kay juchaykurayku castigawaykuchu ari. Noqaykoqa wampumanta kay jinata juchallikuyku.
12 Ama jina kaspa, ama saqeychu ari Miriamqa wañusqa nacekoj wawaj qʼetayasqa aychan jina kananta”, nispa.
13 Chantá Moisesqa qhaparikuspa Jehová Diosmanta mañakorqa: “Diosníy, ama jina kaspa sanoyachillay ari, sanoyachillay ari”, nispa.+
14 Jehová Diostaj Moisesman kuticherqa: “Sichus Miriamta tatan uyanman thoqaykunman karqa chayqa, qanchis diasta pʼenqaywan kanman karqa. Chayrayku Miriamta qanchis diasta campamentomanta* jawaman+ wijchʼuychej.* Chaymantaraj campamentoman kutiykamuchun”, nispa.
15 Chayrayku Miriamqa qanchis diasta campamentomanta jawaman wijchʼusqa karqa.+ Chaykamataj israelitasqa mana maymanpis purirerqankuchu, Míriam campamentoman kutiykamunankama.
16 Chantá israelitasqa Hazerotmanta+ purirerqanku, Parán chʼin jallpʼapitaj+ toldo wasisninkuta* armarqanku.
Sutʼinchaykunasnin
^ Hebreo parlaypeqa nin, “Payqa tukuy wasiypi rikuchishan atienekunapaj jina kasqanta”.
^ Hebreo parlaypeqa nin, “simipura”.
^ Campamentoqa ashkha toldo wasis.
^ Chayri “campamentomanta jawapi cuarentenapi kachun”.
^ Chayri “carpa wasisninkuta”.
