Números 13:1-33
13 Jehová Diosqa Moisesman nerqa:
2 “Qharista kachay Canaán jallpʼata qhawamunankupaj,* mayqentachus israelitasman qosaj chay jallpʼata. Sapa ayllumanta* uj qharita kachaychej, ayllunkupi kurajkuna+ kanku chaykunamanta ujta”,+ nispa.
3 Chayrayku Moisesqa qharista kacharqa Parán chʼin jallpʼamanta,+ Jehová Dios kamachisqanman jina. Chay qharisqa Israelmanta uma kajkuna karqanku.
4 Sutisninkutaj kaykuna karqa: Rubén ayllumanta Zacurpa wawan Samúa.
5 Simeón ayllumanta Horijpa wawan Safat.
6 Judá ayllumanta Jefunejpa wawan Caleb.+
7 Isacar ayllumanta Josejpa wawan Igal.
8 Efraín ayllumanta Nunpa wawan Hosea.+
9 Benjamín ayllumanta Rafujpa wawan Paltí.
10 Zabulón ayllumanta Sodijpa wawan Gadiel.
11 José+ ayllumanta nisunman Manasés*+ ayllumanta Susijpa wawan Gaddí.
12 Dan ayllumanta Guemalijpa wawan Amiel.
13 Aser ayllumanta Miguelpa wawan Setur.
14 Neftalí ayllumanta Vofsijpa wawan Nahbí.
15 Gad ayllumanta Makijpa wawan Gueuel ima.
16 Chay qharista Moisesqa kacharqa Canaán jallpʼata qhawamunankupaj. Moisesqa Josué*+ sutita churarqa Nunpa wawan Hoseaman.
17 Moisesqa chay qharista Canaán jallpʼata qhawamunankupaj kachashaspa nerqa: “Neguebman wichariychej, chaymantataj orqosman wicharinkichej.+
18 Chaymanta qhawankichej imaynachus chay jallpʼas kasqankuta,+ chaypi tiyakoj runaspis kallpasapaschus kanku manachus chayta, chantá ashkhachus pisillachus tiyakunku chaytapis.
19 Qhawallankichejtaj chay jallpʼas sumajchus kanku manachus chayta, tiyakushanku chay llajtasninkupis perqaswan muyurisqachus kanku manachus chayta.
20 Qhawallankichejtaj jallpʼasninkupi sumajtachus poqon manachus chayta,+ sachʼasninkupis kanchus manachus chayta. Ama manchachikuychejchu.+ Chay jallpʼaspi imachus poqon chaymantapis uj chhikata apamunkichej”, nispa. Chay tiempoqa karqa ñaupaj kaj uvas poqosqaña kashajtin.+
21 Jinamanta chay qharisqa wicharispa chay jallpʼasta qhawamorqanku Zin nisqa chʼin jallpʼamantapacha+ Rehob+ cheqakama, Lebó-Hamat+ qayllakama.*
22 Neguebman wichariytawan Hebrón+ llajtaman chayarqanku. Chaypeqa tiyakusharqanku Ahimán, Sesái, Talmái+ ima, paykunaqa Anacpa miraynin+ karqanku. Hebrón llajtaqa ruwasqa kasqa Egiptopi Zoan llajtamanta qanchis watas ñaupajta.
23 Chaymantaqa Escol mayuman*+ chayarqanku, chaypitaj kʼutorqanku uj uva sachʼaj ramanta, uvas chhullchuyojta.* Chaytataj kʼaspiman warkhuykuspa iskay ukhu aparqanku. Chantá apallarqankutaj uj mashkha granadasta, higostawan.+
24 Chay cheqata Escol* mayu+ nispa suticharqanku, israelitas chaypi uvas chhullchuta kʼutusqankurayku.
25 Chay rejkunaqa 40 pʼunchaykunamanta+ kutimorqanku, chay jallpʼata qhawamusqankumanta.
26 Kutimorqanku Parán chʼin jallpʼaman, Cadesman.+ Chaypi suyasharqanku Moiseswan Aaronwan tukuy israelitaswan ima. Chantá israelitasman willarqanku imatachus rikusqankuta, rikucherqankutaj chay jallpʼaspi poqojta.
27 Moisesmantaj kay jinata willarqanku: “Noqaykoqa maymanchus kachawarqayku chay jallpʼaman chayarqayku. Chay jallpʼapeqa ciertopuni lechewan miskʼiwan jinantin kasqa.+ Kay jinata chay jallpʼaspeqa poqoj kasqa.+
28 Chaywanpis chaypi tiyakoj runasqa manchay kallpasapas kasqanku, llajtasninkupis jatuchaj kasqa, perqaswan sumaj muyuykusqa. Chaypi rikuyku Anacpa mirayninmanta runasta.+
29 Négueb+ cheqaspeqa amalequitas+ tiyakushanku, orqos chaynejpitaj tiyakushanku hititas, jebuseos,+ amorreos+ ima. Cananeostaj+ tiyakushanku mar qocha chaynejpi,+ Jordán qayllapi”, nispa.
30 Calebtajrí Moisespa ñaupaqenpi kasharqanku chay israelitas ama manchachikunankupaj kay jinata nerqa: “Kunanpacha wicharispa chay jallpʼasta japʼikanpunanchej tiyan. Noqanchejqa paykunata atipayta atinchej”,+ nispa.
31 Calebwan khuska rejkunatajrí kuticherqanku: “Mana. Mana atipasunmanchu chay runastaqa. Paykunaqa noqanchejmanta aswan kallpayoj kanku”,+ nispa.
32 Chay jallpʼasmantataj mana allin kajta israelitasman willallarqankupuni:+ “Qhawamorqayku chay jallpʼasman rispaqa wañusunchej. Chaypi tiyakoj runasqa may jatuchachaj kanku.+
33 Chaypi rikuyku nefilimkunata, Anacpa wawasninta,+ paykunaqa nefilimkunaj miraynin kanku. Noqaykoqa paykunaj qayllankupi saltamontes jina juchʼuysitus kayku, paykunapis juchʼuysitusta jina qhawariwayku”, nispa.
Sutʼinchaykunasnin
^ Uj aylloqa uj familiamanta miraj ashkha familias kanku.
^ Chayri “wateqamunankupaj”.
^ Manasesqa Josejpa wawan karqa.
^ Hebreo parlaypeqa nin, “Jehosúa”. Jehosúa suteqa niyta munan Jehovamin salvacionqa.
^ Chayri “Hamatman yaykunakama”.
^ Chayri “Escol wayqʼoman”.
^ Uvas chhullchu: waj lugarespi ninku uvas racimo.
^ Escol suteqa niyta munan uvas chhullchu.
